Hìu duh khoai Bơtau Hùng geh lơh tàm dòr ñhoa, gơwèt thôn 6, sàh tiah nhàr lơgar Dăk Buk So, kơnhoàl Tuy Đức, càr Dăk Nông. Lài mờ ngai Duh khoai, làng bol neh tơrgùm lơh niam wơl hìu duh khoai: cau sơng bôi tềng kơl lĭk hìu, cau pơs siồ siă tềng ƀlàng gùt dar hìu, cau pơnring jơgĕ, kơƀàng tàm hìu năc ơm pa geh lơh.

Ồng Chử Anh Chương, cau tàm Mpồl atbồ hìu duh khoai pà git, ngai 10 nhai 3 jăt tơngai àng kơnhai là ngai chờ dờng ngan tàm tiah nhàr lơgar do gơwèt mờ ală cau kis ngài ƀòn lơgar tờm bơh càr Phú Thọ dê: “Jơh ală cau ndrờm wèt tus hờ rài lài do, jơnau git wă bơh làng bol he dê là: “Bŭ lah cau lơi lòt tiah ngài, kah ngai duh khoai ngai 10 nhai 3 den rê”. Làng bol cau lơi kung đơs bè hơ̆ lơm. Bol añ lơh hìu duh khoai do nàng di tàm dơ̆ Duh khoai ngai 10 nhai 3 den bơyai lơh, gam di tàm ală dơ̆ lồi nam den bơyai lơh tìp măt Mpồl cau bơh càr Phú Thọ dê, tam pà bal broă lơh mờng chài tàm broă lơh sa, bơta chài lơh suơn, ròng phan ha là kă bro phan”.

Hìu duh khoai Bơtau Hùng tàm thôn 6, sàh Dăk Buk So geh lơh tàm ƀlàng ơnàng pơgăp 2 sào. Tàm hơ̆, hìu geh lơh jăt broă lơh hìu kwơ̆ gơlang yau ơnàng 40 thơ̆k vuông. Hìu duh khoai geh lơh tàm kai 7 kấp, mờ ƀlàng ơnàng gùt dar. Tàm gùl geh ơn kơƀàng duh khoai niam, geh jơnang duh khoai rơmĭt mờ rùp Bơtau Hùng. Hờ bơdìh hìu duh khoai, làng bol kung neh ròt hìu năc ơm niam, ƀlàng tàp pràn să jan, jơnang đơs crih tamya…

Ồng Nguyễn Xuân Phúc, kis tàm thôn 8, sàh Dăk Buk So, kơnhoàl Tuy Đức pà git, bơh tŭ ai ngui tàm nam 2018, hìu duh khoai do neh gơs anih lơh broă wèt tus rài lài do, prăp gàr mờ đòm jăt niam bơhiàn ờs mờng dê: “Tus tàm do ngài mờ ƀòn lơgar, làng bol bol añ lơh geh Mpồl cau ƀòn lơgar bơh càr Phú Thọ, hơ̆ sồng tă priă blơi ù mờ lơh hìu duh khoai ală Bơtau Hùng mờ là anih nàng bơyai lơh pơrjum mpồl bơtiàn. Bol añ gàr niam bơhiàn kăc màng bơh ồng pàng lài do, bơto bơtê oh kòn pal git wèt nùs nhơm hờ rài lài do, geh kơnòl mờ Dà lơgar, tus bal bơ̆t bơtàu ƀòn lơgar dơ̆ bàr pas gơs pràn kơl dang”.

Tàm tiah nhàr lơgar sàh Dăk Buk So, tiah tờm kơnhoàl Tuy Đức, Hìu duh khoai Bơtau Hùng là anih nàng tìp bal, tam klăc bal mpồl bơtiàn. Lŏ Thị Chí, kòn cau Mnông kis tàm ƀòn Bu Ndrung, sàh Dak Buk So pà git, lŏ jăt yàng Bàp, mơya pah dơ̆ Duh khoai Bơtau Hùng lŏ ndrờm tus chu nàng kah kơlôi ală Bơtau Hùng tàm hìu duh khoai mờ tìp bal mờ ală cau. “Ală ngai kwơ màng, ngai satềp, duh khoai Bơtau Hùng den añ ndrờm tus chu ñàng kah kơlôi tus ală Bơtau Hùng. Kơnờm geh hìu duh khoai, añ mờ ală làng bol tàm ƀòn geh tìp bal, đơs crih tamya, tàp pràn să jan mờ làng bol geh ƀòn lơgar bơh càr Phú Thọ tus tàm do ơm kis mờ lơh sa bal mờ ală cau tus bơh tiah ndai. Ală cau kis bal tàm do gơrờm bal niam ngan”.

Ồng Ngô Văn Thương, Củ tịc Anih duh broă làng bol sàh Dăk Buk So yal, bơh tŭ geh hìu duh kah, ngai bơyai lơh Duh khoai Bơtau Hùng neh gơs ngai chờ tàm tiah nhàr lơgar do: “Dơ̆ duh khoai Bơtau Hùng, uă làng bol tàm càr, kơnhoàl, sàh mờ kấp ủy, gơnoar atbồ tàm do ndrờm tus chu ñàng ală Bơtau Hùng. Do là bơta niam chài bơh làng bol kis tàm do dê, tàm hơ̆ ngan là làng bol bơh càr Phú Thọ tus ơm kis tàm do. Bol añ là sàh tiah nhàr lơgar, geh gal jơi bơtiàn ơm kis bal, bơh broă lơh do pơgồp bal tàm broă bơ̆t bơtàu bơta tam klăc bal gùt jơi bơtiàn”.

Broă lơh hìu duh khoai Bơtau Hùng bơh làng bol geh ƀòn lơgar bơh ù tiah mò pàng rài yau tàm sàh Dăk Buk So ờ mìng pơgồp bal tàm broă prăp gàr nùs nhơm pin dờn, mờ gam đờm jăt bơhiàn kăc màng, tơnguh bơta tam klăc bal sàh ală jơi bơtiàn tàm tiah nhàr lơgar tàm Tây Nguyên. Hìu duh kah neh gơs anih “hùc dà kah tô dà” mờ pơgồp bal tàm broă prăp gàr, đờm jăt ală bơta niam chài, rài lài do jơi bơtiàn lơgar Việt Nam dê bơh ală rài.