Broă lơh geh Mpồl jơnau cih đơs crih tam ya gờm chờ càr Dăk Lăk pơgồp bal mờ Sở Niam chài, Tàp pràn să jan mờ Lòt nhơl bơyai lơh. Mờ tơngu me “Dăk Lăk – Par guh bal mờ Dà lơgar”, broă lơh Ngai Jơnau Nrĭ dơ̆ 23 tàm càr Dăk Lăk geh bơyai lơh uă broă lơh niam bè: tamya triă, đăng grài, dròng cing mồng, teh, uh đơng gòng jơi bơtiàn, đơs jơnau nrĭ-gùng đơs crih, ràng tơlik sră, pang rùp niam, bơta chài cih sră mờ cri bơyai jơnau cih mờ tơngu me “Jơnau nrĭ Việt Nam, Dăk Lăk – 50 nam tơnơ̆ ngai dà lơgar tơrgùm bal”.

Mò Niê Thanh Mai, Củ tịc Mpồl jơnau cih đơs crih tam ya càr Dăk Lăk pà git, bal mờ ală broă lơh jơnau cih đơs crih tam ya, bơta tơngŏ tờm bơh broă lơh dê là Mang jơnau nrĭ Nguyên tiêu geh bơyai lơh tàm trồ mang mờ broă lơh tơnpar jơnau nrĭ tàm săp tam truh sơngơr, cèng bal jơnau kơ̆p kờñ bơh ală làng bol dê bè ală bơta niam bơnĕ tàm nam pa.