N’gor Khánh Hòa hŏ lor nchrăp ndop dŭt geh nău tam nău tĭng ƀư Nghị quyết bah Bộ Chính trị mpeh rdâk njêng, hun hao n’gor Khánh Hòa tât năm 2030, uănh ngai tât năm 2045 ndrel bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n’hanh mpeh yôk yang. Rlău 4 năm an ƀư, bah tơm ndơ ăp trong kơl dja hŏ ƀư nuĭh ƀon lan rnoi mpôl đê̆ mpeh yôk yang nsing nơm, hun hao wăng sa jŏ jong.  

Yuh Pi Năng Thị R En, ta xã Khánh Trung, nkuâl Khánh Vĩnh lah nuĭh an saơ kloh tâm nău nkoch klaih rlău ach o ta nkual ƀon lan rnoi mpôl đê̆ n’gor Khánh Hòa. Rnăk yuh tă gŭ rêh tâm jay truh sat, nkưp nde, rnôk ăp tơ̆ mih têh ân der gŭ nde ntŭk êng. Nơm geh trong ntop kơl mon jay nâp uĕh, yuh R En aƀaơ hŏ geh ntŭk gŭ đăp mpăn.

“Dơi ngih dak ntop kơl ƀư jay nâp uĕh, mô hôm geh nău truh sat, n’hanh mih rsach đŏng ôh. Rnăk mô hôm hăn jay mê̆ nde mih đŏng ôh. Rnăk gâp lor nchrăp tay manh tơm prăk gay ƀư jay ăch chrach. Dơi geh dŏng ndơ ngih dak nta joi trong rêh, mpôl hên nsrôih mât rong ntop n’hao tay, tuch tăm, jêh aơ tay geh nău rêh đăp mpăn lơn. Gâp hŏ mât geh ntơm bah 2 mblâm tât 10 mblâm ndrôk”.

N’gor Khánh Hòa geh rlău 82.000 nuĭh ƀon lan rnoi mpôl đê̆, lơn âk lah rnoi nuĭh Raglai, rgum ta 2 nkuâl Khánh Sơn n’hanh Khánh Vĩnh. 4 năm aơ, HĐND n’gor Khánh Hòa n’gluh an dŏng 15 nghị quyết; UBND n’gor n’gluh an 33 quyết định, 10 trong nchrăp n’hanh dŭt âk siƀŭt rđău đă, ƀĭt juet an tĭng ƀư bôk nău kan an nkual ƀon lan rnoi mpôl đê̆ mpeh yôk yang. Tâm nê, n’gor hŏ n’gluh an dŏng ăp nghị quyết mha êng an ăp nkuâl dŏng tơm prăk ngân sách n’hanh tơm prăk tâm di êng ƀa ƀă gay kơl na nê̆ an 2 nkuâl Khánh Sơn, Khánh Vĩnh.

Tâm rnôk an tĭng ƀư bôk nău kan, n’gor way ƀư ôp uănh, groi nđôi ta ăp nkuâl gay droh rklaih ăp jêr jŏt năn ngăch, ntrôl ngăch tĭng ƀư bôk nău kan. Lvang năm 2021 - 2025, lĕ rngôch tơm prăk tĭng ƀư bôk nău kan geh rlău 790 rmen prăk, tâm nê 85% bah tơm prăk ngân sách trung ương. Aƀaơ rĭng geh tĭng bôk nuĭh bah nkual ƀon lan rnoi mpôl đê̆ hao rlău bar tơ̆ rđĭl đah năm 2020, geh rlău 30 rkeh prăk/nuĭh/năm; rnoh âk rnăk ach o hŭch 7,2%/năm. N’gor jut jăng geh rlău 1.130 mblâm jay truh sat; rdâk njêng, nkra têh uĕh tay hang rhiăng ntŭk dŏng rêh an ƀon lan.

Tât aƀaơ, 100% rnoh xã geh trong ndeh ô tô tât nklang, lĕ rngôch rnăk ƀon lan dơi dŏng điện n’hanh dak kloh rsang. Wa Võ Nam Thắng, Giám đốc Sở Dân tộc n’hanh Tôn giáo n’gor Khánh Hòa an gĭt, trong ntop kơl mon jay mhe n’hanh hun hao joi geh trong rêh kơl ƀon lan đăp mpăn nău rêh, klaih rlău ach o jŏ jong.

“Mpôl hên leo ƀư an rmôt nuĭh geh nsing nơm hăn uănh ăp nhih máy tâm n’hanh bah dih n’gor gay n’hao nău dơi nkoch trêng. Nkre kan nsum đah Nhih nti Chính trị n’gor kơi năp nti nău ngơi rnoi mpôl đê̆ an cán bộ n’gâng tơm ta 2 n’gor Khánh Sơn, Khánh Vĩnh n’hanh du đêt nkuâl, n’gâng kan. Mpôl hên n’hao dăng kơi năp nti an cán bộ mât bôk kan gay khân păng wât kloh n’hanh an ƀư lĕ n’hâm suan bôk nău kan gưl neh dak tâm dâng”.

Mhe aơ, 2 nkuâl mpeh yôk yang Khánh Sơn n’hanh Khánh Vĩnh hŏ dơi Thủ tướng kơp dơn klaih rlău ach o. Nghị quyết bah Bộ Chính trị lăp tâm nău rêh hŏ rgop n’hao nău gĭt êng, njêng nău rgâl jru mpeh nău mĭn hun hao bah nuĭh ƀon lan mpeh yôk yang. Ntơm bah kâp nơm tay, âk rnăk ƀon lan hŏ nsan hao êng, nănh rgâl si tăm ndơ mât, mât hun hao tuch tăm mât rong. Âk trong ntĭt leo tuch tăm hữu cơ, ndơ geh ƀư OCOP, nkual tăm VietGAP, trong leo dâng sre têh hvi, hợp tác xã ntil mhe... dôl mbrơi jêng n’hanh pơk hvi.

Wa Bùi Hoài Nam, Bí thư nkuâl Khánh Sơn an gĭt: Tât aƀaơ, ăp ƀon nkual ƀon lan rnoi mpôl đê̆ n’hanh mpeh yôk yang tâm n’gor hŏ jêng ăp nkual tuch tăm way êng kơt: Nkual way tăm sầu riêng ta Khánh Sơn 2.900 ha. 

“Nkuâl Khánh Sơn klaih rlău ach o yơn ăp trong ntĭt leo tuch tăm, hun hao wăng  sa way dơi uănh khlay tĭng trong rƀŏng jŏ jong. Nkuâl Khánh Sơn dôl rgâl bah tơm tăm săk geh đêt jêng ntil tơm tăm săk geh âk, kah khlay âk. Mpôl hên dôl rƀŏng tât na nê̆ geh âk rnoh rnăk ƀon lan rnoi mpôl đê̆ geh rnoh mbơm oi hao âk”.

Rong an âk tơm ndơ ntuh kơl hun hao wăng sa- rêh jêng nkual ƀon lan rnoi mpôl đê̆ n’hanh mpeh yôk yang lvang năm 2021 - 2025, n’gor Khánh Hòa hŏ rdâk njêng nkual mpeh yôk yang rlai tâm ban, jŏ jong, geh âk săk ntơr. Ăp trong kơl, bôk nău kan mô dơn kơl bar nkuâl mpeh yôk yang klaih rlău ach o ma hôm njêng jâng nsan hun hao jŏ jong đŏng, jêng ăp suan ntrôl mhe, rgop ƀư jêng ngăn ngăn rnoh tât hun hao lam lĕ rngôch n’gor Khánh Hòa tât năm 2030, uănh ngai tât năm 2045.

Wa Nghiêm Xuân Thành, Bí thư Tỉnh ủy Khánh Hòa đă tâm let năp tay, ăp ntŭk ân rgum tĭng ƀư uĕh nău ntuh kơl khoa học, công nghệ gay njêng đăt ndal:

“Ân ƀư jêng ngăn ngăn tâm tuch tăm, dŏng công nghệ thông tin, rgâl mbrô. Nkô̆ nău dja n’gâng kan ta ntŭk ân lăp kan.  Aơ lah ntuh kơl blău, an kônh wa mpeh yôk yang mâng ndar, lah kơl an tĭng nuĭh ƀon lan ngoăy dŭt jêr ăp nkô̆ nău dja. Nău ŭch lah n’hao rnoh khlay ta rnoh neh tăm. Dăp rgum ân tĭng ƀư jăp, nchrai rmoh rman. Rlău  ma tơm sầu riêng ân tăm tay tơm êng ƀa ƀă đŏng, đăp mpăn an kônh wa đăp mpăn nău rêh”.