Ngih bu ranh Kra Jăn Ha Xuyên, tâm thôn Đa Tế, xã Đạ M’Rông, nkuăl Đam Rông yan aơ geh âk ngăn ndrŭng brai. 75 năm, yơn wa hôm mât chăm tơm sa play, pĕ n’ha rong ndrŭng brai.

            Đê̆ dơm geh nŭih gĭt, bu ranh bah thôn Đa Tế rnôk aơ tă lah Fulro ƀư tih. 50 năm bah năp nê, rnôk mhe 25 năm, wa geh phung rlăng aơ pă ân grat Trung tá, jêh nê lah “Tư lệnh Quân khu 4 trung ương’, Kruanh n’gor Liangbiang”.

            Yơn lah, jêh bơi tât 12 năm rêh tâm nklang bru krŏng, wa hŏ sĭt ma ƀon lan. Nau leo kơl an bah n’gâng kan ndrel ƀon lan, hŏ kơl an ân Kra Jăn Ha Xuyên ăp nhoat plŏ tay nau rêh, sŏk tay nau rnơm:

            “12 năm ngai ma ur kon, nar aơ ntŭk aơ nar ri ntŭk êng, leo nau rêh nơm jêng mhĭk. Ndri ma hâp nchrăp trong hăn sĭt. Rnôk nê klach bu nhŭp leo krŭng, nhŭp gŭ ndrung, gâp klach ngăn. Yơn rnôk sĭt tâm ƀon, bôk năp tâm Công an n’gor Lâm Đồng, rnôk nê lah Giám đốc wa Vũ Linh. Tâm nê ri geh ngêt sa kah đŏng, mô geh bu leo nhŭp krŭng ôh, mô geh ƀư ri a ôh. Pah kan nơm mbơh nau geh, nau ƀư kan bah nơm, jêh lôch nơm nkoch mbơh nau ri Lâm Đồng mplŏ sĭt tâm nkuăl Lạc Dương. Rnôk nê kŏ geh săm ƀŭt njoăl bah công an lah pă, dăp rgum pah kan ân nô Ha Xuyên. Jêh nê đê̆ khay rĭ ƀư Kruanh Mặt trận bah xã Đạ M’rông, jêh ê đŏng lah pă ƀư nau kan trạm thuỷ nông, ƀư nau mât njrăng pă dak tŏ ân nkuăl”.

            Mô êng wa Ha Xuyên, âk nŭih tă tĭng Fulro jêh rnôk sĭt geh n’gâng kan tâm Lâm Đồng pơk trong gay tuch tăm, đăp mpăn nau rêh. Tĭng wa Liêng Hót Ha Hai-Groi kruanh UBND nkuăl Đam Rông, khân păng geh ndơn nau kơl an kơt lah rnăk ach o, manh prăk ƀư kan, kơl an kon ntil, mpa rong, ndâk ngih bah ăp nau kơl an bah nhe dak. Ntơm bah lah ăp nŭih mhik tih, rnôk aơ khân păng lah nŭih leo trong gay tâm rnglăp, rgop nau jut lơi nau rluk mâl ơm ndrel ntrŭt dăng nau kan tuch tăm:

            ‘Bah năp nê nơh, rnôk nê khân păng tih trong kơt nê, ma rnôk sĭt ma nau rêh ăp nar, đah ƀon lan ri khân păng rêh kơt lah nŭih ƀon lan ngăn đŏng. Lah khân păng tâm rnăk ach o ri hôm geh kơl an kơt ăp rnăk ach o. Khân păng hôm geh bu kơl an, kơl an manh prăk, kơl an kon ntil tăm, mpa rong. Jêh ri pơk trong ân khân păng ƀư ngih gŭ tĭng Bôk nau kan bah neh dak, bôk nau kan jut ngih truh sat bah Chính phủ. Tâm rnoh khân păng, geh du đê̆ nŭih jêng nŭih bu rnơm, geh nau ngơi tâm ƀon lan, lah nŭih ƀon lan geh nau blau, leo trong ueh tâm nau jut lơi nau rluk mâl ơm, jêh nê bonh đă, nkoch trêng ân ƀon lan, pah kan, tuch tăm, gơih lă kan”.

            Ndrel ma Đam Rông, tâm ăp nkuăl êng kơt lah Lạc Dương, Lâm Hà, Đức Trọng, Di Linh...nau kan tâm rnglăp tay ma ƀon an ân ăp nŭih tĭng Fulro geh ƀư âk. Nŭih tih trong geh sĭt, geh kơl an ma dak si, nau kan, ngih gŭ, pơk trong ân hun hao kơt bu êng.

            Tĭng Thượng tá Lê Công Duy-Công an n’gor Lâm Đồng, nau ngăn hun hao bah ƀon lan ndrel nau têk leo tă bah ƀon lan lah nau khlay, rgop nau kơl an ăp nŭih geh nau tih dơi gĭt nau khlay bah nau rêh:

            ‘Ăp nau ntrŭnh kơl an tâm nau rêh jêng kơt lah dak si, kơl an kon ntil tăm, mpa rong kŏ mô geh nau tâm nkhah êng ôh. Ntŭk kan công an vay tâm mâp ma khân păng ndrel ndơn saơ nau rêh jêr jŏt ri ân geh nchrăp mbơh nchră đă ân n’gâng kan xã, kơl an rklaih nau. Ndri ma, khân păng geh dơi rnglăp tâm nau rêh bah ƀon lan, đăp mpăn tâm nau pah kan jan sa, tuch tăm. Mra dơi lah ngoai tâm âk nau ueh gay mât đăp mpăn tâm nkuăl rnoi mpôl đê̆, mô ân Fulro ndâk ƀư tay tâm Lâm Đồng”.

            Nau ngăn ân saơ, Lâm Đồng lah ngoai tâm ăp nau ang tâm Tây Nguyên mpeh nau kan tâm nau kơl an, leo nsĭt, kơl an nŭih tă geh nau tih gay ma sĭt ma nau rêh nâm ơm. Tă bah nuih n’hâm tâm kơl an bah n’ăp ma n’gâng kan ndrel ăp nsum mpôl tâm ƀon lan hŏ njêng nkuăl neh geh đăp mpăn tâm nau rêh, ntŭk ma ăp nŭih tă geh nau tih rnôk aơ hŏ dơi dâk nâp, rgop nau ueh tâm nau hun hao văng sa bah ƀon lan, bun dăp nau tâm rnglăp lam rnoi mpôl./.