Mât răm rhơn nđơr bah ƀon lan tât nkual ƀon têh ta Dak Lak
Thứ bảy, 00:00, 05/07/2025 VOV/Nuĭh rblang: Điểu Thân VOV/Nuĭh rblang: Điểu Thân
VOV.M'NÔNG- Nău rêh nar lơn ma ntrŭt ngăch, ri rnăk wâl lơn ma geh nău khlay, kơl ăp nuĭh joi saơ đăp mpăn. Yơn ăp rnăk ân dơi ăp nuĭh tâm rnăk mât chăm tĭng ăp trong ƀư tâm di đŏng, gay nar lơn ma rhơn răm tâm rnăk wâl.

 

Nău rêh nar lơn ma ntrŭt ngăch, ri rnăk wâl lơn ma geh nău khlay, kơl ăp nuĭh joi saơ đăp mpăn. Yơn ăp rnăk ân dơi ăp nuĭh tâm rnăk mât chăm tĭng ăp trong ƀư tâm di đŏng, gay nar lơn ma rhơn răm tâm rnăk wâl.

Ndăn nar rlu kêng dŭt pơh ntĭm kon bu klô dŭt nti goh dĭng dưt rla, nô Y Duyệt Niê, ta buôn Phơng, xã Ea Tul, n’gor Dak Lak nkoch, aơ lah mông nar khlay gay nô bun dăp nău dêh rŏng đah oh kon. Bar hê ur sai lah nai ntĭm da dê, yơn hăn ntĭm ngai jay, hăn kan lĕ ma nar ƀư nău mât chăm oh kon mô dơh. Nô Y Duyệt, an gĭt, ntĭm kon tŭr chĭng mô dơn gay mât ndray văn hóa Rđe, ma hôm lah buăt nthoi tâm rŏng đah ăp rơh kơn tâm rnăk wâl:

“Rnăk way tâm nkoch ăp nău rhơn mƀak, ăp nău rhơn mƀak n’hanh lơn lah ăp nău kan ma oh kon mbra dơi ƀư dơi ri ndrel tâm nkoch nsum. He way ntĭnh ntăn ăp oh kon rêh sŏng di. Geh mô nar dơh ru, lơn lah rnôk khay rlu nti ri ntĭm oh kon tŭr goh chĭng gong mô lah dĭng dưt rla n’hanh an kon se tâm nđŭr đah băl mpôl, đah ăp bu kuâng, lơn lah nuĭh mbra wât dơi rnoh khlay way ơm văn hóa bah nuĭh Rđe”.

Đah nhà báo Đàm Thị Thuần, ta phường Tân Lập, nău kan ƀư yuh way hăn pah kan ngai mbro, mông nar geh ru geh mô. Wât dơi n’hanh ntop kơl bah ăp nuĭh tâm rnăk lah ntŭk nsing gay yuh tâm rlak tâm ban đah nău kan n’hanh rnăk wâl. Yuh Thuần rhơn: mô dơn nê nău kan bah yuh jêng mpêt krêp nthoi đah ăp nuĭh tâm rnăk, njêng rnoh khlay dŭt mha êng.

“He dơi ntop kơl dŭt âk bah ăp nuĭh tâm rnăk wâl, yor he geh du rnăk wâl jê̆ dŭt dêh rŏng đah nău ƀư báo. Sai way pah kan đah báo đŏng, kon bu klô ri ndăn ăp nar khay rlu nti râng ăp nău nchih jê jê̆ gay dŏng ăp prăk nhuận bút nê rvăt ndơ dŏng ăp ntil ndơ he ŭch. Ăp tơ̆ hăn pâl bah rnăk wâl mô dơn hăn pâl êng ma uănh nê kơt lah ăp trong hăn ngăn ngăn bah nhà báo. Ăp nău nkoch kơt lah trong nkah pơk trong đề tài ƀư báo nsum”.

Tĭng yuh Nguyễn Minh Trang, ta phường Tân An, Dak Lak, moh rơh kơn ri nău khlay bah nău mât rhơn răm ân geh nău rgop suan bah lĕ bar mpeh da dê, mô dơi mĭn “mât răm” lah nău dơn kan êng bah bu ur. Geh nău lah tâm nău rêh mhe aƀaơ, nuĭh bu ur ân dăp rgum nău kan tâm di, n’hanh nău khlay lah lĕ ma rnăk ndrel tâm kơl nsum đŏng.

“Gâp mĭn lah ăp ntil nău kan ri bu ur ân lah nuĭh dâk kơp nđăp n’hanh geh nău tâm pă nău kan du trong tâm di tâm rnăk wâl, nê mơ lah nău khlay. Gâp lap lah geh du rnăk tâm wât nsum. Bar hê ur sai ndrel tâm kơl nău kan tâm rnăk wâl. Kơt nău n’gon trău, jut nhih jay…, rnôk ur mô ru ri sai ƀư, rnôk sai kol ri ur ƀư; n’hanh oh kon têh ri râng ntop kơl nău kan rnăk wâl”.

Wa Lê Phúc Long, Groi Giám đốc Sở Văn hóa, Thể thao n’hanh Pâl nđaih n’gor Dak Lak, an lah, nău rêh mhe aƀaơ đah âk nău mpet jâk dôl rgâl tâm n’guăk n’hanh trong gŭ rêh rnăk wâl. Trong ntĭt leo âk rơh kơn rêh nsum nar lơn ma đêt, nău tâm dâl đah  ăp rơh kơn geh tăch pruăt tă bah công nghệ, nău kan n’hanh tâm ƀah ngai ntŭk gŭ. Bah năp nău ngăn geh nê, Đảng n’hanh Ngih dak hŏ n’gluh an dŏng âk trong nchrăp, trong kơl gay n’hao dăng rdâk njêng rnăk wâl tâm nău rêh mhe.

 Wa Lê Phúc Long, an lah, ăp rnăk ân njêng nău kan nsum gay ăp nuĭh tâm rnăk krêp dêh tay.

“Aƀaơ gay ma geh 3-4 rơh kơn gŭ rêh tâm du rnăk ri dŭt jêr jŏt ngăn. Yor kơt nê̆ ma he ân geh ăp nău kan gay mhâm ƀư bol ma mô ru đah nău kan, đah nău rêh hun hao kơt aƀaơ yơn nha hôm geh mông nar rong an rnăk wâl đŏng. Ma ăp nău kan kơt lah ăp rơh tâm rlong rong an rnăk wâl, ăp nău kan nsĭt tât an rnăk wâl nău tâm uănh khlay nsum, ntop kơl. Bah nê ŭch rŏng mhâm ƀư tâm ăp rnăk geh nău krêp dêh, rnăk wâl rhơn răm, ăp tŏng ri nău rêh hun hao”.

Mât nău rhơn răm rnăk wâl mô gŭ ta nău ntil ndơ nê nơh têh kuâng, ma ntơm bah ăp nău tâm kơl jê̆, nău tâm gĭt wât nsum n’hanh nău tâm dêh rŏng ăp nar đah ăp nuĭh tâm rnăk wâl. Bol lah ta ƀon lan ngai ngât mô lah nklang nkual ƀon têh khuh n’gôr, djăt ma ăp du hê nuĭh ndrel rgop du đêt nău tâm rŏng, du đêt nău uănh khlay ri rnăk wâl mbra răm mƀak, jêng ntŭk nsing nâp tâm njăr trong nău rêh bah ăp nuĭh.

 

 

 

VOV/Nuĭh rblang: Điểu Thân

Viết bình luận

TIN CÙNG CHUYÊN MỤC