Tâm rơh rƀŭn, wa Trương Văn Đạt, Groi Kruanh HĐND n’gor Gia Lai hŏ mbơh ăp nkô̆ nau geh tât nŭih kan. Tĭng nau ntrŭnh bah Uỷ ban rnâng kan Quốc hội, n’gor Gia Lai năm 2021-2026 geh 119 nŭih ntoh măt. Nkre lah, ăp nau kan tơm bah HĐND n’gor kŏ geh mbơh. Ngăn lah, wa Ra Lan Chung, Groi Bí thư rnâng kan n’gor, geh ƀư Kruanh HĐND n’gor Gia Lai. Ăp Groi Kruanh HĐND ndrel Kruanh Rnâng kan ƀư nau tơm kŏ geh ƀư nâp tâm ntrong kan bah rđau kan mhe. Jêh nê, HĐND n’gor hŏ mbơh nau ntrŭnh bah Thủ tướng Chính phủ mpeh nŭih rđau kan UBND n’gor Gia Lai năm kan 2021-2026. Tâm nê, wa Phạm Anh Tuấn, Groi Bí thư n’gor uỷ, geh săch ƀư Kruanh UBND n’gor Gia Lai; 6 Groi Kruanh UBND ƀư ăp nau kan geh đă.

            Ntoh nau bah năp HĐND, wa Phạm Anh Tuấn, Kruanh UBND n’gor Gia Lai, ton:

            ‘Dăn ton ƀư nau kan đah nuih n’hâm nâp, ƀư rjăp, pah kan ueh, ƀư nau prêh ndrel săk tam, tâm nê sok nau kan lah ƀư lao trong lor, ƀư nâp, nau tơm n’hao mhe ƀư nau rƀŏng lôch tâm rnôk mât ndrel rđau đă. Ndrel tâm kơl nsum n’hâm, ƀư nau kan ân rjăp gay tâm ban ân săk tam yor nau geh dơi hun hao tâm di ma nau geh bah Gia Lai mhe rƀŏng tât nkô̆ nau ndâk Gia Lai jêng nkuăl hun hao nâp nâl, ueh, mhe, sâm geh ndrel nau nau ueh tâm nuih n’hâm kan, nkuăl neh ma ăp ntŭk kan, nŭih ƀon lan kŏ mpŏng ŭch gay geh nau rgop ân nau hun hao bah ƀon tơm nom’.

            Tâm rơh rƀŭn, ăp ntoh măt hŏ rgum tâm nchră, mbơh luh nau đă tât âk nau ntrŭnh khlay, geh: Ndâk ăp ntŭk kan tâm HĐND n’gor Gia Lai. Nau nchrăp ƀư ăp rơh rƀŭn bah HDNĐ n’gor. Ndâk ăp ntŭk kan ƀư nau kan ndrel ƀư ntrong kan hành chính tâm UBND n’gor Gia Lai. Năl nau mbơh moh săk bah rmôt kan Ngih phat dôih ƀon lan n’gor Gia Lai mhe...ăp nkô̆ nau aơ geh ân lah nhoat hăn bôk năp tâm nau ƀư nâp trong kan hành chính bah n’gor, đăp mpăn pah kan săk tam ndrel tâm di tâm năm kan mhe.

            Ntoh nau tâm nar rƀŭn, wa Hồ Quốc Dũng, Bí thư n’gor uỷ Gia Lai, lah rjăp:

            ‘Gâp đă ăp đồng chí rđau kan bah rmôt kan tâm n’gor mhe geh săch đă ƀư ân ntơm lăp tay tâm nau kan ndâk njêng bôk nau ƀư nau kan n’hêl, rjăp gay ntrŭnh ƀư ngăn ngên ân geh khoa học, săk tam geh nau dơi bah ăp nau kan geh jao tâm rơh tât. Rnơm lah đah nau ơm, nau nâp, nuih n’hâm tâm rnglăp ndrel nau mpŏng hao jêng bah n’gor Gia Lai mhe, đah du nau nsôih chính trị mhe nsôih ân rƀŏng tât lah du n’gor leo bôk tâm nkuăl Tây Nguyên ndrel Duyên hải Nam Trung Bộ nâp nâl ndrel lam dak lăp tâm rach năm mhe”.

            Rơh rƀŭn tal bôk năp HĐND n’gor Gia Lai gưl XII lah nhoat pơk bôk khlay gay Gia Lai rƀŏng tât nkô̆ nau hun hao nâp nâl, jêng du n’gor leo bôk tâm nkuăl ndrel lam dak./.