Nau nkah bah năm kan Quốc hội gưl 15 lah nau ndâk pháp luật đah nau rgâl mhe rjăp nau mĭn, leo nau dăng jêng nau dơi ntul rlong. Ngăn lah nau rgâl nkra, ntop tay du đê̆ điều bah Hiến pháp năm 2013 njêng nau dơi gay ntơm dŏng n’gâng kan tâm n’gor bar gưl, n’hao nau tâm pă gưl kan, nau kan. Nkoch tât nau tă geh dơi nê, wa Nguyễn Thị Thuỷ, rmôt kan bah Thái Nguyên, ŭch:

            ‘Gay lŏ ƀư nau kan rgâl mhe nau mĭn tâm nau ndâk njêng pháp luật đah nau đă luật knŭng ntrŭnh nau kan tơm, ăp nau kan geh nau dơi rjăp, geh âk nau kan geh tât nau dơi mpeh nau ntrŭnh mra geh tâm nau nchâp đă bah Chính phủ. Ndri ma, phung hên dăn đă Chính phủ tâm rnôk nchrăp săch, đah ăp nau ntrŭnh geh nau dơi tât nau kan hvi, đă Chính phủ ƀư nau sŏk nau rgop âk mpưm lor ma ntrŭnh nau”.

            Tĭng wa Dương Khắc Mai, rmôt kan n’gor Lâm Đồng, tâm năm kan tât, nau tơm mô di lah ntrŭnh âk luật ma ân geh ntrơn jêng nau nâp, geh nau dơi, nchrăp nchroh ndrel tơm prăk tĭng ân tâm di đah nau ntrŭnh luật. Ngăn lah, đă n’hao nau kan mêt uănh gưl prêh geh mbơh ndal rlau đŏng, âk nau kan geh nau tât nkol, ân geh  tĭng uănh n’ôi ân rjăp ndrel rklaih tât lôch:

            ‘Rơh tât, nau kan geh nau khlay lah ân ƀư ân jêh nau kan gay mêt uănh, bonh đă ndrel ndâk tay nau mêt uănh nau ƀư ăp nau đă, jêh lôch mêt uănh. Nau ngăn ân saơ, lah ntrong ƀư jêh mêt uănh mô geh ƀư ân tâm ban, rjăp ri nau săk tam ngăn bah nau kan mêt uănh hôm ê geh dơi ndrel ê tŏng dăng. Ndri ma, gâp đă mbơh nau ân geh lah rjăp lơn nkô̆ nau aơ tâm nau rƀŏng năm kan tât ndrel uănh aơ lah du nau kan tơm gay n’hao nau săk tam bah nau mêt uănh bah Quốc hội”.

Mbơh kloh năm kan Quốc hội gưl 15 hŏ geh âk nau ntrŭnh khlay, geh tât nau hun hao văng sa rêh jêng, pă nau dơi, ngăn lah tâm hun hao gung trong, ăp ntŭk kan bah neh dak ndrel rlong ƀư nau kan, nau ntrŭnh geh tât hun hao 10 n’gor, nkuăl ƀon têh, wa Tô Ái Vang, rmôt kan Cần Thơ, đă:

            ‘Jao ân Chính phủ ƀư nau kơp, rgum, nchră mbơh nau tă geh dơi ƀư ăp nau ntrŭnh rlong mpeh ntrong kan, nau ntrŭnh tơm, ân ƀư kloh nau kan, nau  ntrŭnh ngăn ngên geh tât nau leo nsĭt săk tam ngăn, njêng nau rgâl, ntrong ƀư nau ntrŭnh ê dơi ƀư ueh ndrel nkô̆ nau mhâm ƀư gay geh ntrong kan ân năn ân rơh tât tay, der njêng luh nau tâm ƀah pháp lý mô lah mpŭng nau dơi. Nau kan jao ndrel nthoi đah bar gưl kan Quốc hội  đăp mpăn nau tâm ban tâm nau ƀư ăp nau ntrŭnh đă, njêng ăp nau ntrôl, nau ntrŭnh jêng nau nsôih gay hun hao văng sa rêh jêng ngăn ngên ân ăp n’gor ndrel lam dak”.

            Đah nau mbơh nau kan năm kan 2021-2026 bah Chính phủ, ăp ntoh măt lah rjăp, tâm rnôk nau kan tâm dak ndrel dak ba dih geh âk nau rgâl, yơn đah nau nsôih prêh, nau kan mô nsrŭng, nsôih, ƀư ngăch tâm nau rđau đă, Chính phủ hŏ ƀư jêh âk ngăn nau kan, nkô̆ nau, ăp nau ntrŭnh bah Quốc hội nchrăp luh. Nau kan ndâk tay, hun hao văng sa rêh jêng, rgum ntuh kơl geh uănh khlay, hăn nsum ma nau ndâk ăp nau kan văng sa bah Ngih dak âk năm “ntă mbêl nkŭm phôi” gay geh  săk rnglay. Ntoh nau ŭch tâm năm kan tât, wa Trần Hoàng Ngân, rmôt kan bah nkuăl ƀon têh Hồ Chí Minh ntoh nau:

            ‘Tât tâm rach năm kan mhe, nkô̆ lah ƀư lah dŭt prêh ndrel nfal yơn nơm ngăn lah mra geh nau dơi. Gâp đă Chính phủ uănh kơl an êp nau hun hao ngăch ân geh đăp mpăn nâp nala, ngăn lah uănh khlay nau hun hao đăp mpăn văng sa tơm ndrel nau dơi rgâl mhe trôk nar rnôk aơ gay ma ntuh kơl, ndâk ntrong kan văng sa rêh jêng đăp mpăn, săk tam, ơm ndâk tay, ƀư ân rgâl mhe trong loih rnôk aơ”.

            Ăp nau rgop sŏng, ƀư nau kan prêh bah ăp ntoh măt Quốc hội ân saơ nau nsôih ân lŏ rgâl mhe rjăp bah lam ntrong kan ndâk njêng pháp luật, mêt uănh ndrel rđau kan, gay tŏng dơi ueh lơn nau ŭch hun hao bah neh dak rnôk kan mhe. Ăp ntoh măt ŭch ăp nau dơi hŏ geh njêng tâm năm kan mhe bah Quốc hội gưl XV mra geh lŏ geh ndơn kơt, ƀư jêh ndrel ƀư ân ueh tay, gay ăp nau ntrŭnh rnôk geh ntrŭnh ƀư kŏ dơi geh lăp ngăn tâm nau rêh”./.