Nkual  mpeh bah lơ luh nar n’gor Quảng Ngãi aƀaơ geh 280 ndơ OCOP, tâm nĕ geh 20 ndơ 4 saơ, hôm ƀa ƀă 3 sao. Âk ndơ OCOP hăn ndrel đah tơm dak si, nsơ sa ntĭt mpơl nar lơ wăch rgum nuĭh ƀon lan. Ntoh lư kơt ndơ OCOP ndrel đah sâm Ngọc Linh, tiêu... Wa Lê Thanh Thúy ta phường Kon Tum, n’gor Quảng Ngãi an gĭt, uĕh kah ndơ OCOP dơi nkret njêng bah sâm Ngọc Linh ta ntŭk geh khlay dŭt âk, yor nê, nuĭh dŏng  dŭt ŭch:

Gâp uănh tât ăp ndơ ƀư bah sâm Ngọc Linh. Rnôk gâp săch rwăt ndơ sâm Ngọc Linh ri gâp săch ăp ntŭk tăch nsing nơm, n’hanh lơn lah ăp ndơ OCOP ri nâp nâl lah he rwăt, gâp dŏng ri mbra đăp mpăn n’hanh đăp mpăn đŏng săk soan bah he lơn.  

Ăp ndơ OCOP ntĭt mpơl bah nkual mpeh bah lơ nhâp nar Tây Quảng Ngãi rgum tâm nău dơh đah geh ơm, ntoh lư kơt sâm Ngọc Linh, sâm rse, ăp ndơ ƀư bah tơm dak si. Wa Lương Thị Mỹ Huệ, Giám đốc Công ty TNHH Dược liệu Tây Nguyên. Ta xă Đăk Tô, n’gor Quảng Ngãi an gĭt, doanh nghiệp dôl dŏng 9 ndơ OCOP, tâm nĕ geh 5 ndơ ntoh lư 4 sao. Đah trong rƀŏng jêng geh ăp ndơ, doanh  nghiệp lĕ uănh khlay ntuh kơl mĭn njêng, kơt dŏng khoa học kỹ thuật tâm nkra njêng. Wa Lương Thị Mỹ Huệ an gĭt:

Bôk năp lah mpôl hên ndâk njêng n’hanh pơk hvi nkual tăm geh tâm di lam ntŭr neh, rƀŏng tât tâm di nău tăch n’gluh. Tal 2, jêh trong mât uănh n’hanh nkret njêng jêh krăch rôk gay mât mâp uĕh tam, đăp mpăn n’hanh n’hao khlay an ndơ. Tal 3 lah mpôl hên uănh khlay ntuh kơl n’hao măy mŏk, ndoh ndơ mhe n’hanh ntrôl dăng mĭn njêng jru gay geh ăp ndơ uĕh tam rlău lơn, tâm di nău ŭch nar lơ âk bah nuĭh dŏng.

Lam n’gor Quảng Ngãi aƀaơ geh 642 ndơ OCOP hôm e nar, tâm nĕ geh 2 ndơ OCOP 5 sao, 46 ndơ 4 sao n’hanh 592 ndơ 3 sao. Rlău ma ăp ndơ way ơm bah tỏi Lý Sơn, quế Trà Bồng, rnôk nglăp nsum n’gor Quảng Ngãi đah Kon Tum ri lŏ mir Quảng Ngãi dơh âk lơn gay hun hao wăng sa lŏ mir.

Mpeh bri, n’gor Quảng Ngãi geh rlău 800.000 ha bri, tâm nĕ, geh 500.000ha bri hôn êng đah âk nkual bri dak nor gay hun hao lŏ mir công nghệ mhe hăn ndrel ăp ndơ geh êng kơt sâm Ngọc Linh, cà phê bri nđĭk, mắc ca.... Aơ lah ndơ geh âk, dơh dŭt têh bah n’gor Quảng Ngãi tâm nău hun haolŏ mir công nghệ hăn ndrel đah nkret njêng jru hvi n’hanh n’hao khlay đah ndơ OCOP bah n’gor. Wa Hồ Trọng Phương, Giám đốc N’gâng kan tuch tăm mât rong n’hanh Ntŭk ntô gŭ âm n’gor Quảng Ngãi an gĭt:

Mpôl hên geh âk nkual bri dak kơt Măng Đen, trôk nar dŭt tâm di an hun hao lŏ mir công nghệ mhe. Mpôl hên geh âk nkual tăm cà phê bri nđĭk, Mắc ca, rlău ma nĕ geh âk nău dơh geh ơm an hun hao ăp ndơ OCOP. Gay hun hao lŏ mir nâp nâl ri mpôl hên dôl kơp uănh, uănh nđôi na nê̆ ăp ndơ nkra njêng gay tâm ôp tâm nchră an UBND n’gor an trong ƀư, nău kơl hun hao lŏ mir nâp nâl, tâm nĕ, hun hao ndơ OCOP lah nkô̆ nău mpôl hên tâm ôp tâm nchră n’gor Quảng Ngãi rgum ntuh kơl m’hâm ƀư tơm n’hanh nuĭh ƀon lan geh bah ăp ndơ bah nơm.

N’gor Quảng Ngãi aƀaơ geh 853 ntil tơm dak si khlay, tâm nĕ 30 ntil geh nău ŭch têh ta ntŭk tăch n’hanh 25 ntil ndơ lĕ dơi tăm, dŏng lam hvi đah khlay wăng sa âk. Dôl uănh ngăn lah đẳng sâm, đương quy, ngũ vị tử, lơn lah sâm Ngọc Linh-ntil tam geh khlay âk nkôp đah ăp ntil sâm êng.

Năm kan 2025-2030, n’gor Quảng Ngãi mĭn kơl lor hun hao lŏ mir hữu cơ hăn ndrel đah ndâk njêng moh êng ndơ tĭng nkual, sŏk tơm dak si ƀư tơm. Tâm nĕ uănh khlay lah sâm Ngọc Linh n’hanh ăp ntil dak si tam gay n’hao khlay wăng sa, mĭn lah trong nchrŏng tam bah n’gor.

Nău rƀŏng lah ndâk njêng Quảng Ngãi jêng ngoăy tâm âk nkual khlay tơm dak si bah lam dak, rgop pă an tơm dak si an nău kan dak si tâm dak n’hanh tăch n’gluh. Aơ mô knŭng lah trong hăn tâm di đah nău geh ơm ma hôm pơk luh dơi hun hao wăng sa nâp nâl an nkual Tây Quảng Ngãi, ntŭk dŭt âk lah ƀon lan rnoi mpôl đêt gŭ rêh. Nău hun hao ndơ OCOP hăn ndrel đah dak si mbra pơk luh dơi hun hao wăng sa nâp nâl an nuĭh ƀon.