Tổng Bí thư Tô Lâm lah rjăp: ntĭm nti, dak si ndrel văn hoá lah n’gâng tơm bah neh dak, nkre lah nkô̆, nkre lah nau nsôih gay hun hao kon nŭih, tu tơm khlay ngăn bah neh dak. Tổng Bí thư ân lah, ăp Bôk nau kan neh dak tâm rơh rlau aơ hôm ntoch jong, tâm ntrŭp, nkhah, ê kloh nkô̆ tơm ndrel ê năl ntŭk kan ndơn nau ƀư.

            Đah dak si, Tổng Bí thư ngăn ngên đă ntrơn nau dơi tơm jêng mât chăm n’hâm soan bôk năp ndrel nau njrăng, rklaih ngăn ăp ntŭk ntu, dak kloh, đăp mpăn ndơ sa, ăp nau tơm njêng luh ji. Lah mô dơi rklaih bah tơm, bol ma ntuh kơl nkra âk ngih dak si kŏ mô dơi geh tŏng ăp:

            ‘Đah dak si, khlay lah mât chăm n’hâm soan bôk năp, ân geh nkra nâp ntop tay. Yơn rnôk aơ dôl lăp khám săm ji, kơt lah dôl ma mpuh n’hât ŭnh dơm, yor nau nchrăp ƀư kan mô nâp ri nau ji lơn âk. Ân năl ăp nkô̆ n’gâng tơm, moh nau dôl hôm nkol? 5 năm tay nơm geh dơi trok dŏng đŏng lah mô? Ân geh ƀư kloh kơt nê. Nau ji hiăn lam ntur neh bu jăng lơi lĕ hôm, gay ân geh ntưp lah roh prăk âk. Viêm gan mhâm ƀư, ntưp rêng mhâm ƀư? Gâp ân lah bôk nau kan neh dak lah ân ƀư tâm ăp nau kan ngăn, ăp nkô̆ nau kan”.

            Mpeh nau kan ntĭm nti, Tổng Bí thư lah rjăp ân ntuh kơl tâm di tâm ntŭk ntu kan, rmôt nŭih, bôk nau nti, dăp rgum tay ngih săm ƀŭt, kơp uănh biên chế tĭng rnoh kon se, tŏng dơi nai ntĭm, ngăn lah nau blau ngơi Anh ndrel nau dơi ntĭm nti ăp môn ma nau ngơi Anh. Tổng Bí thư lah rjăp nau kan ân rƀŏng tâm nau tơm: nŭih ƀon lan geh dơi dŏng lĕ, geh hăn nti, geh n’hâm chăm n’hâm soan, nau rêh đăp mpăn ndrel ueh. Knŭng kơt nê ăp bôk nau kan hun hao mơ geh nau khlay.

            Rgop nau mpeh bôk nau kan ntuh kơl Bôk nau kan neh dak ueh mhe, n’hao nau dơi nâp nau kan ntĭm nti lvang năm 2026-2035, Kruanh Quốc hội Trần Thanh Mẫn ân lah, rnôk aơ dôl ndơn nau tât khuch bah trong kan cách mạng công nghiệp 4.0, nau ntoh luh nau blau njêng mhe AI ndrel nau ŭch nŭih blau nau kan nâp prêh. Ndri ma, nau kan mô êng knŭng nsrŭng tâm nau ntĭm ueh, nti ueh tĭng nau ơm ma ân lah du nau rgâl mpeh nau mĭn ndrel ndơ dŏng ntĭm nti hun hao:

            ‘Bôk nau kan ri ân geh nau uănh jŏ jong, nchrăp mbơh tâm di ma trong hun hao bah nau rêh, ntŭk ƀư kan jêh aơ. Bôk nau kan bah neh dak ri ân geh ƀư ăp nau kan tơm ndal geh nau dơi rgâl âk bah n’gâng kan ntĭm nti. Tĭng gâp lah rgum tâm nau ntrơn rgâl rmô, ntĭm nti nau kan ân nâp nâl lơn mô lah ntĭm nti tâm nkuăl jru, nkuăl ngai gay geh ăp nau kan mpeh tơm prăk tâm di. Tal bar lah ân geh đăp mpăn tu tơm bah tơm prăk gay ma mât, mêt uănh, ƀư kloh. Prăk đê̆ yơn mhâm ƀư nau kan ân ngăch lơn, đăp mpăn lah tâm rnôk ƀư ngăn lah mô geh nau jêng roh rui, mô geh nau tât khuch’.

            Tĭng kruanh Quốc hội, jêh geh Quốc hội ntrŭnh Bôk nau kan ân ơm geh nchrăp ăp nau mbơh nau ntrŭnh ntĭm nti, pă gưl kan ân kloh rvah tâm nau ƀư ndrel pă dăp tơm prăk ân năn. Aơ lah nau kan tơm ngăn tâm nau dôl geh. Êp nê ân geh ƀa ƀơ mêt uănh, uănh nâp. Kruanh Quốc hội lah rjăp, aơ lah bar bôk nau kan bah neh dak geh tât nŭih ƀo lan, lah ƀư ueh ri nŭih ƀon lan mra puăn ndrel, nê lah: ƀon lan gĭt, ƀon lan nchră, ƀon lan mêt uănh, ƀon lan geh dŏng./.