Tâm ndrâm dak Quy Nhơn, âk jêt cán bộ, tahen Hải đội Biên phòng 2 ndrel Đồn Biên phòng mpông đah dak ba dih Quy Nhơn lŏ nchuăn leo 120 tấn phe yor N’gâng kan mêt têm bah neh dak pă ân ƀon lan Gia Lai. Dak rhal mbĕ tâm ao yơn ăp nŭih hôm nsôih ngăn gay ma năn leoh ndơ tât kơl an ƀon lan tâm xã Quy Nhơn Bắc, Quy Nhơn Đông ndrel Tuy Phước, ăp nkuăl geh khuch hô ngăn bah dak bŭk lơh. Trung tá Nguyễn Tùng Giang, Chính trị viên Đồn Biên phòng mpông ndrâm Quy Nhơn, mbơh:

            ‘Phung hên dôl bonh đă ăp ntŭk geh nuih n’hâm lŏng gay kơl an rlau 300 nklâm ndơ, 300 phông, 30 khối dak kơl an ƀon lan tâm nkuăl geh nkol. Rơh tât, phung hên lŏ đă nŭih hăn kơl an ƀon lan plŏ tay nau rêh nâm ơm”.

            Êp nau nsôih ndơn ndrel rdeng leo ndơ kơl, ăp rmôt tahen Biên phòng hôm tât ăp ƀon lan. Tâm xã Ngô May ndrel Cát Khánh, 20 cán bộ, tahen Đồn Biên phòng Cát Khánh tâm rgop ma rmôt kan pă 15 ndeh kơl an rdeng ndơ tât thôn Chánh Hữu, Chánh Định, Chánh Hội ndrel Vân Trim. Du rmôt êng tât trong geh chah đang, rluh neh gay rep neh, lŭ, kơl an ƀon lan leo ndoh ndơ, rep ngih vâl. Thiếu tá Nguyễn Hữu Tự Thắng, Chính trị viên Đồn Biên phòng Cát Khánh mbơh:

            ‘Rnôk aơ, âk trong tơm geh hăn dơi. Đồn Biên phòng Cát Khánh tâm rgop an ăp rmôt kan tâm nkuăl bonh đă ăp ntŭk geh nuih n’hâm lŏng lŏ kơl an ân kônh wa ƀon lan mpeh dak ngêt, ndơ dŏng kan, ndơ sa, dak si ngêt, leo tât tâm ntŭk gay ƀon lan dŏng; rgum rep kloh ntŭk ntu, kuaih n’hong dak bok ân kon se ơm hăn nti”.

            Tâm ngih săm ƀŭt THCS Nguyễn Bá (xã Tuy Phước), Lữ đoàn 573 (Quân khu 5) kuaih dak bŏk, dăp tay nsưng nti, rep jrâu nti, nchrăp nau ueh ngăn ân nau vơt tay kon se hăn nti. Nai Hồ Thị Minh Phụng nkoch:

            ‘Tahen kơl an ngih săm ƀŭt, lah kâp nai ntĭm dơm ri tâm ngih khân păng hôm geh âk nau khuch mô dơi hăn tât kơl ôh. Ndri ma lah ueh ăp rmôt kan tahen hŏ kơl an ăp ngih săm ƀŭt gay ma năn ân ăp kon se hăn nti”.

            Tâm rơh dak lip mhe rlau, âk jêt rbăn rnăk cán bộ, tahen Quân khu 5, Quân đoàn 34 ndrel N’gâng kan rđau tahen n’gor Gia Lai hŏ hăn leo tahen, tâm rgop ma công an ndrel n’gâng kan tâm nkuăl ƀư hăn kơl an, ntrơn leo âk rbăn rnăk ƀon lan luh bah nkuăl khuch, ntrŭnh ƀư âk rbăn rnăk ƀon lan tâm nkuăl geh nau khuch khat ngăn. Rnơm nau lăp kan ngăn ndrel năn nê, bol ma geh nau khuch tât drăp ndơ rlau 1000 rmen, Gia Lai ê geh der nau khuch rmanh âk. Đah nkuăl dak lip Gia Lai, tahen lah nŭih kơl an, lah ntŭk ncing nâp nâl, hăn ndrel ma ƀon lan rlet rlau nau ntul rlong.

            Hôm tâm xã Đồng Xuân, n’gor Dak Lak, Đại tá Nguyễn Trường Sinh, Kruanh Sư đoàn 2, Quân đoàn 5 mbơh, dak lip têh hŏ ƀư djơh khuch lĕ âk ntŭk ƀư nau kan ndrel rnăk ƀon lan. Rnoh nau kan bah tahen kơl an ƀon lan âk rnôk nkre rep kloh, nkre rklaih ntŭk, der hôl khih, nkre kơl an ƀon lan ndâk tay ngih vâl. Đah nuih n’hâm nsôih prêh, rmôt tahen ƀư ơm jêh nau kan geh jao tâm nkuăl dak lip:

            ‘Cán bộ, tahen Sư đoàn 2 đah nau nsôih ngăn, đah mông kan ngăch, mra nsôih ndrel n’gâng kan tâm nkuăl, ăp mrôt tâm ntŭk rklaih ăp nkuăl tơm, ƀư kan âk, gay ngăn leo nau kan bah n’gâng kan, ngăn lah ăp ngih săm ƀŭt, ngih dak si ndrel ăp nau kan bah n’gâng kan, ƀon lan tâm nkuăl plŏ nâm ơm”.

            Đại tá Đinh Văn Hưng, Chính uỷ N’gâng kan rđau tahen n’gor Dak Lak mbơh, jêh ƀư lôch nau kơl an, rnôk aơ ăp rmôt rgum kơl an ƀon lan rep kloh ăp rnăk ndrel ƀon lan, rklaih trong hăn, ndâk tay ngih dak si, nkra nâp ngih lĕ djơh, pă ndơ sa, dak ngêt, ndơ dŏng, dak si, ndơ dŏng dak si, mung phôi, kho ao, ndơ gâm sa gay kônh wa ơm đăp mpăn nau rêh:

            “Nau nsôih ngăn bah cán bộ, tahen bah N’gâng kan neh dak, ăp rmôt kan Quan khu, rmôt tahen tâm n’gor dôl ƀư nau kan tâm nkuăl ri tât rnôk rklaih lôch nau khuch khat bah phŭt dak lip, ngăn lah nau khuch dak lip bah rnôk aơ ri ăp rmôt kan mơ jêh nau kan ndrel dơi hăn sĭt ntŭk kan bah nơm gay ƀư tay nau kan bah nơm”.

            Tâm mih dak lip, rup gui tahen lŏ ntop du tŏ đŏng tâm nuih n’hâm ƀon lan, mô knŭng lah rmôt tahen tâm lơh gay ma mât neh dak, ma hôm lah ntŭk nsing rnơm nâp nâl ƀon lan tâm rnôk mâp nau khuch. Rnôk neh dak bŏk ê năn sơh, rnôk nau rêh hôm pah pât, ăp mpang ty tahen hôm gơih nsôih kơl an tay, ndâk tay ngih vâl, rep kloh ăp trong hăn, gâm sa ân ƀon lan. Tahen kơl an ƀon lan nkuăl dak lip mô knŭng ma n’hâm soan, ma n’ăp tâm nuih n’hâm. Nê lah nau đă tă bah play nuih tahen Wa Hồ tâm rơh đăp mpăn nar aơ./.