Bu ranh K’Keo-Nŭih mât nau ơm ndrel nthoi ƀon lan K’Ho
Thứ bảy, 05:00, 05/07/2025 VOV Tây Nguyên/Nuĭh rblang H'Thi VOV Tây Nguyên/Nuĭh rblang H'Thi
VOV4.M'nông: Bu ranh K’Keo lah nŭih bu rnơm tâm ƀon lan ta thôn Hàng Làng, xã Di Linh, n’gor Lâm Đồng. Păng mro leo trong lor tâm ăp nau kan mât nau ơm, hun hao văng sa ndrel bonh đă ƀon lan tâm rnglăp ndâk njêng ƀon lan mhe.

Năm aơ, bol ma lĕ 70 năm, bu ranh K’Keo mro leo lor tâm ăp nau kan “Ngơi hăn nsum ma kan”. Mpeh hun hao văng sa rnăk vâl, wa geh 2 ha neh tăm cà phê, ăp năm geh rlau 8 tấn cà phê rnglay’ 8 sào lŏ 2 yan, ăp năm geh nklăp 8 tấn ba. Êng nê, rnăk păng hôm tăm nsum ăp ntil tơm tăm êng tâm mir kơt sầu riêng, mắc ca, ƀơ, play đur...Rnơm nê ma rnăk bu ranh K’Keo mô êng “geh ndơ sa ndơ têm” ma hôm kơl an ăp nŭih ƀon lan tâm thôn. Wa mbơh:

            ‘Bah năp nơh kônh wa tâm thôn ê blau ƀư tĭng nau kan tuch tăm mhe, ƀư ba, tăm cà phê ê blau poh phân, mât chăm. Rnăk vâl gâp ƀư bôk năp, rnôk săk gâp nơm, rnăk nơm ƀư dơi geh săk tam ri kônh wa bu kơt tĭng ndrel ƀư tĭng, bah nau dơi blau ƀư, gâp kŏ mbơh ân kônh wa, ŭch kônh wa kơt tĭng kơt nơm”.

            Thôn Hàng Làng geh 384 rnăk (âk ngăn rnoi K’Ho) rnôk aơ hôm 4 rnăk ach o. Nau rêh drăp ndơ nar lơn ma hun hao, nau ueh bah nuih n’hâm ƀon lan lơn ma âk ntil. Wa Ka Lèm, tâm xã Di Linh mbơh, rnơm blau kơt tŏng nau kan bah bu ur ƀon K’Keo, ma thôn Hàng Làng mơ geh nau rgâl mhe ueh:

            ‘Bu ranh K’Keo lah nŭih geh bu rnơm, geh nau ngơi tâm ƀon lan tâm hun hao văng sa rêh jêng, mât nau ơm ueh bah rnoi mpôl. Wa mro gơih tâm ăp nau kan nkoch trêng trong kan bah Đảng, pháp luật bah Ngih dak tât ma kônh wa, ntĭm kônh wa blau ƀư nau kan văng sa tam, bonh đă kônh wa tâm rnglăp tâm dăch dơh gay đăp mpăn nau nâp nâl tâm ƀon lan”.

            Tĭng nau bonh đă bah bu ranh K’Keo, âk rnăk hŏ jăng nau rlu mâl ơm, ndrel ndâk njêng nau rêh ueh, mhe geh nau dơi. Wa nkoch:

            ‘Ndrel ma rmôt ăp bu ranh geh bu rnơm tâm ƀon lan nơm, ri gâp mro nkah đă rnăk vâl, băl mpôl, bonh đă kon sauy sâm kơt tĭng ăp nau ueh, nau mhe gay hun hao, mô dơi ƀư nau kan tih khuch tât kon sau. Hôm n’hâm soan ri nơm hôm ƀư, rgop nau hun hao ndrel Đảng, Ngih dak, ndrel ƀon lan mbơh ntĭm kon sau mhâm ƀư gay hun hao văng sa rnăk vâl, mât nau ơm ueh bah rnoi mpôl, ƀon lan đăp mpăn, du nuih n’hâm tĭng Đảng, Ngih dak”.

            Bu ranh K’Keo lah nŭih gĭt âk nau ơm yau bah rnoi K’Ho. Tâm ăp nau kan ơm kăl e tâm nkual ƀon lan rnoi mpôl đê̆ ta Lâm Đồng, wa kŏ leo bôk rmôt nŭih blau tur chĭng tât râng ndrel geh âk nau nkhôm prêh. Săk bu ranh K’Keo nơm hŏ ntĭm 5 jrâu ntur chĭng ân mom ndăm ndrel druh ndăm tâm ƀon.

            Wa Phạm Văn Linh, rđau kan xã Gung Ré, rnôk aơ lah xã Di Linh, n’gor Lâm Đồng mbơh, bu ranh K’Keo hŏ rgop nau khlay tâm nau kan ndâk njêng ƀon lan mhe tâm nkuăl rnoi mpôl đê̆ bah ƀon nơm:

            ‘Wa lah nŭig geh nau blau, geh nau dơi tâm mbơh ngơi nkoch ntĭm kŏ kơt lah bonh đă ƀon lan tâm nau kan bah Đảng ndrel Ngih dak, ŭch nkoch trêng bonh đă ƀon lan kơt jut lơi nau rluk mâl ơm mô hôm tâm di ma nau rêh mhe ndrel ƀư ueh ăp nau vay ơm bah rnoi K’Ho. Bu ranh K’Keo ƀư ueh ngăn nau kan aơ”./.

           

VOV Tây Nguyên/Nuĭh rblang H'Thi

Viết bình luận

TIN CÙNG CHUYÊN MỤC