Ta ăp rơh tâm mâp bâh đại biểu Quốc hội ta Lâm Đồng, ƀon lan dăn đă an geh pă nău kan, nău dơi kan na nê̆ đah n’gor n’hanh xã rnôk geh ƀư n’gâng kan 2 gưl, ngăn lah mât đăp mpăn nău dơi pă săm ƀŭt kơp dơn dŏng neh an ƀon lan. Đă an bah sŏk dŏng ndơ tâm neh đah công nghệ mô tâm di ƀư khuch djơh ƀô ntŭk gŭ rêh, uănh nđôi mplŏ sŏk neh bri ê hŏ geh tă dŏng, pă tay an ta ntŭk, n’hanh an lor gay ma ntuh kơl n’hao mhe ndơ dŏng ntung trong. Bu ranh ƀon Liêng Jrong Ha Bri, ta thôn 1, xã Lạc Dương, n’gor Lâm Đồng nkoch.

 “Âk ƀon lan ta aơ lĕ an ŭch geh pă săm ƀŭt dŏng neh yơn aƀaơ xã he hôm nha ê hŏ geh dơi ƀư, đă Quốc hội uănh n’hêl n’hanh doh rklaih yor nĕ lah nău ŭch bâh ƀon lan. Nău tay lah an geh uănh n’hêl tay na nê̆ dnơ rlăm, ndơ mô geh mbơh dăn, aƀaơ gâp saơ âk ngăn ndơ rlăm, phân poh rlăm đŏng, cà phê rlăm đŏng. Đă ngih dak an geh uănh nđôi na nê̆ tay nău nĕ an ƀon lan đăp mpăn”.

Ta ăp rơh tâm mâp ƀon lan ta ăp ntŭk mpeh luh nar bâh n’gor Đăk Lăk n’gor Phú Yên ơm geh mpôl đại biểu quốc hội n’gor Đăk Lăk ƀư đah trong kan trực tiếp ta ntŭk tơm lah phường Tuy Hòa n’hanh tâm rgop đah ăp ntŭk tâm ƀoh ăp xã, phường, Đông Hòa, Sông Cầu, Tuy An Bắc, Phú Hòa 1, Tây Hòa, Sơn Hòa, Sông Hinh n’hanh Đông Xuân. Ăp ƀon lan kơp dơn nău dơn kan bâh Quốc hội, nkre lah mpơl nău ŭch Đăk Lăk ơm geh nău ntrŏng hun hao mhe lôch lăp kan ndrel. Ƀon lan Võ Ngọc Hiền Minh, ta phường Tuy Hòa, n’gor Đăk Lăk an gĭt.

 “N’gor Đăk Lăk ơm geh âk nău ueh êng mpeh nău ueh Tây Nguyên, tâm rnôk Phú yên lah nkual duyên hải miền Trung ntoh lư. Nău nglăp nsum, tâm rnglăp mpeh nău ueh êng đah dak lêng n’hanh yôk bri mbra pơk rơh hun hao dŭt têh an n’gor Đăk Lăk mhe. Ŭch n’gâng kan ăp gưl mât uănh, ntĭm đă ngăch gay ma rdâk njêng n’gor ăp nar lơ ma têh ndrŏng, nău rêh ƀon lan lơ ma ueh lơn”.

Tâm rnôk nĕ, ƀon lan ta ăp xã mpeh nhâp nar Đăk Lăk mpơl nău ŭch kơl an nău kan n’gâng kan 2 gưl geh leo kan bâh bôk khay 7 tât aƀaơ. ƀon lan đă an geh n’hao rnoh kan, leo kan nti nău blău leo kan an mpôl cán bộ ntŭk kan ba dâng, ntuh kơl ndơ dŏng ntung trong, năp ăp ntil ndơ công nghệ kơl an nău leo kan, mât uănh gay ma mât đăp mpăn săk rnglăy der geh âk jâk nău kan gưl xã, ngăn lah nău kan mât uănh neh ntu lôch rnôk ƀư tĭng trong kan n’gâng kan ta ntŭk 2 gưl.

Ntoh ngơi ta rơh tâm mâp, wa Nguyễn Thị Thu Nguyệt, groi kruanh Đại biểu Quốc hội n’gor Đăk Lăk đă ăp gưl kan n’gâng kan bâh n’gor tât ntŭk kan ba dâng an geh ƀư tĭng răng dăng ăp nghị quyết bâh trung ương, ngăn lah nghị quyết mpeh pă dăp leo ƀư nău kan, bâh nĕ doh rklaih ueh nău dơi bâh doanh nghiệp n’hanh ƀon lan.

“Đă UBND n’gor Đăk Lăk an geh uănh nđôi tay, ndŏ ăp trong kan doh rklaih kan na nê̆ gay ma ƀư lôch nău mpŏng hun hao 8% tĭng nău ntĭm đă bâh chính phủ tât năm 2025 nkre lah nsrôih an geh nău ngăch hun hao 2 rnoh mbrô ta rơh let năp tay. Gay ma dơi ƀư nău aơ, đă mbơh an geh nkre đăp mpăn leo kan ngih dak, nkre pă nău kan, pă nău dơi na nê̆, an ƀư lôch, pă nău kan na nê̆ an ntŭk kan, mât đăp mpăn nkô̆ mpŏng hun hao nâp nâl n’hanh tâm di đah nău dơi”.

Tâm nău ƀư tơm, kloh rjăp n’hanh rdâk njêng, rơh rƀŭn nchră tâm mâp ƀon lan bâh ăp mpôl Đại biểu Quốc hội n’gor Đăk Lăk n’hanh Lâm Đồng lĕ nsĭt tay nău ueh nsrôih. ăp đại biểu Quốc hội, ndơn kan ăp ntŭk n’hanh ăp n’gâng kan lĕ kơp dơn, mbơh rblang âk nkô̆ nău tơm khlăy, lah na nê̆ mba geh djăt tay n’hanh hăn ndrel đah ƀon lan tâm  rnôk rdâk njêng ta ntuk an hun hao ngăch, nâp nâl.