Jay văn hóa ƀon Tơng Jŭ, phường Ea Kao n’gŭr răm nteh chĭng, n’hanh nău njroh mrơ xoang way ơm, nchrăp wơt mpôl năch tâm yan pâl nđaih bôk năp jêh nglăp nsum. Đah nteh n’gŭr răm, wa H’Yam Bkrông-Giám đốc Hợp tác xã cheh tanh Tơng Bông, kruanh rmôt pâl nđaih nsum mpôl ƀon Tơng Jŭ-ntô̆ n’hao yor lĕ 10 ƀon geh nsum trong uănh mpeh mât uĕh nău kan way ơm. Nău boăt nthoi nău geh bah ăp ƀon gay hun hao pâl nđaih nsum mpôl lĕ dơi ndơ̆ tâm nghị quyết Đại hội Đảng bộ phường.

Mpôl hên geh trong hăn gay nău kan bah nơm dơi mât ndrăy ri pơk jrô nti nău kan way ơm, tal 2 tay lah hun hao pâl nđaih nsum mpôl ri kônh wa ndrel ƀư, gay bu tât ƀư ngăn nău way ơm bah he kơt cheh tanh, n’gôn ndrănh, trah mon, ƀư ngăn ƀư ƀon lan kan lŏ mir jêh nĕ văn hóa chĭng gông, ndơ ngêt sa. Rnôk ma nglăp nsum mpôl hên saơ rnoh ƀon lan rnoi mpôl đêt ntop tay 2 ding tâm rgop ndrel mbra têh dăng lơn.

Tĭng dự thảo mbơh an Chính trị Đại hội Đảng bộ n’gor Đắk Lắk rơh tal 18 năm kan, 2025-2030, n’gor mbra hun hao dăng ăp ndơ pâl nđaih tơm, geh nău dơh kơt pâl nđaih sinh thái dak lêng-bri ta ăp bri ngih dak, ăp nkual mât ndrăy ndơ geh ơm, hun hao ndơ pâl nđaih nsum mpôl, lŏ mir n’hanh thôn ƀon; ƀư ngăn nău kan way ơm. Wa Nay Khang, nuĭh Êđê, thôn Độc Lâp B, xă Suối Trai, n’gor Đắk Lắk nsing nơm thôn nơm mbra dơi geh đah trong rƀŏng hun hao bah n’gor mhe, rnôk gŭ ta trong si glê ntŭk ntô-lŏ mir bah ăp nkual sầu riêng têh hvi ta mpeh bah lơ Đắk Lắk, boăt nthoi nkual mât ndrăy bri Ea Sô, n’glău Sông Ba Hạ, nkual mât ndrăy Krong Trai n’hanh jŭr hăn dak lêng Phú Yên:

Nglăp nsum lah di ngăn gay pơk hvi ntŭk ntô an tâm nđŭr hun hao wăng sa, geh bri, geh yôk, geh dak me, geh dak lêng gay hun hao nău rêh kônh wa rnoi mpôl đêt gay ntơm hao. He jêng rach năm mhe hôm, rach năm hao êng nơm bah rnoi nuĭh.

Kơt wa Nay Khang đŏng, wa Sô Văn Sứt, rnoi nuĭh Chăm H’roi, nuĭh nsing nơm thôn Ma Y, xă Sơn Hòa an lah, nău nglăp nsum lĕ ƀư ăp ƀon lan bah bri tât dak lêng jêng dăch dêh lơn. N’hanh tă bah dăch dêh nĕ, ƀon lan mbra geh âk dơi hun hao:

Kăl e nglăp nsum đŏng Khánh Hòa, Phú Yên, yơn rnôk nĕ nău geh ntung trong, nu nău tâm ôp tâm ngơi mô hŏ hun hao, tât aƀaơ rgâl mrô lĕ kon nuĭh ri gâp mĭn jêng uĕh lơn. Lơ tâm êp nsum n’hanh ntop tay nău kan ƀư sa hun hao ri lơ nâp nâl, ngăch lơn gay hun hao neh dak hao prêh mhe nkôp đah bah năp.

Nău răm sĭt nsum du jay têh Đắk Lắk mô knŭng nău rhơn ta năp du trong nsôih geh nău cách mạng, pơk luh dơi hun hao mhe. Tĭng wa Cao Thị Hòa An-Groi Bí thư Rnâng kan N’gor ủy, Kruanh HĐND n’gor Đắk Lắk, aơ hôm lah săk rnglăy bah nău lap têh bâh âk năm tâm lơh tâm su. Wa An nkoch nău rhơn rnôk râng Đại hội Đảng bộ xă căn cứ cách mạng Yang Mao:

Jêh râng Đại hội, gâp jŭr saơ geh du hê bu ur lĕ rlău 80 năm n’hanh geh huy hiệu 60 năm Đảng, wa tât đah gâp, wa lah: Kon lah, mê̆ tăng kon lah Phú Yên, mê̆ rhơn ngăn n’hanh mê̆ dŭt răm dơi mâp kon. Tăng mĕ lah, saơ play nuih gâp răm, dak măt luh. Mê̆ lah tay ta tâm lơh tâm su, Đắk Lắk-Phú Yên dŭt tâm rnglăp, mê̆ geh âk đồng chí lah nuĭh Phú Yên jêng mê̆ ŭch nuĭh Phú Yên ngăn kon ah. Nĕ lah nuih n’hâm bah nău tâm rnglăp, bah rgum nsum n’hanh bah nău nsing nơm jru đah nău way ơm bah ăp rơh.

Nău nglăp nsum hành chính ta Đắk Lắk dôl an saơ săk rnglăy mô knŭng ta samƀŭt, ma tâm tĭng nău rêh bah nuĭh ƀon lan. Bah ăp ƀon lan jru ngai âk km, aƀaơ nsum du jay, nuĭh ƀon lan mô knŭng êp n’gâng kan lơn, ma hôm tâm êp ndrel, ndrel tâm pă nău geh, ndrel pơk trong hăn ƀư sa mhe. “Ngih jay têh” Đắk Lắk yor rĭ jêng ntŭk nsing nâp nâl an ăp nsum mpôl ntŭk aơ./.