Lôch rơh mih dak buk têh ta pit dak me Đa Nhim, nô Nguyễn Quốc Bảo, ta xã Đơn Dương, Lâm Đồng, hôm nha mô hŏ bah phit klach.  Ntŭk jay bil 4 rbăn mét vuông đah rnoh kholăy rlău 1,6 rmen prăk bâh rnăk vâl lĕ geh dak rdu. Nô ngơi.  “Nău nsrôih bâh âk nău tă rgum geh kan lĕ ntuh kơl ta aơ rĭ aƀaơ lah gâp mô hôm geh prăk gay ma pah kan tay. Aƀaơ gâp ƀư tay lah ntơm tuh neh ƀư jay dŭt roh hoach ngăn”.

Ăp rnăk tăm biăp tĭng trong kan way ơm dăch dak me Đa Nhim lĕ dôl geh dâk hao lôch dak buk. Dŏng cuk ƀư lĕ ma ôi mơ geh kuĭh tay bar pe jât met trong ding tŏ dak, nô Hồ Việt Linh, thôn Tân Lập 1, xã Ka Đô, an gĭt, rlău 6 rbăn mét vuông xà lách bâh rnăk dôl geh nchrăp  dŏng rĭ geh dak rdu lĕ rngôch. Neh choih brôi ndâp geh ntŭk tât 1 met. ndâk nsơm tay nău pah kan nkre ma hoach nar hoach soan nkre hoach prăk.“Ntŭk i roh, ntŭk geh brôi ndâp lĕ rngôch. Aƀaơ lah ƀư tay bâh ntơm dơm. Hôm ndơ i klen rĭ he dŏng lĕ dơm ndơ i mô hôm lah roh, khuch rĭ ƀư tay. Aƀaơ ƀư tay bec, rse, ăp ntil dĭng tŏ. neh rĭ mô hŏ dơi tăm ih an sơh mơ dơi ƀư tuch tăm tay”.

Roh nsang lah nău dŭt tâm di ntơ an nkual geh tăm âk biăp, bum play dăch dak me Đa Nhim let ăp xã: D’ran, ka Đô, Đơn Dương, Quảng Lập bâh n’gor Lâm Đồng. Ndrel đah rnoh neh ăp ntil biăp dôl geh rôk, khuch khat âk ngăn đah nuĭh tăm biăp công nghệ mhe ta nkual aơ yor trong ngih jay bil, jay jal đah nău ntuh kơl an 1 rbăn mét vuông hao tât rhiăng rkeh prăk.

Ta năp nău khuch khat bâh nuĭh tăm biăp, n’gâng kan tuch tăm n’hanh n’gâng kan ăp xã tơm pah kan tăm biăp kao bâh n’gor Lâm Đồng lĕ mbơh tơih nău kan khuyến nông, an manh prăk tuch tăm gay ma kơl an ƀon lan ndâk nsơm nău khuch gay ma tuch tăm tay.  Wa Trần Hùng Dũng, kruanh UBND xã Đơn Dương, n’gor Lâm Đồng an git. “Năp lor xã an geh rgŏ jă tay ƀon lan leo kan rgâl mhe tay rnoh neh geh khuch khat tâm rơh dak buk mhe nơh n’hanh uănh săch ntil tơm tămj an tâm di. Ngăn lah  kơl an Tết Nguyên đán săch ntil tơmk tăm, ăp ntil biăp gleh nar gay ma ngăch kơl dŏng ta rơh tết Nguyên đán. Mpeh jŏ jong mbra geh ƀư tay an ueh neh n’hanh geh nău mpŏng hun hao jŏ jong gay ma geh nău nchrăp kan na nê̆ n’hanh mbra geh rgum ăp rnoh kan êng gay ma ndâk nsơm tay ntŭk tăm biăp bâh xã Đơn Dương.

Khoa Điềm/VOV - Tây Nguyên