Lah nuĭh nsing nơm ta thôn Hiệp Đoàn, xă Ea Mdroh, n’gor Dak Lak, wa Bàn Tôn Nhất mô knŭng dơi kônh wa rnê yor nău hăn lor tâm nău rêh, ma hôm yor ăp nău rgop nâp nâl tâm trong kan rgŏ jă ƀon lan. Bah nău nkoch trêng nău ntrŭnh, nău kơl bah Đảng, pháp luật bâh Ngih dak tât rgŏ jă Ƀon lan mât rnă njrăng đăp mpăn, jŭt jăng nău rluk mâl, ndâk njêng nău rêh uĕh lăng, ntŭk geh nău, ntŭk nĕ geh jâng wa. Nkoch mpeh nău kan bah nơm, wa Nhất an gĭt: Nău bah nuĭh dơi nsing nơm ri lah an ƀon lan wât, ƀư an ƀon lan djăt, gay kônh wa tâm rnglăp ndrel, ƀư sa, mât ƀon lan đăp mpăn.

 Ndrel đah rmôt rnă njrăng, ban mât uănh thôn ƀon đah chi bộ gâp rgŏ jă ƀon lan tĭng ăp pháp luật n’hanh mât đăp mpăn tâm thôn ƀon. Gâp ƀa ƀơ rgŏ jă ƀon lan rnoi mpôl đêt ta nkual mô djăt tĭng nău nuĭh mhĭk. Tâm rnôk gâp rgŏ jă kônh wa ta aơ 100% rnăk lah tĭng da dê, du nuih n’hâm tĭng Đảng.

N’hêl na nê̆ an saơ, ta ăp ntŭk geh nuĭh nsing nơm pah kan dŭt n’hâm, ntrong leo ƀon lan hun hao nâp nâl. Nuĭh nsing nơm mô knŭng rgop rêng hvi ăp nău ntrŭnh têh bah Đảng n’hanh Ngih dak tât đah ăp rnăk, ma hôm kơl gưl ủy, n’gâng kan ƀon lan ngăch gĭt nău ŭch, mpŏng kơch bah Nuĭh ƀon lan. Bah nĕ, nău nkra trong ntĭm rđău mbra tĭng đah nău ngăn bah dâng lơn, jêng nău ŭch ndrel kon nuĭh bah tu tơm dâl. Wa Lê Văn Chiến, Kruanh thôn Hiệp Hòa, xă Ea Mdroh, n’gor Dak Lak djôt dơn:

Băng: Nuĭh nsing nơm tâm thôn geh nău tơm lah dŭt khlay. Ăp rnôk geh rơh rƀŭn, nar mâp ƀon lan bah HĐND n’gor, Hội đồng nhân dân xă n’hanh tâm thôn geh moh nău khlay ri nău ngơi, nsing nơm bah khân pơng dâk hăn kơl gâp dŭt âk. Kơl gâp dơi jêh lĕ n ău kan, nău ƀư bah nuĭh kruanh thôn.

Tĭng wa Nguyễn Thị Thu Hồng, Kruanh UBND xă Ea Mdroh, n’gor Dak Lak, lam xă aƀaơ geh 19 nuĭh nsing nơm. Khân pơng ăp laih ty jong bah n’gâng kan ƀon lan tâm trong kan rgŏ jă ƀon lan, mât rnă njrăng đăp mpăn n’hanh tĭng hun hao wăng sa-rêh jêng ta ntŭk. Nuĭh nsing nơm ta Ea Mdroh lĕ mât uĕh nău ƀư mbơh nău, tiăr nti pháp luật, nău ntrŭnh, tât ƀư tĭng tŏng ăp nău kơl tĭng nău ntrŭnh. Năm tât, ƀon lan uănh khlay tay ƀư tơm bah nuĭh nsing nơm hăn ndrel đah ăp bôk nău kan hun hao wăng sa, n’hŭch ach o nâp nâl, mât njrăng bri, ndâk njêng thôn ƀon mhe n’hanh mât njrăng bri dak-rnă njrăng ta ntŭk. Wa Nguyễn Thị Thu Hồng mbơh:

Tâm năm tât, đah nău ƀư tơm n’hanh ntŭk gŭ dŭt khlay bah rmôt nuĭh nsing nơm, UBND xă mbra pơk ăp jrô tiăr, ntop tay gay n’hao đah nău blău kơt nkoch trêng tay ăp nău blău mhe, ăp nău ntrŭnh mhe gay khân pơng trêng ntĭm tay an nuĭh ƀon lan. Tal 2 tay lah mbra uănh kơl âk lơn tay, mbra nkoch ăp nuĭh nsing nơm gay bah nĕ nuĭh ƀon lan dơi nti n’hanh ƀư tĭng.

Bah ăp nău ƀư na nê̆, ngăn ngên ta thôn, ƀon, ăp nuĭh dơi nsing nơm-ăp “Ntŭk nsing nâp” tâm ntŭk gŭ rêh ăp rnoi mpôl đêt ta Dak Lak dôl rgop mât nâp “jâng nsan nuih n’hâm ƀon lan”-n’gâng tơm khlay an nău hun hao nâp nâl ta ƀon lan. Yor bah nău dŭt n’hâm, lĕ đah nău kan n’hanh nsing nơm nĕ, tâm rnglăp têh lam rnoi nuĭh dơi nâp rjăp, rnă njrăng bah dâng dơi nâp nâl, jêng trong bôk năp gay nkual ƀon lan rnoi mpôl đêt Dak Lak hao tay tâm lvang mhe.