Lơ 17/8, ta phường Pleiku, n’gor Gia Lai, Rmôt Doanh nhân druh ndăm Việt Nam ƀư Rwăch tâm nchră rkum Nam Trung Bộ n’hanh Tây Nguyên tâm trôm Rƀŭn nchră wăng sa ƀư êng Việt Nam 2025, đah tât râng bah 200 doanh nghiệp. Ta rƀŭn, ăp doanh nghiệp dăn đă rgum tâm 4 rmôt nău têh. Mpeh trong ƀư, doanh nghiệp đă ơm an mã ngành an ndơ geh êng, rgâl dơh samƀŭt samtra đah nău nchrăp ƀư điện măt nar, an mrô nkual tăm, ƀư tâm rlong kơp dơn ndranh tach neh ntu n’hanh dôh rklaih jêr jŏt sŏk dŏng neh.

Mpeh prăk, dăn đă mbơh prăk manh kơl an ntơm ndâk njêng nău kan, an manh êng an dŏng jŏ jong ndơ lŏ mir n’hanh nău kơl an prăk soăy an doanh nghiệp công nghệ. Mpeh ntung trong ngih wâl, âk nău rgop dăn đă dăp rgum ntŭk sạc pil ndeh điện, ntuh kơl logistics, ntŭk mâp prăp nđik n’hanh nkra ăp trong hăn tâm nkual. Rlău ma nĕ, nsum mpôl doanh nghiệp mpŏng ŭch ăp n’gâng kan, nău kan n’hanh ƀon lan uănh tât hun hao si glê ntŭk ntô rdâk njêng nău kan công nghệ, ntĭm nti nuĭh kan mrô n’hanh ntrôl dăng nkoch mbơh mĭn ƀư mhe gay n’hao moh êng ndơ lŏ mir.