Tâm ngih rƀŭn rgum ƀon Jarah, xã Nâm Nung, n’gor Lâm Đồng, nar ntim tur chĭng bah rnoi Bunong rgum âk ngăn nŭih tât râng. Tâm nah ao ueh, nau njroh ueh, ăp nŭih dôl ma tĭng nau nteh chĭng tă mơng “Tet tơ ndơ”. Bu ranh Y Xuyên, nơm dôl ma ntĭm:

“Gâp nau ơm ueh tă bah kăl e kơt lah chĭng, gonh, tanh njuh. Ta aơ kŏ ntĭm nti ndrel mât ăp ndơ sa kah bah rnoi Bunong kơt lah byăp bri, gâm ma ka ndrel blên, djêl ndrel mrăch hăng...hôm geh bu ŭch sa mro. Gâp pơk 2 jrâu ntĭm tur chĭng ndrel nkra n’gâng njuh. Kon sau râng âk ngăn, geh khuh răm ndrel djăt kơt ngăch. Ur gâp ntĭm tanh njuh. Ăp oh nur kŏ râng âk ndrel ŭch ngăn”.

Bu ranh Y Xuyên ntoh nau rhơn nkoch tât ƀon Jarah, xã Nâm Nung lah nkuăl căn cứ cách mạng tâm rnôk tâm lơh, lah ntŭk mât nau ơm ueh bah rnoi Bunong. Ăp rnăk vâl hôm mât rlau 20 bor chĭng, vay rânh ƀư ăp nau kan ơm. Kônh wa mât nau tanh dông, tanh sah. Ăp ngih kŏ geh ndrănh yăng bah rnoi Bunong. Hôm săk nơm, bu ranh Y Xuyên nkoch lah: jêh rnôk geh rklaih đăp mpăn, wa ƀư nai ntĭm nti, jêh nê ƀư Kruanh côg an xã, Groi Kruanh Uỷ ban xã, groi Bí thư Đảng uỷ xã, jêh nê ƀư Kruanh Uỷ ban MTTQ xã tât năm 2008 ri rlu ranh. Nau ma wa nkah ngăn lah rnôk geh lăp Đảng, bah rnôk aơ 40 năm:

“Gâp geh lăp Đảng năm 1982. Gâp nsôih chiărr nti, kơt ntĭm nti mô nsrŭng. Jêh rnôk nti nau ƀư nau kan công an jêh nê gâp ƀư Kruanh công an xã. Rnơm nau geh dơi bah nơm, ri ngih dak mơ đă ƀư aka nau kan. Gâp kơt tĭng ƀư ueh ngăn ri mơ dĭng geh dơi đảng viên kloh, nâp dănh. Nau kan ngih dak jao, ƀư nau kan ueh, ri ngih dak mơ geh rnê nkhôm”.

Rlau 30 năm pah kan, jêh ri bơi tât 20 năm rlu ranh, bu ranh Y Xuyên hôm nkah nau ntĭm nti bah Wa Hồ:

“Gâp nkah mro nau ntĭm bah wa Hồ mô dơi sa nkhiăn, ƀư tih. Nơm lah Đảng viên ri ân geh kloh. Ntơm bah sa ơm tât nrôk aơ, gâp hôm nsôih nkoch trêng ân kônh wa nau nê. Kon sau nơm rêh ân tâm rnglăp, nsôih pah kan văng sa. Kon sau nơm mô dơi tâm gŭ ur sai bah ơm, kon se mô dơi rlu nti, ân kơt tĭng pháp luật, mô dơi ƀư tih. Kônh wa ta aơ djăt tĭng Ngih dak, tĭng nau wa Hồ ntĭm ri mơ hun hao nâp nâl”.

Wa H’Thương, Kruanh Ban Văn hoá xã hội tâm HĐND xã Nâm Nung, n’gor Lâm Đồng mbơh, bu ranh Y Xuyên lah nŭih geh bu rnơm ngăn ngên tâm xã tâm ƀon:

“Bu ranh Y Xuyên hŏ rlet âk nau kan, ƀư âk nau kan êng êng hôm. Bu ranh gĭt âk nau ngăn, ri ma mro lah nŭih leo trong ndrel ntĭm nti ăp nau. Tâm ƀon lan, păng ntĭm kônh wa tăm cao su, cà phê, tiêu ndrel ntĭm tur chĭng, mprơ, tanh dônh, tanh sa, ƀư n’gâng njuh...gay ma ntĭm nti ân rơh mom nau vay ơm. Sở Văn hoá pơk jrâu nti tanh njuh, ur bu ranh nơm kŏ nti nkre ân oh nur. Lĕ 2 hê ur sai mro leo trong tâm nau mât nau vay ơm. Păng hôm ntĭm nti bonh đă druh ndăm tâm ƀon mô dơi nchoh ndeh hăn ngăch, mô ngêt ndrănh, mô tâm gŭ ur sai bah ơm”.

Đah rlau 40 năm Đảng, bơi tât 80 yan mir, bu ranh Y Xuyên hôm lah nŭih leo trong tâm ăp nau kan ndrel ŭch ma ăp nau kan ntĭm mbơh nau khlay ueh lăng bah rnoi Bunong ân ăp rơh kon sau nơm ba kơi./.