Kêng măng 23/7, tâm rnôk hăn khâl Senegal, Kruanh Quốc hội Trần Thanh Mẫn n’hanh Kruanh Quốc hội Senegal El Malick Ndiaye hŏ ndrel râng tâm nchră trong kơl gay ntrŭt ntrôl tâm boh bar ding. Kruanh Quốc hội Trần Thanh Mẫn an gĭt, Việt Nam săk geh âk mbra dơi tâm boh đah Senegal kơt: tuch tăm mât rong, viễn thông, ndơ dŏng mbrô, lôk joi loih kông, mât tui ka, rdâk njêng n’hanh hun hao ntŭk ntô ndơ dŏng.

Kruanh Quốc hội Trần Thanh Mẫn mpơl nău nsing nơm ăp n’gâng kan, ăp doanh nghiệp bar dak Việt Nam n’hanh Senegal mbra nsrôih ntrŭt ntrôl tâm boh bar lơn ma jru hvi, geh nău tam. Păng dăn đă bar ding n’hao dăng kan nsum gay ntop kơl doanh nghiệp Việt Nam tât ntuh kơl ta Senegal, nkre mpŏng Quốc hội Senegal nta trong dơh an nău kan ntuh kơl. Quốc hội Việt Nam mbra ntop kơl doanh nghiệp Senegal ntuh kơl ta Việt Nam tâm ăp trong kan săk geh đŏng.