Rơh rƀŭn nchră geh trực tuyến tât 34 n’gor, nkuăl ƀon têh bâh Trung ương, 3.321 xã, phường, đặc khu ta lam dak. Thủ tướng lah na nê̆, nău tât bâh rgâl trôk nar mih sial ƀư an trôk nar, mih sial lơ ma geh nău jêr lơn, nău mô ueh, jêr uănh năl, đah phŭt mbrô 3 Wipha năm aơ, bol ma ăp gưl kan, ăp n’gâng kan, ăp ntŭk kan lĕ leo kan mbơh tơih gay ma ƀon lan gĭt njrăng der tâm rdâng đah phŭt, bah ir geh nău khuch khat. Yơn lah, phŭt lĕ tât ta Nghệ An đah rnoh mih dŭt têh ƀư khuch khat dŭt âk. Thủ tướng đă pă nău kan, dơn nău kan mbơh ôp nău, ntĭm leo njrăng rdâng phŭt sial an tâm di, pă nău kan an ăp nuĭh kan ndrel bâh rnâng kan ntĭm leo đah nău mĭn gĭt nuĭh, gĭt kan, dơn kan na nê̆, gĭt na nê̆ nău ueh ngăch, nău geh dơi, nău dơi kan, bâh nĕ gay ma nduĭh rmal, uănh năl di đah nău ngăn. Thủ tướng đă n’gâng kan ta ntŭk 2 gưl ƀư tĭng ueh nău kan njrăng rdâng phŭt sial n’hanh vơt joi nuĭh rmanh.