Tâm ăp nar bah năp, ta Ntŭk rhŏ an hành chính công Đặc khu Phú Quý geh ăp nuĭh kơl kan tât ntop kơl nuĭh ƀon lan. Ndrel đah ăp băl druh ndăm êng, Mai Nguyễn Anh Khoa, kon hŏk jrô 11A3, ngih samƀŭt THPT Ngô Quyền dôl ntĭm, ntop kơl nuĭh ƀon lan dăn nchih, dŏng tài khoản định danh điện tử; ƀư ăp samƀŭt hành chính ta ntŭk mrô, Khoa an gĭt, oh lah nuĭh kơl kan ta aơ 2 pơh aơ n’hanh lĕ ntop kơl geh 10 samƀŭt rhăch nău. Nău kan mô jêr yơn joi an geh nău rgum âk, lah mô blău lŏ ƀư bah ntơm, roh mông.

Mpôl oh kơl ăp u, che nchih ăp nu nău tâm ntŭk mrô, gay tât ngân hàng sŏk prăk ntop kơl ăp khay. Dŭt âk ntop kơl ăp nău geh tât ndrôm samƀŭt rnăk wâl, năl tay di rnăk ach o đŏng lah mô gay ntop kơl bah Đặc khu.

Mĭn lvang bôk năp bah nău pơk dŏng n’gâng kan ƀon lan 2 gưl mbra mâp âk jêr jŏt ngăn, yor nê, kruanh đặc khu lĕ uănh jru hvi n’hanh ƀư an tâm ban âk ƀư tĭng. Wa Đỗ Thái Dương, Bí thư Đảng ủy Đặc khu Phú Quý an gĭt, tât aƀaơ đặc khu lĕ đăp mpăn rdâk ƀư n’hanh mbra lôch jêh tay n’gâng kan, ngăn lah ta ăp ntŭk hôm e mô tŏng. Đặc khu tŏng ăp ndâk njêng geh n’gâng kan đêt dơh ngăch tŏng ăp, nău ƀư săk rnglăy, ăp cán bộ, công chức an rgum n’gang bah ƀon lan.

Du nău khlay bah đặc khu lah ndâk njêng du rmôt cán bộ liêm chính, blău kah gay ƀư lor an ăp năm bah năp tay, hun hao đặc khu tâm nar tât.

Đặc khu Phú Quý mĭn, wăng sa dak lêng mât tơm tay, hăn ndrel đah pâl nđaih, tăch rgâl-rhŏ nău. Nsrôih tât năm 2030, rĭng geh bôk nuĭh geh 77 rkeh prăk, nkôp đah năm 2025 hao 1,22 tơ̆; ndơ geh tui ka geh 30.000-35.000 tấn/năm... Tât aƀaơ, lam đặc khu geh 1.740 bôk tàu ka đah 7.566 nuĭh pah kan, tâm nĕ geh 634 tàu ka têh bah 90CV let lơ. Du nghiệp đoàn nău joi ka pah kan dŭt săk rnglăy, hăn ndrel đah ntop kơl, wơt kơl n’hanh mât njrăng ƀư tơm gôl dak.

Đặc khu aƀaơ geh 1 ntŭk nkra duk mpan, 4 ntŭk rhŏ nău kơl; Ndrâm dak n’gâr rdêng bah dâng 1.000 tấn, geh soan njưh 150 tàu ka; ndrâm dêr ndê phŭt dơi ntuh kơl jêh (lvang 2), dĭng lĕ rnoh ntuh kơl rlău 446 rmen prăk. Mhe aơ, hăn uănh du đêt ndơ ƀư ta gôl dak Phú Quý kơt: nkual njưh dêr phŭt; ntŭk ndâk ƀư ndơ njrăng dak rchoh pĭch rlâm kơh dak lêng mpeh bah lơ gôl dak... Kruanh UBND n’gor Lâm Đồng Hồ Văn Mười an gĭt:

Gâp an lah nău ntrŭnh bah N’gâng kan tuch tăm m’hânh rong n’hanh hun hao ƀon lan bah năp đaơ aƀaơ lah N’gâng kan tuch tăm mât rong n’hanh ntŭk ntô gŭ âm ntrŭnh ndâk ƀư ndrâm dak aơ lah dŭt khlay. Rlău ma nău dêr phŭt an hang rbăn tàu ka rnôk geh nău tât phŭt lăp ri aơ hôm lah ndrâm âk ntil nău dŏng rhŏ an nău hun hao wăng sa dak lêng.

Đah dŭt âk nău dơh tâm joi ka, mât tăm, rwăt n’hanh nkret njêng tui ka, Thủ tướng Chính phủ uănh an Bôk nău rgop an tâm nchră ndâk ƀư gôl dak Phú Quý Ntŭk joi, rhŏ nău, kơl năp nău kan joi ka, tâm rgop joi wơt kơl rmanh ta dak lêng. Nău rƀŏng bah Bôk nău an tâm nchră, tât năm 2030, ndâk ƀư gôl dak Phú Quý jêng ntŭk joi, rhŏ nău kơl năp nău kan ka, tâm rgop joi wơt kơl rmanh ta dak lêng bah nkual n’hanh lam dak.

Ntoh ngơi ntĭm rđău Đại hội Đảng bộ Đặc khu Phú Quý rơh 1, năm kan 2025-2030 mhe rlău, wa Y Thanh Hà Niê Kđăm, Ủy viên Ban Chấp hành Trung ương Đảng, Bí thư N’gor ủy Lâm Đồng lah rjăp, ndâk ƀư đặc khu Phú Quý hun hao têh dăng, tâm rgop rjăp đah hun hao wăng sa đah đăp mpăn mât njrăng bri dak, n’har bri đah wăng sa, ntŭk ntop kơl nâp an gôl dak Trường Sa. Đặc khu geh ăp nău kan wăng sa dak lêng hun hao, ngăn lah joi, nkret njêng tui ka, tăch rgâl-rhŏ an nău năp nău kan ka nkual Đông Nam Neh dak n’hanh rƀŏng tât bah nkual Đông Nam Á; hun hao rhŏ nău rdêng dak lêng, hăn ndrel đah mât njrăng ntŭk ntô n’hanh pâl nđaih nâp nâl. Wa Y Thanh Hà Niê Kđăm đă:

Đah nău geh, nău geh ơm n’hanh nău uĕh bah nơm, Phú Quý lĕ wăch rgum geh rnoh âk ăp nuĭh ƀon lan druh ndăm bah nkual têh tât gay gŭ rêh, rdâk njêng nău kan mĭn ƀư mhe, kơt pah kan bah ngai tâm âk ntil nău. Đặc khu an uănh tât, nta nơih, đăp mpăn ntung trong ngih wâl n’hanh sŏk dŏng uĕh nuĭh kan aơ, ngăch đah trong hun hao mhe bah ăp ntŭk ndru gôl dak, ntrôl nuih n’hâm rgâl mhe, mĭn ƀư mhe bah lĕ Đặc khu.

Tâm rach năm hao săk nơm bah rnoi nuĭh, Phú Quý dôl mât uĕh n’hâm soan, ndăn nău geh bah dih gay ndâk njêng tâm di lah ntŭk wăng sa dak lêng, hun hao ngăch, nâp nâl, jêng nkual têh loại IV tâm năm 2025.