Nau mbơh tă bah rnôk tâm nchră ân gĭt, nŭih rnoi mpôl đê̆ geh nklăp 14,7% rnoh nŭih Việt Nam (tâm ban rlau 14 rkeh nŭih) đah nau âk nŭih rnoi nŭih hao ngăch ndrel dôl tâm rnôk rnoh nŭih tâm di năm kan. Yơn lah, nau nâp bah nŭih kan ê geh prêh, rnoh nŭih pah kan tă geh ntĭm nti knŭng geh 6,2%, ê tâm ban ma 1/3 rđil đah nau geh dơi nsum. Ăp nau kan kơl an hun hao nŭih rnoi mpôl đê̆ ê tâm ban, ê geh ƀư ueh nau dăng hao bah nŭih rnoi mpôl đê̆.

            Tâm nkô̆ nau nchrăp, lvang năm 2025-2035, N’gâng kan ntĭm nti mbơh nkô̆ nau njêng rmôt cán bộ lah nŭih rnoi mpôl đê̆ geh nau dơi blau prêg, rgum tâm ăp nau kan: Y khoa, Dược học, công nghệ thông tin, tuch tăm, tơm prăk-ngân hàng ndrel ntĭm nti kon se. Tât năm 2035, rmôt nŭih kan blau lah nŭih rnoi mpôl đê̆ mra tŏng dăng, tŏng dơi nau ŭch hun hao bah ăp nau kan tơm, rgop nau đăp mpăn kan pah, n’hao nau geh dơi ndrel nau rgop ngăn tâm nau hun hao văng sa, rêh jêng nkuăl rnoi mpôl đê̆ ndrel lam dak.

            Groi Giáo sư, Tiến sĩ Nguyễn Văn Nam-Groi Hiệu trưởng Ngih săm ƀŭt Đại học Tây Nguyên, ân lah, gay dơi geh nkô̆ nau nchrăp luh ân geh nau ntĭm nti ăp nau kan tơm đah nau rklaih lơi ăp nau kan văng sa, rêh jêng tâm n’gor:

            ‘Tâm nau kan tuch tăm, ân geh tâm rgop nau kan tuch tăm tĭng nau kan sinh học, ê nkra ndrel rmôt ăp nau kan geh tât nau njêng jêng rgum ntŭk kan tơm. Nkre lah, ân geh nau tâm rgop nsum đah ăp gưl nti ntơm bah Dự bị, đại học ân tât lôch jêh Đại học. Yơn lah, nau aơ khuch tât nkô̆ nau ân geh săch lăp nti ri ma gâp ân lah, ân geh nau kan êng, ntop tay nkô̆ nau gay ăp ngih săm ƀŭt geh tay nau dăng ntĭm nti. Êp nê, kơl an tâm gưl nti đại học, kŏ ân geh prăk kơl an ân nŭih rnoi mpôl đê̆ lŏ geh nti hao thạc sĩ, tiến sĩ gay njêng luh nŭih ƀư nau kan nâp dăng ngăn ngên”.

            Tâm nau mât ntĭm nti, Groi Giáo sư, Tiến sĩ Tô Văn Phương, Kruanh Jrâu kan ntĭm nti Đại học, Ngih săm ƀŭt Đại học Nha Trang-mbơh nau ê dơi mpeh nau ndŏ prăk nti tâm rnôk ăp ngih săm ƀŭt dôl nchrăp tât nau nchrăp êng prăk ntĭm nti. Wa đă ân geh tay nau kan kơl an âk lơn đah ăp kon se rnoi mpôl đê̆:

            ‘Rnôk aơ, nau dơi văng sa, rêh jêng tâm nkuăl rnoi mpôl đê̆ hôm âk nau jêr, tâm rnôk jêh aơ ăp ngih săm ƀŭt ân geh nchrăp êng tơm prăk âk lơn ri ma nau kan dŏng prăk gay ma hăn nti lah nau kan tât jêr. Ndri ma, nau kơl an prăk rnôk nti, prăk ngêt sa, ntŭk gŭ ndrel ăp nau kan bah ngih săm ƀŭt rgum ân kon se sinh viên ân geh mat, kơl an âk lơn gay pơk trong ân ăp kon se geh ntĭm nti Đại học’.

            Ntơm bah nau uănh ntoh măt ntŭk kan ntĭm nti Y tế tư thục, Tiến sĩ, Nai dak si Lưu Viết Tĩnh-Groi hiệu trường Ngih săm ƀŭt Đại học Y Dược Buôn Ma Thuột, ân lah, hôm âk nau nkol tât nau kan đah ntŭk ndâk êng ndrel nkra êng:

            ‘Hên mra geh nau tŏng dơi ăp nau ƀư râng ăp bôk nau kan ntĭm nti ân nâp prêh kơl an ân nau kan mât chăm n’hâm soan ƀon lan. Ndri ma, hên ŭch geh nau tâm ban lơn ân nau kan ndâk njêng nau dơi ân nkuăl ƀư nau kan nsum ndrel nkuăl ƀư nau kan êng’.

            Ăp nau rgop mbơh tâm rnôk tâm nchră lah rjăp nau ân geh ƀư jêh nâp nau săch lăp kan, săch lăp nti ân tâm di ma nkuăl rnoi mpôl đê̆; ndâk nau kan kơl an prăk nti, prăk gŭ; nkre geh ntrong kan ây tâm di nau dơi dăng jêh lôch ntĭm nti. Âk ntoh măt kŏ đă ân geh kơl an tât nau hun hao nŭih ntĭm nti lah rnoi mpôl đê̆ tâm ăp ngih săm ƀŭt Đại học, cao đẳng tâm n’gor.

            Groi Giáo sư, Tiến sĩ Nguyễn Anh Dũng, Groi Kruanh Vụ ntĭm nti Đại học, N’gâng kan ntĭm nti lah rjăp, N’gâng kan mra djăt nau, săch ăp nau rgop gay ơm ƀư ân jêh nau kan nchrăp kan, mbơh Chính phủ ân geh ntrŭnh, rgop nau ƀư dơi nkô̆ nau hun hao nâp nâl, đăp mpăn ăp nŭih rnoi mpôl đê̆ kŏ geh nau dơi geh ntĭm nti tâm nau kan prêh blau mhe./.