Tâm ntŭk ngih ơm dôl ma nklŭt nkêng jêh dak klôn rlâm, nô Nguyễn Thế Kiên (Thôn Chánh Hữu, xã Ngô Mây, n’gor Gia Lai) dôl mô ru ndrel ma cán bộ, tahen Ngih săm ƀŭt Quân sự (Quân đoàn 34) nkra loih, nchrăp tŏ bê tông ân ngih mhe.

            Phŭt mrô 13 hŏ ƀư ngih nô Kiên plôk chor. Ê năn nkra, dak lip têh lŏ tât, klôn rlâm lĕ ma ngih. Geh ngih dak kơl an 60 rkeh, geh tahen kơl an ndâk, nô manh ntop tay 40 rkeh gay ma tŏng 100 rkeh ndâk ngih nâp. Nô Nguyễn Thế Kiên nkoch, ngih mhe geh 30m2 trần nkra ma bê tông nâp nâl:

            ‘Tahen gơih kan ngăn. Tahen kơl ur sai hên nkra ngih nâp, ueh rlau ma ngih ơm. Rnôk aơ ƀư ngih dôl ma nkhŭt meh, nkhŭt dầm ri ân geh nâp nâl rlau ma ngih ơm nơh ngăn. Rnôkaơ gâp rvăt loih gay ma ƀư tay n’hao dăp ba lơ, lah lip tay ri n’hao ba lơ, mô kâp nchuăn rleo ndoh ndơ hăn ntŭk êng ôh”.

            Kŏ tâm thôn Chánh Hữu, tahen Ngih săm ƀŭt Quân sự Quân đoàn 34 dôl kơl rnăk nô Ngô Đình Vị ndâk ngih. Ngih ngai ma trong, neh dêh ri ma tahen hŏ rdeng neh gay n’hao ân prêh, n’hao nau dăng rlet ma dak lip. Aơ lah ngih ueh, nâp, yor êng 60 rkeh Ngih dak kơl an, nô hŏ sŏk 120 rkeh prăk têm gay ma rvăt ndơ, hôm tahen kơl an âk ngăn nau ndâk ƀư. Lah thơ tă blau ndâk nkra ngih ri ma nô Vị ƀư ueh ngăn tâm nau ndâk nkra. Nô nkoch:

            ‘Ăp kônh tahen mih tâm mih tâm nar saơ yŭ ngăn. Bri mih, gâp đă ăp kônh rlu du mlât, yơn lah hôm nsoh ao dak mih gay kan đŏng. Ndơ sa, dak ngêt, ăp kônh mô sŏk ndơ nơm ơm. Khân păng tât kơl an hên, ri hên rhơn ngăn. Rnăk hên moh geh nau đă, tahen ƀư ndơ nê. Nchrăp lah, rnăk hên mra ƀư jêh tâm 45 nar”.

            Tâm “Nau kan Quang Trung” rnôk aơ, Quân đoàn 34 geh jao nau ndâk 70 ngih tâm nkuăl dak lip bah n’gor Gia Lai ndrel 30 ngih tâm nkuăl dak lip n’gor Dak Lak. Jêh rnôk ndơ nau đă, Quân đoàn 34 hŏ rgum rlau 600 cán bộ tahen ndrel ndoh ndơ nchrăp leo hăn tât ăp n’gor, jao ăp rmôt kan ƀư nau kan tâm ăp nkuăl n’hêl, tâm boh tâm rgop ƀư ân rjăp ma n’gâng kan bah n’gor ndrel tơm ngih ndal hao nau kan ndrel ntơm ƀư nau kan.

            Đại tá Phạm Hồng Sơn, Groi Chính uỷ Ngih săm ƀŭt Quân sự Quân đoàn 34, đăp mpăn ndơn nau kan tâm xã Ngô Mây, n’gor Gia Lai mbơh: dĭng lĕ rmôt kŏ geh rgum gay đăp mpăn nau kan ân tam ndrel nau ngăch. Rmôt kan ndŏ nau ƀư jêh ăp ngih aơ bah năp lơ 20/1/2026 gay kônh wa năn vơt sa Tết tâm ngih mhe:

            “Nau kan nkra ƀư ân n’gor ndrel rnăk vâl ndơn nau kan hôm rmôt kan tahen ri mra kơl an ndâk ndrel rmôt kan kơl nchuăn leo nsoh ndơ lăp ƀư. Ndơ ngêt sa ri rmôt kan hên mra đăp mpăn tâm di tĭng nau geh dơi bah tahen. Phung hên ƀư đăp mpăn ndơ ngêt sa nsum du ntŭk ndrel leo ăp ntŭk bah rmôt kan gŭ tâm ngih ƀon lan gay oh nô geh piăng song, đăp mpăn n’hâm soan gay ƀư nau kan bah nơm”.

            Đah ăp rnăk mhe geh rlet rlau mih dak lip, ăp ngih mhe ndâk dôl ma njêng mô êng lah ntŭk gŭ âm đăp mpăn, ma hôm lah ntŭk nsing nuih n’hâm kơl bah oi du nau roh hoach yor trôk nar lơh. Tâm ăp mpir ngih, ăp rnăk vâl kŏ geh ntruh dak rhal ndrel nuih n’hâm bah tahen Wa Hồ, ntop du tŏ tay đŏng lah rjăp nau tâm boh tahen, ƀon lan nâp nâl ndrel tâm nau tât khuch, mô geh nŭih geh nchlơi êng ba kơi./.