Di rơh tât khâl gưl ngih dak tât ta CH Ai Cập, kruanh dak Lương Cường n’hanh i ur ndrel đah mpôl kan đại biểu gưl têh Việt Nam lĕ geh tâm mâp cán bộ, nuĭh kan Đại sứ quán, ăp ntŭk kan n’hanh ndơn kan nuĭh Việt Nam ta Ai Cập. Tâm nău ueh răm, dăch bên, ndơn kan an nuĭh leo kan Đảng n’hanh Ngih dak, Kruanh dak Lương Cường njoăl tât lĕ rngôch âk nuĭh Việt Nam dôl gŭ rêh nti n’hanh pah kan ta Ai Cập, ăp cán bộ, nuĭh kan ta Đại sứ quán Việt Nam ndrel đah rnăk vâl ăp nău rŏng ngăn n’hanh ăp nău rhơn ueh ngăn. Mbơh đah ƀon lan nuĭh Việt Nam ta Ai Cập, kruanh dak an gĭt lôch bơi tât 40 năm rgâl mhe, Việt Nam dôl knơm lăp ta rơh rach năm mh, tach năm hun hao têh dăng n’hanh têh ndrŏng, nsrôih an geh jêng dak hun hao geh công nghiệp ueh mhe, nău geh râng geh ta năm 2030, n’hanh tât năm 2045, jêng dak hun hao, nău geh âk ngăn. Kruanh dak knơm ƀon lan mbra geh n’hao tay nău rŏng dak, nsum ti rdâk njêng ntŭk rêh jêng hun hao, nâp dăng, ƀư tĭng ueh pháp luật n’hanh lăp kan ndrel ueh ta ntŭk rêh jêng ta ntŭk, tâm rgop âk ta nău hun hao bâh Ai Cập tâm ban kơt nău tâm boh tâm kơl đah 2 dak, nkre lah mât ueh nău ngơi Việt n’hanh văn hóa way ơm bâh mpôl rnoi, mbơh ndơn tay an ăp rơh kon său ba kơi.