Năm 1982, bu ndăm Nguyễn Đăng Khoa lăp tahen Đại đội 14, Trung đoàn 95, Sư đoàn 307, râng tâm lơh tâm ntŭk tâm lơh Campuchia tâm n’gor Preah Vihear, tâm êp ma Thái Lan. Rlau 40 năm ma aơ, wa mro nkah tât ăp ntŭk tâm lơh, ăp rnôk tâm lơh ndrel ăp tahen nơm lĕ khĭt.

Tâm nau rêh đăp mpăn, nau n kah ndrel nau rvê mpeh ăp tahen nơm lĕ khĭt tâm ntŭk tâm lơh hŏ nsuk đă tahen ơm Nguyễn Đăng Khoa. Năm 2002 wa ntơm hăn joi nting tahen khĭt kăl e. Nkuăl neh, ntŭk gŭ geh âk nau rgâl yorr rnôk aơ jêng mir, jêng ƀon ndrel âk ntŭk bu ndâk nkra. Yơn rnơm nau nsôih bah nơm, âk ntŭk rgum têh hŏ geh năl kơt lah yôk Dúi Dù, gò Me, ndrel ngăn lah nau hăn joi geh 5 nting tahen tâm Sư đoàn 968 leo nsĭt tâp tâm n’gor Bình Phước (ơm).

Wa Khoa nkoch, ntrong hăn bah wa mô êng geh ntĭm leo đah nuih n’hâm tahen ơm, nau nkah bah rnôk tâm lơh ma n’ăp tâm rnôk bĭch mbơi. Kơt lah rnôk hăn joi tahen khĭt Trương Công Thanh tâm năm 2013, wa Khoa vay geh mbơi tât tahen khĭt ndrel geh bu đă păng. Wa hăn tât Jrâu kan Lao động-Thương binh ndrel Xã hội nkuăl Sơn Tây, n’gor Bình Định (ơm) gay ma ôp joi ndrel geh mbơh môch tahen geh moh lah “Thanh” đah ăp nau gĭt ê lăng kloh. Yơn lah, đah du nau rnơm wa hăn joi ăp nau, tâm ntit ăp moh săk bah tahen tâm Trung đoàn 94 khĭt ndrel rnôk nê, jêh nê păng hăn joi oh bu klô tahen khĭt nê gay ma ôp rnôk lăp hăn tahen, rnôk păng khĭt. Ăp naubu nkoch bơi lah ma tâm kơt ndrel păng hŏ hăn joi.

Nkoch tât nau nơm tă ƀư ndrel dôl ƀư, tahen ơm Nguyễn Đăng Khoa, nkoch:

‘Nau kan nê nsŭk đă gâp ân ƀư, ma kŏ mô geh nŭih nchapa đă nơm ƀư, knŭng tă nuih n’hâm nơm dơm. Gâp ƀư nau kan aơ gâp saơ ŭch ngăn, saơ tâm nuih n’hâm geh nau rhơn m’ak bol ma bri mih mô lah nar, ăp ntŭk rnôk nơm gĭt nu nau lah nơm hăn dơm. Ntrong hăn bah gâp ri bonh đă oh nô tâm rmôt tahen ơm, bonh đă rnăk vâl ntŭk nơm gŭ ngêt sa ân băl mpôl, ndơn ăp nŭih hăn joi môch tahen tă bah ngai tât, yơn geh rnôk ri ta aơ ngih ân bu gŭ ri mô geh ôh”.

Nau kan bah wa Khoa mô êng lah nau kan bah êng săk nơm ma hôm lah nau nkoch trêng nau tâm rŏng, nau nkah jru ngăn. Wa Đặng Quang Dũng, nŭih tă hăn nsum ma wa Khoa bơi tât 20 năm, nkoch:

‘Đồng chí Khoa gŭ tâm tahen jêh nê lôch hăn sĭt tâm ngih ri hŏ tâm rgop ma nkuăl bah năp nơh ndrel xã gay ma hăn joi nting tahen khĭt gay ma leo nsĭt tâp tâm môch. Nŭih băl mpôl rnăk vâl bah ăp nŭih băl mpôl nŭih khĭt nê kŏ tât tâm ngih đồng chí Khoa mro gay ma ndrel tâm kơl mbơh nau hăn joi nting tahen khĭt”./.

Rlau 20 năm ma aơ, wa Nguyễn Đăng Khoa hŏ mô rlu tâm nau joi nting tahen khĭt. Ăp nau rgop bah wa Khoa hŏ geh Đảng ndrel Ngih dak kơp dơn. Năm 2019, wa geh Kruanh dak pă Huân chương Chiến công hạng Ba yor ăp nau rgop rnôk tâm lơh, kơl an tâm lơh kơl an cách mạng Campuchia. Êp aơ ngăn, tâm năm 2023, wa geh ndơn Bằng khen bah Kruanh n’gâng kan neh dak yor geh nau blau tâm nau kan tâm rgop joi, rgum năl moh săk tahen lvang năm 2017-2022.

Tĭng wa Trần Thị Ngọc Mai, Groi Kruanh UBND xã Bình khê, n’gor Gia Lai, tahen ơm Nguyễn Đăng Khoa mô êng lah nŭih geh n’hâm, lah nŭih leo trong ma hôm lah nŭih geh nau ryơk bah cán bộ mom tâm ntŭk:

“Kônh Khoa lah nŭih leo trong ân rơh mom kơt tiư̆ng, nau kan bah kônh ntoh nuih n’hâm ndrel nau kan ma ăp đồng chí nơm, nuih n’hâm ne êuh ndrel prêh khlay ngăn. Bah nau kan aơ hŏ ƀư rêng nau ŭch ndrel nau kan ma ƀon lan, nau nkah đah ăp tahen janh dăng lĕ khĭt yor nau đăp măpn bah rnoi mpôl. Nơm saơ lap ndrel ryơk nau đăp mpăn, ryơk ma nau nơm geh dŏng tâm nar aơ, ndrel nơm ân geh nau rêh ndrel nau kan gay mô geh n au khuch, mô khuch nau roh hoach bah ăp rơh mbơ̆ nô hăn lor”.

Trong 20 năm hăn joi tahen nơm bah tahen ơm Nguyễn Đăng Khoa lah nau ntoh ngăn bah nau ton bah tahen, bah ăp nau tâm ŭch bah tahen nơm mô dơi chuêl tâm ăp năm khay. Wa hŏ ndrel dôl mpoh nau ang bah nau nkah, gay ăp nŭih kon geh nau dơi bah rnoi mpôl, bol ma lĕ chôt săk nơm tâm moh ntŭk, kŏ mra geh sĭt tâm nkuăl neh me”./.