Tĭng ƀư trong nchrăp bah Bộ Chính trị n’hanh rđău đă bah Thủ tướng Chính Phú, n’gor Dak Lak dôl ntrôl ngăch rdâk njêng ăp nhih nti nội trú rep gưl ta ăp xã n’har bri. Ta rnôk dăp rduăl nău jêr jŏt nê, ăp nhih nti dôl mbrơi jêng mpơl săk kơt ntŭk nsing nâp an njăr trong hăn tât jrô nti bah hang rbăn kon se nti ta nkual jru, nkual ngai. Ăp nhih nti dja mô dơn rhŏ dŏng an nău kan ntĭm nti ma hôm nkre đah ăp tŏng geh nău rêh jêng kon nuĭh, đăp mpăn nkual ƀon lan gŭ, đăp mpăn njrăng n’gang neh dak – rnă njrăng ntŭk n’har bri đŏng.

Ăp nar, oh Lang Thị Yến Vy, kon hŏk jrô 7, Ngih samƀŭt THCS Nguyễn Thị Định, xă n’har bri Ia Rvê, n’gor Dak Lak hăn trong rlău 10km gay tât ngih samƀŭt. Rnôk gĭt ta ngih samƀĭt nơm dôl nti mbra dơi ndâk ƀư têh uĕh n’hanh khlay lơn lah dơi gŭ nội trú, Yến Vy dŭt rhơn:

Ƀah bah jay oh tât ngih samƀŭt nklăp 10km. Tâm yan mih trong dak băm dŭt âk n’hanh oh hăn rwăch ngai rlău 14-15 km. Yan duh trong dŭt duh n’hanh nsuk dŭt r’ah, sĭt tât jay mô ŭch ngêt sa du ntil. Rnôk gĭt ngih samƀŭt gâp dơi ndâk ƀư mhe oh dŭt răm n’hanh rhơn. Dŭt mpŏng kâp geh ngih samƀŭt mhe gay mpôl oh dơi nti uĕh lơn.

Nău nkoch bah Yến Vy lah nău răm nsum bah hăng rhiăng kon hŏk n’hanh me bơ̆ nkual n’har bri Dak Lak âk năm bah năp: wăng sa jêr jŏt, nău nti mâp âk jêr jŏt. Yor bah ăp nău rwê nĕ, nău ntrŭnh an ntuh kơl ndâk ƀư ăp ngih samƀŭt phổ thông nội trú gưl tiểu học-Trung học cơ sở ta ăp xă n’har bri dơi ƀư, pơk luh nău ŭch mhe an nău kan “mât rong nuĭh” ntŭk nkual n’har bri Dak Lak.

Tĭng trong nchrăp lvang 2025-2030, n’gor mbra ndâk ƀư 5 ngih samƀŭt nội trú 2 gưl tiểu học n’hanh trung học cơ sở ta 4 xă n’har bri n’hanh 1 xă kâng n’har nkual n’har bri. Ăp ngih samƀŭt dơi ntuh kơl tâm ban jrô nti, ntŭk gŭ, jay sông sa, thư viện, nkual thể thao, jrô tin học, trong dak kloh uĕh n’hanh ăp ndơ dŏng êng, tŏng ăp an kon hŏk nti, gŭ âm rgum tâm nău geh uĕh ngăn.

Wa Nguyễn Văn Hoa, Kruanh UBND xă Ia Rwê, n’gor Dak Lak an gĭt, aơ ngăn ngên nău răm têh đah n’gâng kan ƀon lan n’hanh nuĭh ƀon lan nkual n’har bri. Kônh wa ăp rnoi nuĭh tâm xă dŭt tâm ban ŭch kơl, nta an nău nchrăp ƀư ơm jêh.

Aơ lah du nău geh nkô̆ dŭt khlay gay ăp mon rgum gŭ âm ngêt sa ta ngih samƀŭt nội trú  kônh wa ƀon lan ăp rnoi nuĭh xă dŭt uănh tât n’hanh kơl gay kon sau dơi nti ren.

Wa Trương Công Thái, Groi Kruanh UBND n’gor Dak Lak an gĭt, tâm rnoh 5 ngih samƀŭt nội trú 2 gưl nkual n’har bnri dơi ndâk ƀư ta n’gor, geh 4 ngih samƀŭt dơi ntuh kơl đah tơm prăk trung ương, 1 ngih samƀŭt dŏng tơm prăk bah N’gâng kan mât njrăng bri dak đah dĭng lĕ ntuh kơl nklăp 630 rmen prăk. Du ngih samƀŭt tŏng nău ŭch nti ren an nklăp 1.000-1.200 kon hŏk. Aơ lah ăp ndơ ƀư geh nkô̆ nău rêh jêng kon nuĭh n’hanh chính trị khlay, mô knŭng rhŏ an ntĭm nti ma hôm hăn ndrel đah nău đăp mpăn rêh jêng, đăp mpăn ƀon lan, đăp mpăn mât njrăng bri dak-rnă njrăng ntŭk n’har bri. Yor rĭ ăp n’gâng kan, nău kan, ƀon lan rgum tâm rgop rjăp tâm lôch mbơh ƀư tâm di nău ntrŭnh, uĕh nâp n’hanh ngăch:

Rgum tâm rgop tâm rnôk ƀư bah nău tŏng neh tât rnôk nuĭh ndranh ntơm ntuh kơl ndâkl ƀư ăp ndơ ƀư n’ăp nău sŏk dŏng groi nđôi tâm rnôk ƀư tĭng an tĭng di nău ntrŭnh.

Tĭng wa Lê Thị Thanh Xuân, Groi Giám đốc N’gâng kan ntĭm nti n’gor Dak Lak, ntrong ƀư ngih samƀŭt nội trú 2 gưl mô knŭng nău geh êng bah nkual n’har bri jêr jŏt. N’gâng kan ntĭm nti n’hanh ăp ntŭk tâm n’gor mbra mĭn njêng na nê̆ ntrong ƀư aơ gay pơk hvi tâm năm tât. N’gâng kan mbra tâm ôp tâm nchră ndâk njêng trong hun hao lam hvi ngih samƀŭt 2 gưl, nta nơih an kon hŏk dơi nti nsơm na nao bah mầm non tât trung học phổ thông:

Ta ntrong ƀư lor ăp ntŭk mbra geh trong nchrăp gay pơk hvi ăp ntrong ƀư gay hun hao ăp gưl nti prêh lơn gay ăp oh dơi na nao bah gưl mầm non tiểu học trung học cơ sở n’hanh Trung học phổ thông dơi ăp oh nti mbra dơi tŏng ăp uĕh lơn.

Ăp ngih samƀŭt dôl mbrơi jêng ntŭk n’har bri Dak Lak mô knŭng geh nău khlay đah ndoh ndơ, ăp ndơ ƀư aơ hôm geh nău mpŏng kâp têh bah gưl ủy, n’gâng kan ƀon lan n’hanh nuĭh ƀon lan tâm nău “mât rong rplay samƀŭt” ta ăp nkual neh hôm e jêr jŏt. Bah ăp jrô nti mhe, ăp ntŭk gŭ kloh uĕh, mpông pơk mhe dôl pơk an oh kon nkual n’har bri, djôt tĭng nău ŭch sĭt du Dak Lak hun hao nâp nâl, ntŭk gĭt blău mbra mpoh ang rgŏ năp tă bah ăp nkual neh n’har bri bah Neh dak.