Ta ƀon Bu Ndrung, xă Đức An, n’gor Lâm Đồng, ăp nuĭh way ƀư dôl rgum jêh rnăk jây mhe an nô Điểu Phạm Dương (nuĭh Bunong). Bah nău blău ơm âk năm hăn ƀư mon jay, nô Dương “nkoch” mpeh jay uĕh răm bah nơm, dơi ndâk ƀư bah nău ntop kơl bah N’gâng kan Công an n’hanh rnăk wâl rgum rgop tay:

Rnăk jay aơ dơi ƀư tĭng nău mĭn bah gâp, đah dĭng lĕ rnoh neh 77m2. N’gul jay ŭnh n’hanh jrô ngoang geh nsưng rpê̆, bah kơi aơ geh prăk rwăt tivi n’gân ta aơ. Jay ŭnh lah ntŭk rgum rƀŭn rnăk wâl. Hôm mpông bah kơi aơ, lah gay ƀư jay ŭm nkhah êng.

Ƀa ƀơ geh măt ta ăp ndơ ƀư jut ngih rông mpông sat ta ntŭk kơt du hê “nuĭh uănh nđôi”, Kruanh ƀon Điểu Khuy, ƀon Bu Ndrung, xă Đức An, an gĭt, kônh wa ta aơ dŭt tâm rnglăp.

Dơi Đảng, Ngih dak uănh kơl, ri kônh wa mpôl hên đăp mpăn n’hanh răm rhơn. Kônh wa mpôl hên tâm ƀon Bu Ndrung aơ, rnôk geh nău kan têh tât chop khâl n’hanh tâm ơl dŭt n’hâm. Ntĭt nsa kơt ndâk ƀư ngih wâl; nuĭh geh soan ri kơl soan, nuĭh geh ndơ ri kơl ndơ.

Ta nkual căn cứ cách mạng xă Nâm Nung, âk jay truh sat dôl mbrơi dơi rgâl đah ăp jay kloh uĕh. Nô Y Kram ta ƀon Jarah mĭn lah “du nău rêh knŭng dơi ƀư jay du tơ̆, dơi ngih dak ntop kơl jêng an nsrôih ndâk ƀư nâp nâl”.

Lăn ƀư jay, bôl jêr jŏt  yơn nsrôih ƀư nâp, ƀư uĕh gay đăp mpăn oh kon gŭ; yor lĕ ƀư ri dŏng lôch nău rêh. Gâp nsrôih manh tay bah kơi aơ trok an oh nô. Rnăk wâl jêr jŏt, dơi ngih dak ntop kơl 60 rkeh prăk; oh nô kônh wa kơl, mư geh jay gŭ kơt aơ. Năm mhe rlău cà phê khlay, ntêm nkrem âk năm mư ndâk ƀư jay kơt aơ.

Hôm yuh H’Monh mô dơi mpôn nău răm rnôk geh jay mhe.

Lĕ geh jay gŭ bah duh, bah mih gâp dŭt rhơn n’hanh đăp mpăn pah kan jan sa gay mât rong oh kon hăn nti nsơm, gâp mbra nsrôih ƀư sa hun hao gay ntêm nkrem prăk đêt năm tay trok an oh nô, mê̆ bơ̆ lĕ kơl he geh du mlâm jay nâp nâl kơt aơ.

 Tă nĕ mô ngai, rnăk wâl tahen ơm Y Choi dôl ƀư brah rhơn jay mhe tâm mông nar răm m’ak. Tâm jay kloh uĕh rƀŏng mpeh nglău Nâm Nung nđik aih, tahen ơm Y Choi nkoch nău răm:

Lor rnôk ndâk ƀư, gâp gŭ tâm jay sat ƀư bah năm 1989, êp wăm. Dơi Ngih dak ntop kơl prăk ndâk ƀư jay n’hanh kơl gâp manh prăk ngân hàng chính sách jêng gâp dơi geh jay kloh uĕh nâp nâl kơt aơ. Rnăk wâl gâp dŭt rhơn n’hanh răm gâp dăn lah uĕh Đảng, ngih dak dŭt âk ngăn.

Năm 2025, nkual n’har bri n’gor Lâm Đồng (Dak Nông ơm bah năp đaơ) ntop kơl ngih rông mpông sat an 1.755 rnăk. N’gâng kan Công an lĕ ntop kơl n’gor prăk ndâk ƀư 500 rnăk jay an nuĭh ƀon lan. Bah n’hêl na nê̆ mbơh ƀư ta bah dâng, yuh H’Thương-ta xă Nâm Nung, n’gor Lâm Đồng, an gĭt:

Gâp saơ bah Trung ương tât xă, Bôk nău kan jut ngih rông mpông sat dŭt săk rnglăy. Ta aơ, mpôl hên hăn uănh nđôi, ntrôl di mông nar, di nău ntrŭnh. Thủ tướng Chính phủ lĕ uănh saơ ƀon lan mô geh jay gŭ, an ƀư dâl. Aƀaơ tât yan mih, rwê an nuĭh ƀon lan, Thủ tướng lĕ ntĭm rđău ƀư tĭng đăp mpăn di ngăch, gay kônh wa lăp gŭ, dŭt ngăch.

Bah ăp nău ntrŭnh sŏng di n’hanh nău ndrel ty bah lĕ trong chính trị, ăp mpông jay mhe kloh uĕh dôl rgâl ăp jay sat, nsĭt tay nău răm, mpŏng ŭch du nău rêh đăp mpăn, rhơn răm an hang rbăn rnăk ta Lâm Đồng. Nuih n’hâm tâm rnglăp, tâm pă bah nsum mpôl dơi mpŏng an rlău tĭng ndơ ƀư jay gŭ, rgop rêng hvi nău rŏng nuĭh, mĭn lah nău răm bah ƀon bah ƀon lan đah Đảng n’hanh Ngih dak. “Nău răm bah ăp nuĭh lăp tât jay mhe” dôl rêng hvi lam ăp ƀon lan.