Hơi kônh wa djăt radio! Tâm rnôk n’gâng kan tâm dâng bar gưl dơi an dŏng ta n’gor Dak Lak, nău ntop kơl nuĭh ƀon lan tât n’hanh dŏng hăr blău ăp jâng nsing mbrô jêng nău khlay mha êng.  

Hăn ndrel đah n’gâng kan, mpôl đoàn viên, mom ndăm ta n’gor lĕ n’hanh dôl n’hao nău hăn lor, hăn bôk năp tâm nău kan rgâl mhe rnoh mbrô, ntop rhoăt gleh nău kan công nghệ, ngăn lah ta nkual njônh ngai, nkual ƀon lan rnoi đê̆ ta Dak Lăk.

Hăn tât ntŭk rgum ƀư siƀŭt xã Ea Rốk, n’gor Dak Lak gay đăng ký khai sinh an kon, nô Đinh Thanh Hùng, (ta thôn 3) mô gĭt wât đah rêng ƀư điện tử dôl dơi an ƀư. Lôch ăp đoàn viên druh ndăm gŭ kâp ta aơ ntĭm nti lĕ nuih n’hâm, nô dơh kơt ƀư. Tâm bar pe jât mnĭt, ăp ntil siƀŭt hŏ ƀư lôch jêh dơh ntơ. Nô Đinh Thanh Hùng nkoch:

“Lôch rnôk dơi ăp băl đoàn viên, druh ndăm ntĭm nti ri gâp nchih mbơh n’hanh pơk lăp ta điện thoại. Ăp băl đoàn viên, druh ndăm ntop kơl gâp lĕ nuih n’hâm n’hanh na nê̆, dơh wât jêng gâp mbra dŏng dơi n’hanh nkah pet lât gay dŏng bah kơi tay đŏng”.

Ta ntŭk rgum ƀư siƀŭt xã Ea Rốk, ăp nar way geh dŭt đêt 8 đoàn viên gŭ kâp, ntop kơl nuĭh ƀon lan ƀư siƀŭt ta keh mbrô. Tâm rlău du khay an ƀư, bơi 40 đoàn hŏ ntop kơl hang rhiăng tơ̆ nuĭh ƀon lan ƀư rlău 150 hồ sơ, 200 siƀŭt đăng ký khai sinh, tâm nđăp, mbơh khĭt, ndrel hang rhiăng nău lư mât prăp n’glăp ta trôm.

Yuh Ngô Bảo Ngọc, đoàn viên râng ntop kơl ta aơ nkoch, ăp nar geh âk nuĭh ƀon lan tât ƀư siƀŭt. Âk nuĭh rnoi mpôl đê̆ mô kloh ngơi nău yăn, mô geh tài khoản định danh rnoh 2, mô geh điện thoại pet lât mô lah mô wât kloh rêng ƀư siƀŭt ân ƀư.  

“Mpôl hên hŏ lor nchrăp ntĭm nti tât công an xã Ea Rốk gay năl săk n’hanh ntop kơl kônh wa nchih ăp nău lư, siƀŭt mbơh rnôk ƀư siƀŭt ntop kơl kônh wa đăng ký na nê̆ ta máy tính mô lah ta điện thoại bah Ủy ban nhân dân xã”.

Mô dơn ntop kơl ta ăp ntŭk rgum ƀư siƀŭt, ăp rmôt druh ndăm râng kơl êng hôm jŭr tât ăp nkual ƀon lan gŭ, tât tĭng rnăk, lơn lah ăp rnăk ndrô hranh, bu ranh, nuĭh rnoi mpôl đê̆, gay nkoch trêng, cài đặt ndơ pơk dŏng mbrô, ntĭm nti dŏng ăp ndơ pơk sŏng dăng bah ngai rhŏ dŏng an nău rêh n’hanh siƀŭt sitra. Nô Ninh Tiến Đạt, Groi Bí thư Đoàn xã Quảng Phú, n’gor Đắk Lắk nkoch:

“Đoàn viên druh ndăm hăn tât jay nkoch trêng ntop kơl nuĭh ƀon lan tâm nău cài đặt ăp ndơ dŏng trok tâm điện tử, đăng ký sŏk soăy, dŏng ndơ pơk lăp bah ngai, bah nê kơl nuĭh ƀon lan n’hao nău gĭt êng mpeh trong leo n’glăp dŏng n’gâng kan 2 gưl tâm ban kơt dŏng ndơ pơk ƀoh bah ngai dơh ntơ lơn”.

Ntơm bah bôk khay 7 tât aƀaơ, n’gâng kan bar gưl dơi an ƀư ăp kôp, Tỉnh đoàn Dak Lak hŏ rgum n’hanh mât mbro 131 rmôt druh ndăm ntop kơl rgâl mbrô, “Tâm nti keh mbrô”, nđơn tay bah ăp rmôt rgâl mbrô lam ƀon  lan bah năp nê nơh. Ăp đoàn viên, druh ndăm nsrôih pơk uănh  n’hanh dŏng công nghệ mbrô tâm ăp nău kan râng kơl êng. Bah nê hŏ ntop kơl geh nău dơi bar  pe jât rbăn tơ̆ ƀon lan ta ăp ntŭk ƀon  lan, mpeh yôk yang, nkual jru nkual ngai, rgop rhuăt glêh tâm ƀah mbrô n’hanh n’hao nău dơi tât ndơ rhŏ dŏng ƀư siƀŭt ngih dak bah nuĭh ƀon lan.

Tĭng nô Lương Minh Tùng, Bí thư Tỉnh đoàn Đắk Lắk, let năp tay, mpôl đoàn viên mbra kơi năp nti tay way nkô̆ jru gay n’hao nău blău kan, dơn kan jăp lơn tâm nău ntop kơl n’gâng kan n’hanh nuĭh ƀon lan tâm rnôk rgâl mbrô.

“Ntrŏng năl tĭng ƀư nău kan râng kơl êng lah ta ăp ntŭk rgum ƀư siƀŭt ta ăp xã, phường, yor kơt nê̆ jêng mpeh nău kan way nkô̆ jru mbra âk lơn. Tỉnh đoàn hŏ an ƀư kơi năp nti ăp nkô̆ mpeh rgâl mbrô. Nchrăp let năp tay ri Ban Thường vụ Tỉnh đoàn mbra jă ăp nuĭh rnâng kan n’hanh kruanh  ăp n’gâng kan tâm n’gor, ntĭm nti jru tâm ta ntŭk rgum ƀư siƀŭt gay ăp mpôl kan n’gâng tơm rƀah gĭt, tât dŏng n’hanh an ƀư ăp kôp, nsĭt geh nău dơi”.

Đah nuih n’hâm dơn kan n’hanh nău dơi bên di ngăch đah công nghệ, mpôl đoàn viên, druh ndăm Đắk Lắk dôl tĭng kơn jêng ntung njŏ geh nău dơi tam đah nuĭh ƀon  lan n’hanh n’gâng kan tâm rnôk rdâk njêng n’gâng kan mbrô, nău rêh mbrô, rƀŏng tât du nău rêh dơh ngăch n’hanh têh mhe lơn an nuĭh ƀon lan.