Ndrel rmôt băl chŭp rup nkah ndrăy n’hanh uănh joi nău uĕh ơm ta Gành Đá Đĩa, xă Tuy An, n’gor Đắk Lắk, yuh Đào Thị Hiền, năch tât nkual ƀon têh Hà Nội mô rlu roh ta năp nău uĕh bah ndơ ƀư têh ma bri dak lĕ an. Yuh Hiền nkoch, ăp yuh lĕ săch Đắk Lắk lah ntŭk tât tâm trong pâl nđaih gay uănh joi bri dak n’hanh ƀư ngăn nău uĕh mhe bah du n’gor mhe nglăp rnôk nkre geh dak lêng nkre geh bri.

Rơh bôk năp mpôl hên tât đah n’gor Đắk Lắk mhe, dơi uănh dak lêng bah Đắk Lắk, uănh Gành Đá Đĩa, chŭp rup ta aơ dŭt uĕh. Mpôl hên nchrăp lah hăn uănh Phú Yên jêh nĕ  mbra hăn uănh Buôn Đôn gay săch lĕ ăp nău saơ nkre dak lêng nkre yôk bri. An lah aƀaơ hăn Đắk Lắk nkre dơi pâl nđaih yôk nkre dơi uănh dak lêng. Du nău khlay lah tui ka ta aơ dŭt kah n’hanh rnoh khlay tâm di.

Bah rnôk Ngih dak geh nău ntrŭnh nglăp nsum, rgum nsum 2 n’gor, pâl nđaih Đắk Lắk-Phú Yên lĕ geh âk nău rgâl mhe. Rnoh năch hao âk tơ̆ nkôp đah bah năp. Lơn lah, mô knŭng năch tât bah ăp n’gor nkual êng ma năch tâm n’gor hăn nsong đah 2 nkual Đông-Tây Đắk Lắk hao âk đah ăp tour mô lah rmôt rnăk wâl. Yuh Nguyễn Thị Điểm, rhŏ kan ta Rosa Resort Tuy Hòa, Đắk Lắk an gĭt:

Gâp saơ dăch aơ rnôk ma nglăp nsum ăp n’gor ndrel ri năch pâl nđaih dŭt lah âk, năch dŭt răm. Ta Rosa bah mpôl hên ri ăp nkual geh da dê, yơn lah ăp khay dăch aơ ri saơ Tây Đắk Lắk jŭr ta aơ dŭt âk, dŭt răm. Gâp dŭt ŭch dôl geh pâl nđaih n’gŭr răm kơt aơ ri mpŏng lah năch tât ta aơ âk lơn, uĕh lơn.

Tĭng rơh đah nău nglăp nsum, ăp ntŭk kan ƀư pâl nđaih lĕ wơt joi ăp nkô̆ nău dak lêng-bri. Kơt ta jay sông sa têh Đắk Phú, phường Tuy Hoa, săk kuăl  rgop ndrel bah 2 n’gor Đắk Lắk n’hanh Phú Yên, nô Trương Tấn Tài, Mât uănh jay sông sa têh an gĭt, ntŭk kan knŭng rgâl săk moh boăt nthoi dak lêng-bri ma ndơ sa geh nău tâm rgop đŏng.

Mpôl hên ƀư bah lơ 1/6 ri bah khay 5 mpôl nkret gâm lĕ hăn Đắk Lắk hăn uănh tĭng jay sông sa têh, nău sa, văn hóa ta nkual Đắk Lắk gay jŭr ta aơ ăp ndơ sông sa uĕh kah mpơl êng bah nĕ kơt djăr gŭch, piăng dĭng, blân tăng... Soan dŏng uĕh, năch dŭt rƀŏng tĭng rnôk ma tât ta aơ nkre ngêt sa dơi sa ndơ tĭng nkual prêh bah Đắk Lắk ndrel đah tui ka nkual dak lêng.

Jêh rnôk nglăp nsum, nkual mpeh Tây bah Đắk Lắk ntoh lư đah pâl nđaih si glê ntŭk ntô, bri, pâl nđaih nsum mpôl. văn hóa chĭng gông, ndơ ngêt sa ntĭt mpơl Tây Nguyên. Hôm nkual mpeh Đông nău têh pâl nđaih dak lêng, làng chai, ăp ntil tui ka. Ăp nău mpeh Liệt sĩ Nam tiến ta Buôn Ma Thuột dơi nkoch tay đah nău Vũng Rô n’hanh ăp thuk mpan “mô geh mrô”, ăp ndrâm dak mê Sê Rê Pốk n’hanh Chiến thắng Buôn Ma Thuột. Wa Ngô Văn Định, Groi kruanh Hiệp hội pâl nđaih n’gor Đắk Lắk an lah, ăp nău ntoh lư bah 2 n’gor ơm rgum tay mbra jêng jâng nsan dăng ntop kơl an 2 nkual Đông-Tây hun hao uĕh lơn.

Mpôl hên mbra ntop tay ăp nău ma bah năp đaơ mô geh bah 2 n’gor gay jêng ndơ an lĕ 2 nkual dơi rhŏ an năch na nao. Tal 2 lah pơk hvi, n’hao uĕh tach ndeh păr tuy Hòa jêng tach ndeh păr quốc tế gay wơt năch tât đah Tuy Hòa jêh nĕ hăn Đắk Lắk. Tal 3 tay ntĭm nti rmôt kan gay rhŏ an pâl nđaih Đắk Lắk mhe, văn hóa an geh nău nglăp nsum, nău kan an dơi n’hao prêh.

Nău nglăp nsum, rgum nsum n’gor lĕ an năch pâl nđaih Đắk Lắk dơi ƀư n’hanh rƀŏng hun hao mhe. Nău rgum nsum ăp ndơ pâl nđaih ntĭt mpơl, ndrel đah nău n’hao ntŭk ntô gung trong n’hanh ntĭm nti nuĭh kan uĕh nâp, dơi mpŏng kâp mbra rgop ntrôl nău kan pâl nđaih bah n’gor hun hao nâp dăng tâm năm tât.