N’gor Dak Lak aƀaơ geh nklăp 41.000 ha sầu riêng, đah rnoh geh nchrăp năm aơ geh nklăp 400.000 tấn, hao âk nkôp đah ăp năm bah năp. Rnoh geh hao âk ndrel đah nău jêr đah uĕh kah, ngăn lah rnôk âk nkual tăm sầu riêng ta ăp n’gor kiău ma dôl tŭp tâm nău “nchăm lor”, mô đăp mpăn tâm di uĕh kah, khuch nsing nơm nău kan ndơ. Wa Nguyễn Thị Thành Thực, Kruanh HĐQT Công ty AutoAgri an lah, sầu riêng Dak Lak hôm âk nău rmeh gay hun hao, n’gâng kan ƀon lan n’hanh nău kan dơi kan an uănh tât mrô nkual tăm:

Mrô nkual tăm lah nchih mbơh săk lah drăp ndơ bah nuĭh tăm, yơn lĕ geh nău âk doanh nghiệp rlăm mrô nkual tăm ƀư djơh, rlău Trung Quốc bu rlu mrô bah he, lah he khuch. Gâp đă n’gâng kan ƀon lan, ăp n’gâng kan ban ngành an ndâk njêng nău kan du năm an mkra, ndâk njêng geh ndâk âk mrô nkual tăm.

N’gâng kan tuch tăm n’hanh ntŭk ntô gŭ âm n’gor Dak Lak lĕ tâm rgop đah Hiệp hội Sầu riêng n’gor n’hanh ăp doanh nghiệp, hợp tác xã, ntrôl dăng uănh năl uĕh kah, sŏk ntil play rblang rmeh ndơ, ton mô dŏng ăp ntil dak si mô dŏng, lơn lah groi nđôi rjăp chất vàng ô n’hanh cadimi. Wa Lê Anh Trung-Kruanh Hiệp hội Sầu riêng Dak Lak-an gĭt:

Hiệp hội lĕ tâm rgop đah ăp ntŭk mĭn njêng ndrel ăp doanh nghiệp, hợp tác xã sŏk ntil gay năl nkual Dak Lak nkual đăp mpăn ƀư an nkô̆ nău nsing nim gay dơi geh tăch rgâl đah sầu riêng Việt Nam n’hanh tăch n’gluh bah dih. Tâm trôm “trong uĕh nđĭr” mpôl hên dôl ntĭm ăp doanh nghiệp tâm rgop đah Cục Bảo vệ thực vât ndâk ƀư kôp rnoh an ƀư chấm điểm joi tu tơm 1 trong dŭt uĕh. Bah nĕ mbra n’hŭch gưl geh tât uănh nđôi, groi nđôi. Nar khay hăn bah dih mbra ngăch lơn.

Hiệp hội đă nuĭh ƀon lan mô tăch sầu riêng nse rnôk mô hŏ tât rnôk pĕ, dêr mâp nău mô lap geh nsâm khlay mô lah roh nsing nơm. Ăp doanh nghiệp, hợp tác xã dơi đă ton ƀư tĭng rjăp ăp rnoh an đăp mpăn, trong ƀư tâl dŭng n’hanh geh tŏng prăk kaih gay dêr nău “roh prăk nchăm”, ƀư khuch an nuĭh ƀon lan.

Gay sầu riêng Dak Lak ngăn ngên hao lam ntŭr neh, an nău ƀư rĭng bah nkra njêng kloh uĕh, tâm di kỹ thuật, joi tu tơm kloh rah wah tât groi nđôi rjăp trong pă manh. N’gâng kan ƀon lan, doanh nghiệp n’hanh nuĭh tăm an ndrel ty ndâk njêng nău kan ndơ sầu riêng ngăn ngên, nâp nâl, tŏng soan tâm rlong dak bah dih. Đah nău ƀư bah n’gâng kan ƀon lan n’hanh nău kan dơi kan, nău nsrôih bah ƀon lan n’hanh doanh nghiệp, Dak Lak dôl nsrôih dŭt n’hâm mât nâp moh êng sầu riêng đăp mpăn, ntơm hăn pơk hvi ntŭk tăch, rgop mĭn lah jâng nsan sầu riêng Việt Nam ta rup treh ndơ lŏ mir tăch n’gluh bah dih.