Aƀaơ lam dak geh nklăp 448.000 ha bri tăm nkra njêng si têh, hao ngăch nkôp đah lvang bah năp. Rlău ma nĕ, lĕ geh nklăp 63.000 ha bri dơi rgâl bah bri si jêt an si têh tă bah ăp bôk nău kan ntop kơl bâh ngih dak n’hanh tâm rgop nsum-êng. Rnoh neh bri geh kơp dơn nâp nâl geh bơi 943.000 ha. Bôl lĕ geh njoat hao đah ăp samƀŭt kơp dơn bri nâp nâl bâh dak bah dih, âk jêr jŏt bah tăm bri nkra njêng hôm e nkân kơt nkra njêng jêt chrai, prăk kơp dơn âk, mô geh tâm rgop trong khlay, n’hâm soan mât uănh đêt.

Wa Nguyễn Danh Hùng, Groi Giám đốc N’gâng kan tuch tăm mât rong n’hanh ntŭk ntô Nghệ An, an gĭt: N’gor geh ndơ têh knơm rnoh neh bri tăm hvi, âk doanh nghiệp nkra njêng si n’hanh ăp hợp tác xã dŭt n’hâm râng. Yơn lah, rnoh neh bri tăm si têh bah Nghệ An dŭt đêt đah 33.000ha. Năm tât, gay n’hao khlay bri tăm, n’gor Nghệ An uănh khlay tay tăm bri si têh:

N’gor lĕ an dăp rgum, pă n’har na nê̆ moh nkual hun hao bri tăm si têh, gay nchrŏng trong tăm bri, tâm rgop đah kơp dơn bri. Hội đồng njân dân n’gor lĕ geh nghị quyết ntop kơl tăm bri si têh, ma ntơm bah nău yơng ntil...

Ta rƀŭn, âk nuĭh way kan, nuĭh mât uănh, nuĭh khoa học n’gluh an âk trong mkra gay hun hao nkual ndơ bri si têh hăn ndrel đah kơp dơn mât uănh bri nâp nâl du trong săk rnglăy. Tĭng nĕ, ăp trong mkra rgum tâm lôch jêh trong pháp lý, dơn ƀư samƀŭt kơp dơn; kơl an manh prăk, mât ton bri; ntop kơl ntril uĕh jêng âk kơt keo lai mô, keo tam bội; kơt dŏng công nghệ mrô tâm mât uănh n’hanh mbơh joi tu tơm; hun hao trong tâm rgop tăch jŏ jong đah rnoh khlay đăp mpăn.

Bah trong boăt nthoi n’hanh ntop kơl kỹ thuật, wa Hoàng Văn Hồng, Groi Giám đốc Ntŭk ntrŭt nsôr tuch tăm Ngih dak an lah, an ntrôl dăng ntrong ƀư tăm bri hăn ndrel kơp dơn, nkre n’hao tâm rgop rnăk ƀon lan-HTX-Doanh nghiệp-rmôt kan kơp dơn. Tĭng nĕ, Ntrŭt nsôr lŏ mir mbra ƀư tơm tay ntung nthoi, kơl nuĭh tăm bri gĭt tât công nghệ, trong ƀư nâp nâl n’hanh ntŭk tăch đăp mpăn.

Ntŭk ntrŭt nsôr lŏ mir ngih dak hôm e mât tay n’hanh na nao, n’hao trong kan nkoch mbơh, tiăr nti kỹ thuật nkra njêng an kônh wa. Ndâk njêng ăp nău nchrăp ƀư ntrŭt nsôr lŏ mir gay kônh wa dơi uănh lah, uănh mĭn tay, bah nĕ rhoăt luh nău blău ơm, gay pơk hvi ăp ntrong ƀư ntrŭt nsôr lŏ mir nkra njêng bri tăm si têh du trong nâp nâp.

Rƀŭn nchră mô knŭng lah ntŭk tâm pă nău blău ơm, joi trong mkra dôh rklaih jêr jŏt ma hôm pơk luh dơi n’hao kan ndrel đah ăp ntŭk, doanh nghiệp n’hanh nuĭh tăm bri. Ăp trong nchrŏng, tâm ton n’hanh ntop kơl kỹ thuật bah ngih pah kan mât uănh, rmôt kan ntrŭt nsôr lŏ mir mbra geh nuih n’hâm mhe gay hun hao nkual bri si têh hăn ndrel đah kơp dơn nâp nâl, rgop n’hao khlay wăng sa, rgâl joi nău rêh n’hanh mât njrăng ntŭk ntô gŭ âm.