Bah năp geh nău ma ji ndŭl djroh sŭr châu Phi ntoh luh, ntưp rêng lam hvi, n’gor Gia Lai dôl nsrôih mât kân, ntơm bah mât rong, nkhĭt roch tât nchuăn rdeng, tăch rvăt n’hanh nking nchăng ji ndŭl djroh sŭr châu Phi ntoh luh.

Âk nar rlău aơ, ntŭk nkhĭt roch rgum ndơ mât rong Nhơn Bình, (mpeh Công ty TNHH tuch tăm, nkret njêng ndơ sa Quy Nhơn) phường Quy Nhơn Đông, pah kan hăn ôp uănh tơm lăp sŭr ndrôk, êt lhăt. Lor rnôk n’glăp nkhĭt roch, sŭr dơi rgum bah dih. Ta aơ, nuĭh tơm ndơ tăch ân mbơh ăp tŏng nău lư mpeh tơm luh, ntŭk mât n’hanh rnoh âk sŭr. Mpôl kan dơi kan ƀư ôp uănh lor na nê̆. Wa Nguyễn Quang Thái, Groi Giám đốc công ty an gĭt, rlău ma ôp uănh bah cán bộ thú y, doanh nghiệp nơm ân geh rêng ƀư groi nđôi srăch uĕh  nkhĭt roch đŏng:

“Lah saơ sŭr geh nău mpơl ntưp ji ri công ty mbra mbơh tât nhih pah kan dơi kan, n’gâng kan thú y gay nkra lơh tĭng di quy định.”

 Tĭng wa Nguyễn Thị Ngân Hà, ntŭk nchroh năl n’hanh săm ji ndơ mât, Chi cục mât rong n’hanh Thú y n’gor Gia Lai, nô nău nuh srê ji ndŭl djroh sŭr châu Phi dôl tât klach rvê. Tâm du khay aơ, Gia Lai hŏ năl geh 5 tơm nuh srê, lĕ rngôch geh hang rhiăng mblâm sŭr ntưp ji ân geh nkhĭt su jăng. Yor kơt nê̆, rêng ƀư mât kân nkhĭt roch, đăp mpăn srăch uĕh puăch sŭr, lơn ma dơi ƀư lhăt.

“Mpôl hên mât uănh rvăt n’glăp sŭr bah 9 mông ôi, uănh năl lor tât 9 mông măng, n’hanh mpôl hên uănh năl tay lam lĕ rngôch đăp mpăn kloh uĕh sŭr tât 1 mông n’gul ôi bah kơi mbra đăp mpăn kah uĕh n’hanh ngăch dăng tât ntŭk nkhĭt roch n’hanh n’gluh bah dih tăch.” 

Lam n’gor Gia Lai aƀaơ geh 11 ntŭk nkhĭt roch rgum n’hanh bơi 800 ntŭk nkhĭt roch jê̆ chrai. N’gâng kan dơi kan n’gor Gia Lai hŏ n’hanh dôl rđău đă ăp n’gâng kan tâm dâng n’hao dăng hăn ôp uănh năl ta lĕ rngôch ăp ntŭk nkhĭt roch, tâm ban kơt ăp ntŭk tăch rgâl sŭr ndrôk, kik djăr lam n’gor đŏng. An ƀư pah kan nkoch trêng jru hvi ăp trong njrăng n’gang nuh srê tât nuĭh ƀon lan, lơn lah ăp rnăk mât rong sŭr. Nău ŭch lah n’hao nău gĭt êng nsum mpôl lam ƀon lan  mpeh nău klach rvê bah nuh srê, lơn lah ăp nău tih nchuăn rdeng, tăch rvăt sŭr n’hanh puăch sŭr rvăt n’glăp, ơm rŭ hôch geh ma nău ntưp rêng nuh srê âk:

Wa Huỳnh Ngọc Diệp, Chi cục trưởng Chi cục mât rong n’hanh Thú y n’gor Gia Lai, an gĭt tay.

“Tâm nô nău nuh srê kơt aƀaơ, mpôl hên hŏ rđău đă ntŭk mât rong thú y bah ăp nkual kan nsum đah n’gâng kan ăp n’gâng kan tâm dâng gay n’hao dăng mât uănh nkhĭt roch jê̆ chrai ta ntŭk mô hŏ rdâk njêng ntŭk nkhĭt roch rgum. Tâm rnôk sŭr rvăt n’glăp saơ geh mpơl sŭr ji mpôl hên ƀư an krŭng êng. Lôch nê uănh tĭng nău mpơl ji uănh năl ăp ntil nuh srê, lơn  lah nuh srê ji ndŭl djroh sŭr châu Phi ri mpôl hên mbra ƀư  nkra lơh tĭng di quy định kơt nkhĭt su, dŏng rnoh duh n’hanh ăp njuat ƀư tay tĭng di quy định.”

Rlău ma mât kân nkhĭt roch, n’hao dăng groi nđôi nuh srê, gay nking nchăng nuh srê ji ndŭl djroh sŭr ntưp rêng ngăch, ntơm bah khay 7, n’gor Gia Lai hŏ njêng 4 ntŭk gŭ kâp njrăng nuh srê rgop âk n’gâng kan ta ăp nkual geh nuh srê hô, rgop êt lhăt mât kân./.