Aơ lah rơh bôk năp du ntil ndơ play sa geh tĭng nău ntrŭnh mât njrăng đăp mpăn ueh ndơ sông sa geh dơn ngoăy ta lam dak, nđâp ma lĕ rngôch ntil ndơ pah kan bâh tuch tăm, pĕ lêh, nchoăn rdeng, mât prăp, tâl dŭng tât tăch an dak bah dih.

Tĭng nău mbơh bâh wa Lê Anh Trung- kruanh hiệp hội sầu riêng n’gor Đăk Lăk, nău kan mât njrăng ueh đăp mpăn ndơ sông sa geh ntrŭnh rơh aơ lah tâm di đah nău tăch sầu riêng an dak bah dih bâh Việt Nam n’hanh nău đă bâh mpeh rvăt nglăp.

 “Nău ntrŭnh aơ geh nđâp lam rnoh pah kan n’hanh tăch ndơ sầu riêng an dak bah dih, bâh ntơm tuch tăm, tăch rvăt, tâl dŭng tât nchoăn rdeng n’hanh tăch an dak bah dih. Rnôk geh ƀư tŏng ăp, doanh nghiệp n’hanh nuĭh ƀon lan mbra dơi ƀư tĭng tâm di đah nău ŭch bâh ntŭk tăch rgâl rvăt ndơ bâh dak bah dih. Aơ lah nău kan pháp lý dŭt khlăy, kơl an n’gâng kan tăch rgâl der geh nău kŏ văk bâh kĩ thuật mhe mbra dơi ntoh luh tâm let năp tay”.

Uănh rnê âk mpeh nău ntrŭnh mhe bâh n’gâng kan tuch tăm mât rong n’hanh ntŭk gŭ rêh, wa Vũ Ngọc Huy- Groi Tổng Giám đốc Công ty Cổ phần tăch rgâl an dak bah dih Dũng Thái Sơn- an gĭt, âk doanh nghiệp ntơm nơh dŭt mĭn rvê peh nău mô geh ntĭm nti. Yơn aƀaơ, nău ntrŭnh mhe lĕ njêng nău kan pháp lý na nê̆, kơl dơn ngoăy trong kan bâh ntŭk kan ba dâng tât doanh nghiệp.

 “Nău đă nuĭh tăch rvăt rnôk rvăt ta mir an geh mbơh dăn lor đah ta ntŭk mô lah geh trong kan pháp nhân na nê̆ mbra kơl an nău kan mât uănh ngih dak geh dơh nơih ueh lơn, ƀư tĭng ăp nău ntĭm đă bâh ta ntŭk...nĕ lah nău ueh gay ma n’gâng kan hăn lăp tâm nău ueh nâp nâl”.

Mpeh đah ntŭk kan mât uănh ta ntŭk, wa Nguyễn Minh Huấn, Giám đốc ntŭk kan tuch tăm mât rong n’hanh ntŭk gŭ rêh n’gor Đăk Lăk an gĭt, n’gâng kan tuch tăm geh uănh năl ntrŭnh 3015 bâh n’gâng kan tuch tăm mât rong n’hanh mât ueh ntŭk gŭ rêh lah nău kan pháp lý khlay gay ma n’hao nău dơi mât njrăng ueh ndơ dŏng bâh tu tơm. N’gâng kan dôl nsrôih tâm rgop ueh đah ăp ntŭk, doanh nghiệp n’hanh hiệp hội gay ma ơm geh ƀư mbơh tơih, nti nău kan an ƀon lah, nuĭh tăch rgâl mpeh ăp nău ntrŭnh mhe, nkre lah đă ăp ntŭk ƀư tĭng răng dăng nău uănh năl trong kan mât đăp mpăn ndơ sông sa, gĭt na nê̆ tu tơm, mât đăp mpăn ueh kloh rjăp n’hanh mât njrăng nău khuch tât bâh ơm. Wa Nguyễn Minh Huấn mbơh nău.

 “Ntŭk kan tâm rgop đah n’gâng kan tuch tăm, mât tơm tăm n’hanh Ủy ban nhân dân ăp xã, phường n’hao nău dơi gĭt vât mpeh mât uănh nău ueh n’hanh đăp mpăn ndơ sông sa, n’hao nău kan ntĭm leo oah kan, tăm sầu riêng tĭng nău mpong, nău kan an tâm di đah rgâl trôk nar mih sial, n’hao nău kan uănh nđôi, uănh năl mât đăp mpăn ndơ sông sa n’hanh rnoh mbrô nkual tăm, tâl dŭng sầu riêng tăch an dak bah dih”.

Nău n’gâng kan tuch tăm mât rong n’hanh ntŭk gŭ rêh ntrŭnh nău mât njrăng trong kan mât kloh ueh ndơ sa play sầu riêng, mô dơn tâm di ngăch ta năp nău an geh ƀư ngăn bâh ntŭk tăch rgâl an dak bah dih, ma hôm nha lah njoăt hăn gay ma mpơl na nê̆ trong kan n’hao nău dơi ueh khlăy ntil ndơ tuch tăm Việt Nam đah ntŭk tăch rgâl tâm di pháp lý na nê̆. Nău tâm ban âk bâh ntŭk kan n’gâng kan nsum, ntŭk kan doanh nghiệp n’hanh n’gâng kan ta ntŭk an saơ n’gâng kan sầu riêng  Việt Nam dôl an geh trong kan du nău hun hao kloh rjăp, nâp nâl n’hanh tâm di ueh kan lơn.