Ta Buôn Ma Thuột, n’gor Dak Lak, Hiệp hội Cà phê Buôn Ma Thuột (BMTCA) n’hanh Hiệp hội Cà phê Daegu (DCA-Hàn Quốc) lĕ ký ton Samƀŭt nkah gĭt kan ndrel gay n’hao mpla nsơ, boăt nthoi tăch rgâl n’hanh ntrôl hun hao cà phê kah đah 2 dak. Aơ dơi uănh lah nău khlay ngăn tâm nău nsrôih ndơ̆ cà phê Robusta Việt Nam gĭt tât jru lơn ntŭk tăch Hàn Quốc kơt nsum mpôl cà phê kah lam ntŭr neh. Tĭng nkô̆ nău ký ton, 2 hiệp hội tâm ban ŭch tâm rgop mbơh ƀư ăp nău kan ntrŭt ngăch tăch rgâl, tâm rgâl nu nău ntŭk tăch, boăt nthoi doanh nghiệp, ntop kơl hun hao trong khlay cà phê kah. Tă bah kan ndrel aơ, Hiệp hội cà phê Buôn Ma Thuột mpŏng kâp cà phê kah gĭt tay ăp trong tâm pă, trong quán cà phê specialty n’hanh nuĭh dŏng Hàn Quốc. Wa Trịnh Đức Minh, Kruanh Hiệp hội cà phê Buôn Ma Thuột an lah, ƀư ký ton gĭt saơ nău djôt dơn nar lơ na nê̆ bah nsum mpôl cà phê lam ntŭr neh đah Robusta kah Việt Nam.

Aƀaơ ri he mhe ngăn ngên wăch rgum ăp rmôt kan cà phê lam ntŭr neh kơt ăp doanh nghiệp lam ntŭr neh uănh tât cà phê Robusta kah bah Việt Nam. Nău nĕ dŭt lah khlay yor bah jŏ, ndơ kah he đă săk an cà phê Arabica âk lơn, n’hanh he hôm e mât nău uănh mô dơi tâm ban đah Robusta, n’hanh ăp nău nsrôih tâm năm mhe rlău na nê̆ geh săk rnglăy ngăn, wăch rgum dơi nsum mpôl cà phê kah bah lam ntŭr neh.

Tâm trôm nău ƀư, moh êng cà phê kah MISS EDE lĕ ký ton samƀŭt djôt dơn kan ndrel đah Coffee Myungga-cà phê kah bah Hàn Quốc geh rlău 35 năm hun hao. Kan dnrel rgum tâm nău hun hao lĕ rngôch trong khlay Robusta kah Việt Nam, bah săch ndơ, hun hao ndơ tâm di nuĭh dŏng Hàn Quốc tât tâm pă ta ntŭk quán cà phê Specialty, trong tăch chrai gưl prêh n’hanh ăp trong tăch điện tử.