Por mbo lah ndơ sa dơh, lah krêp môi bah âk săk soan n’hanh nău rŏng pah kan bah nuĭh K’Ho. Gay dơi geh ăp grăp mbo ƀô kah, kônh wa an săch mbo m’êt rbân mô lah mô lai way ơm, dơi mât chăm du yan. Wa K’ Bri ta xă Đinh Văn Lâm Hà, n’gor Lâm Đồng an gĭt:

Rnôk mbo lĕ kranh, hê pâk, ih kro ta ndrơng ŭnh mô lah ta duh nar jâng gung, jêh nĕ rlê̆ grăp, djôt hăn kĭn ri he geh phe mbo kah hôm.

Ăp grăp mbo jêh rnôk dơi kĭn mô hăch môi kơt rnih mbo công nghiệp, ma knŭng hăch phe jêng ăp phe mbo jêt, jêng ndơ kuăl lah “phe mbo”. Phe mbo hôm e dơi kơt rplay, mô geh roh ntô kar, knơm nĕ ma rnôk rŭk, mô knŭng rbân môi ma hôm rêng hvi ƀô kah ntil mpơl ơm bah mbo. Nău rŭk por bah “phe mbo” đă an geh nău kâp n’hanh jêr. Gay phe ngăch sĭn n’hanh rbân lơn, nuĭh K’Ho way trăm phe tâm dak âk mông, uĕh ngăn lah an rlău mang. Jêh rnôk trăm, phe dơi rpa kloh jêh nĕ an tâm n’glah, rŭk ta ŭnh jêt âk mông mro. Tâm rnôk rŭk, an wâr tâm ban gay por dơi sĭn tâm ban n’hanh mô geh ô̆ ta bŭt n’glah. Nô Ha Zu Na, ta xă Đinh Văn Lâm Hà, n’gor Lâm Đồng, an gĭt:

Ndơ por mbo bah he rŭk dŭt dơh, mô dŏng phe, mô nkret nting. Mbo hăch dơi an tâm n’glău, rpa n’hanh ntop dak, rŭk ta ŭnh năk long an tât rnôk por m’lĭt, grăp mbo rbân lêk. Nuĭh K’Ho ŭch kơt nĕ yor mbra mât nău njŭng kah ơm bah mbo.

Por mbo way sa đah ka kro juh, ka hấp, ka gŭch ƀô kah ndrel trau bri srŭng mô lah wâr đah dak ngi, lĭt bôh m’răch. Ăp ntil trau ndrel đah por mbo lăp ndrel, jêng ƀô kah uĕh ntĭt mpơl bah yôk bri dŭt uĕh. Yuh K’Huyền, ta xă Đinh Văn Lâm Hà, n’gor Lâm Đồng, an gĭt: ăp ntil trau n’hanh bôh mrăch sa ndrel mô knŭng rgop an tâm ban kah ma hôm lah nău ntĭt mpơl tâm ndơ sa bah nuĭh K’Ho:

Rnôk gâp sa ngan por mbo aơ, saơ bôk năp lah rbân, njŭng bah mbo. Por ntêng, grăp mbo rbân n’hanh dơh sa. Na nê̆, mô dŏng nting nkret nsum đah por yơn por hôm e njŭng n’hanh kah knơm grăp mbo.

Ndơ por mbo dơh uĕh aơ mô knŭng lah nău rêh dơh, ma hôm saơ kloh nău blău ŭch di bah K’Ho “moh ndơ geh sa ndơ nĕ”, dŏng ăp ntil ndơ bah ndơ trôk bri an. Por way dơi dŏng jêh ăp nar pah kan ŏk r’ah, kơl hơm ndŭl, ngăch săk n’hanh nsĭt tay saơ aih tâm nuih n’hâm, kơt du ndơ an khlay bah neh bri jêh âk ŏk r’ah joi nău rêh.

Đah nău rêh ndăn bah nkual têh, rnôk ăp ndơ sa mhe mô rlu lăp sĭt ƀon lan, “por mbo” ndơ sa dơh uĕh bah nuĭh K’Ho hôm e dơi mât an nơm du ntŭk dâk êng tâm nuih n’hâm âk rơh. Tâm du ngan por mbo, mô knŭng geh tăng njŭng bah grăp mbo, kah bah bôh, ma hôm geh n’ăp rmeh bah mông nar, bah nău ơm kăl e. Ngan por mbo mô knŭng ngăch săk jêh du nar pah kan ŏk r’ah ta lŏ mir ma hôm ƀư he nkah gĭt đah ƀon lan, nkah gĭt nsuk ŭnh, nkah gĭt rup gui nuĭh mê̆, nuĭh u he ơm bên.