Ta ntŭk rgum Tâm nchră Dak Nông (phường Đông Gia Nghĩa, n’gor Lâm Đồng), UBND n’gor Lâm Đồng ƀư Lễ mbơh nău n’glêh an bah Thủ tướng Chính phủ kơp dơn Drăp ndơ mpêt khlay gưl neh dak Gong lŭ Đắk Sơn. Râng lễ geh nuĭh ntơh măt Bộ Văn hoá, Thể thao n’hanh Pâl nđaih; ăp nuĭh rnâng kan, nuĭh gŭ mĭn văn hoá ndrel âk mpưm nuĭh ƀon lan ntŭk saơ gong lŭ Đắk Sơn.

Gong lŭ Đắk Sơn dơi saơ năm 2014 ta xã Nam Xuân, nkuâl Krông Nô, n’gor Dak Nông ơm (aƀaơ lah xã Đắk Sắk, n’gor Lâm Đồng), lĕ rngôch 16 njăr lŭ – tâm nê geh 11 njăr nha hôm uĕh kơt ơm n’hanh 5 njăr glêh bơi nha hôm kơt ơm, nsĭt rnoh khlay mha êng mpeh kuĭh joi ndơ ơm yău, nău kăl e n’hanh văn hóa. Gong lŭ Đắk Sơn lah ndơ goh ơm yău kăl e, an saơ nău rêh văn hóa nuih n’hâm âk mpưm ntơm bŭt jêng kon nuĭh kăl e, năl di tu tơm săk ntơr êng bah ƀon tơm nkual neh Tây Nguyên. Lah ta rơh lễ, ntơh măt Hội Khảo cổ học Việt Nam, PGS.TS Bùi Văn Liêm, Groi Kruanh Hội Khảo cổ học Việt Nam, Uỷ viên Hội đồng di sản văn hoá gưl neh dak lah rjăp, Lâm Đồng lah nkual neh geh ntŭk gŭ khlay mha êng, rgum âk ndơ gŭ rêh tâm bri dak âk mpưm, nkre geh âk mbâl jŏ ơm kăl e – văn hóa jŏ jong đah âk ntŭk têl kuĭh joi ndơ ơm yău, bri dak uĕh măt uănh, ntŭk geh âk rnoi nuĭh gŭ rgum.