ơm ôi rŭk rnôk ma tŭk lêm hôm nha mbĕ ta n’ging si, bu ranh Rơ Châm Hyă ndrel đah mpôl tur chĭng, njroh xoang bâh ƀon Dun De, xqã Ia Grai, n’gor Gia Lai, lĕ geh tât ta ntŭk ntruh dak ta ƀon gay ma nchrăp an nău way ƀư brah lôch yan. Bu klô  njôt ndrănh yăng, bu ur anh piăng anh poăch, oh kon se tĭng jâng mê̆ bơ̆, măt ntoh ang nău nđơr rhơn. Ta nkual neh lâng, ƀon lan lĕ ơm ndâk lor tơm njuh dŭt têh geh ƀư ma rse reh n’hanh n’ha si. Ndơ ƀư brah geh du yăng ndrănh, du mblâm djăr gŭch, poăch sŭr gŭch n’hanh piăng ba mhe, an lor ta năp tơm njuh.

Rnôk ma ăp ntil ndơ lĕ tŏng lĕ rngôch, bu ranh ƀon Rơ Châm Hyă tât ta năp tơm njuh ntơm geh ƀư nău way ƀư brah. Wa  tŏ ndrănh yăng, măt uanh let trôk, răk nău, jă huêng brah yôk, brah dak, brah ba sĭt râng, kơl mât uănh an ƀon lan geh âk mbo, âk ba, ăp nuĭh săk dăng lăng ngăch, nău rêh hơm răm.

Lôch nău kuăl brah, bu ranh ƀon ngêt du tong ndrănh yăng bôk năp lôch nĕ ndơ̆ an ăp nuĭh âk năm deh ngêt tay n’hanh ƀon lan. Rnôk yănh ndrănh lĕ tâm pleh ngêt lĕ rngôch an ăp nuĭh, nău nteh chĭng gong nsuk nsôr nuih n’hâm ƀon lan. Ăp bu druh nuĭh Jarai njroh xoang tĭng joat jâng, ăp bu klô ndăm goh gâr, tur chĭng ntoh n’gôr. Njroh xoang rvoal têh văr tơm njuh. Bu ndăm ƀon Dun De tur lĕ nău chĭng aơ tât chĭng êng, ăp nuĭh njroh xoang lĕ du măng dŭt ueh ngăn.

Yuh Puih Gái, ƀon Dun De nkoch, đah nuĭh Jarai, găr ba kơt lah nău rêh. Nău kuăl brah ba lah nău nkah an nău kahgĭt đah bri dak, nkre lah njêng nău tâm rnglăp ntŭk rêh jêng. “Ăp năm kơt nĕ mbro hên tât râng da dê. ƀon lan ƀư tay nău kuăl brah gay ma mât nău ueh way ơm nuĭh Jarai, jêng oh gĭt nău njroh xoang, chĭng gong. hên nkoch tay an rơh ba kơi gĭt, gay ma tât ba kơi tay mô chuêl nău ueh êng rnoi nơm”.

Bôk yan wai aơ, n’gâng kan văn hoá Gia Lai mhe geh ƀư ndâk nsơm tay nău kuăl brah ba, kơl an ƀon lan Jarai mât nău ueh êng bâh rnoi nơm, njêng nău ueh mpeh văn hoá- pâl nđaih geh âk nău ueh êng. Wa Nguyễn Văn Đính, groi kruanh UBND xã Ia Grai an gĭt. “Xã mbra geh ndâk nsơm tay ăp nău way ơm êng kơt kuăl brah mih, kuăl brah ntruh dak, ngih môch.l.dŭt têh. Bâh nĕ njêng nău kan an ăp ƀon êng gay ma ntop ndâk nsơm nău mât rbăy ndâk nsơm nău way ơm bâh ƀon lan rnoi đê̆, njêng nău tâm rnglăp ta ntŭk rêh jêng ta xã, ntop an hun hao pâl nđaih, njêng nău geh an ƀon lan”.

Wa Lê Thị Thu Hương- Groi Giám đốc ntŭk kan văn hoá thể thao n’hanh pâl nđaih n’gor Gia Lai an gĭt; bâh nău kan ndâk nsơm tay ăp nău kuăl brah, ntŭk rêh jêng geh rơh uănh tay nău ueh êng bâh âk nău khlăy mpeh nău ueh êng way ơm, nkre lah mât nău tâm rnglăp, n’hao nău kan bâh nuĭh geh nău knơm, bu ranh ƀon, bu gru. Aơ lah rơh gay ma n’hao nău gĭt vât bâh rơh mom tâm nău kan mât rbăy ăp ntil ndơ ơm nău ueh êng bâh mpôl rnoi.“Mbra dơi lah bâh ăp bôk nău kan ndâk nsơm tay, ƀon lan dŭt rhơn ngăn. Bâh năm 2023 tât 2025, n’gor lĕ geh ƀư âk bôk nău kan ndâk nsơm. Aƀaơ, ntŭk kan geh mbơh ôp tay đah UBND n’gor an geh rdaka njêng tay bôk nău kan mât rbăy chĭng gong lvang năm 2026-2030, tâm nĕ nkô nău ndâk nsơm nău ƀư brah, gâp mĭn uch tâm let năp tay nău ueh êng mpôl rnoi ta Gia Lai mbra geh âk nuĭh gĭt tât lơn.

Đah âk ntŭk kan nuĭh Jarai,ăp nău way ơm mô dơn lah ntil ndơ ueh êng bâh u che nklơi tay, ma hôm nha lah tu tơm mât rbăy nău ueh êng đah nău rêh mhe. Dơh kơt nĕ dơm, yơn ăp nău kan nĕ lĕ tâm rgop ƀon lan n’hanh mât an nău khlăy lĕ nău rêh nâp nâl, mô geh roh tĭng mông nar.

Nguyễn Thảo/VOV Tây Nguyên