Nklang nău rêh aƀaơ, ta âk ƀon lan ta Dak Lak, nău chĭng gong nha hôm mât ndray n’hanh nsĭt n’hâm n’hôr mhe. Văn hóa chĭng gong dôl dơi nđơn tay ma ăp băl mom, bu hăr blău, n’hanh lĕ ma ăp câu lạc bộ chĭng gong tâm ăp ƀon lan đŏng, rgop tâm nău mât ndray săk tơm, n’hao dăng tâm nđŭr văn hóa n’hanh rdâk njêng rup gui Dak Lak dêh bên, geh âk săk tơm tâm rơh lăp rgum.

Tâm nău nteh chĭng gong khuh n’gôr, nău way jă ngêt ndrănh yăng way ơm bah nuĭh Rđe dơi mpơl tay n’grêh rêh. Ăp ngan dak bah nông kro dơi mprĭp rĭng grep, njêng tâm ban kơt dak leng hoch jŭr tât yăng ndrănh. Mô dơn lah nău way, nê lah trong bah nuĭh Rđe mpơl ma nău uănh khlay đah năch khlay.

Ăp păk ti jôn rbăn, hăr ngăch dơi ƀư bah ăp băl mom tâm câu lạc bộ chĭng gong buôn Tơng Jú, phường Ea Kao, n’gor Dak Lak. Oh Y Krông Hin Niê nkoch:

“Mpôl hên dơi nti tay âk nău chĭng gong mhe n’hanh lĕ ma ăp nău ndăch rvăch tă bah nai Vũ Lân trêng nti tay đŏng. Gâp ŭch rŏng lah ăp nău chĭng gong, ăp nău ndăch rvăch dja dơi rêng lam hvi lơn n’hanh dơi nuĭh ƀon lan gĭt tât”.

Krêp dêh bar pe jât năm đah chĭng gong n’hanh văn hóa Tây Nguyên, NSƯT Vũ Lân hŏ rgop nsĭt chĭng gong, dĭng dưt rla tâm nhih nti n’hanh sĭt tât ƀon lan; njêng rmôt găr ntil mom mbra râng tâm ăp nău kan văn hóa, pâl nđaih du trong way ƀư mbro. Tĭng păng, trêng nti chĭng gong an druh ndăm mô dơn gay rhŏ dŏng nchreng an uănh, ma khlay lơn lah kơl rơh kơn mom ndăm wât kloh lơn rnoh khlay văn hóa bah rnoi nuĭh he, bah nê mât ndray tâm rnglăp n’hanh nău n’hao êng săk ƀon lan.

“Nău kơi năp nti an băl mom gĭt tŭr goh chĭng gong, gĭt nkrêh goh ndơ lôk ƀư n’hanh lơn lah gĭt nchreng an uănh njroh mprơ đah ăp nău way ơm kăl e, njêng luh ndơ geh ƀư n’glăp tâm nău kan pâl nđaih văn hóa nsum mpôl lah dŭt uĕh tam”.

Trong ƀư dja tâm di đah trong rƀŏng têh bah n’gor. Tĭng Nghị quyết 10/2021 bah HĐND n’gor mpeh “Mât ndray n’hanh ntik n’hao văn hóa chĭng gong lvang năm 2022–2025”, Dak Lak an ƀư ăp kôp ăp trong nkra ƀư: rdâk tay ntŭk tŭr chĭng goh gong, nkre đah mât ndray pâl nđaih văn hóa, ntop kơl ndơ năp dŏng, pơk jrô trêng nti ta ƀon lan; rdâk tay nău way ơm.

Tơm ndơ geh bah n’gor n’hanh ăp bôk nău kan gưl neh dak, Dak Lak hŏ phăt 214 bor chĭng gong, rlău 1.140 blah ndơ nsoh way ơm; pơk 26 jrô trêng nti; rdâk rêh tay âk nău chĭng Rđe, Bu nong. Nơm geh kơt nê, ăp ƀon geh ndơ ma lor nchrăp trêng nti tay, mô nsing tâm ndơ manh rnôk râng tâm rlong, tâm nđŭr tâm n’hanh bah dih n’gor.

Ta buôn Kmrơng Prong A, phường Tân An, văn hóa chĭng gong dâk rêh tay dăng lôch du rơh rngơt rngăt. Wa Y Bây Kbuôr, Kruanh buôn, an gĭt, buôn aƀaơ geh 4 rmôt chĭng gong, way hăn tŭr goh n’hanh tâm nđŭr mbro:

“Câu lạc bộ bah mpôl hên dơi mât mbro n’hanh hăn tŭr goh mbro, dơi tâm nđŭr, kơt nti, ăp tơ̆ hăn lah ăp băl mom geh du tơ̆ rlong saơ ngăn ngăn n’hanh mât ndray n’hanh kơt nti ăp n’gor êng ƀa ƀă. Ăp bu hăr blău, bŭnh ranh gĭt mpeh văn hóa chĭng gong bah he mbra trêng nti tay an ăp băl mom tâm ƀon lan. Ăp băl mom tŭr goh dơi ăp nău chĭng n’hanh mbra trêng nti tay an ăp druh ndăm tâm ƀon lan gĭt wât”.

20 năm kơp ntơm bah rnôk drăp ndơ ơm yău văn hóa chĭng gong Tây Nguyên dơi UNESCO mpư rnê, Dak Lak aƀaơ geh rlău 1.600 bor chĭng, hang rhiăng rmôt chĭng gong, bơi 3.750 nuĭh hăr blău, tâm nê rlău 1.000 bu mom hăr blău. Ntŭk tŭr goh chĭng gong hŏ jêng ndơ ntĭt văn hóa săk ntơr êng, rgop n’hao rup gui Dak Lak tâm nđŭr văn hóa neh dak n’hanh nkual.

Tĭng wa Đào Mỹ, Groi kruanh UBND n’gor Dak Lak, tâm nô nău mhe, mât ndray chĭng gong nkre đah pâl nđaih văn hóa, dŏng rgâl mbrô, njêng ndơ geh ƀư văn hóa ntĭt êng, ndơ̆ drăp ndơ ơm yău jêng tơm ndơ hun hao jŏ jong nâp dăng:

“Mpôl hên mbra dăn đă Bộ Văn hóa, Thể thao n’hanh Pâl nđaih rdâk njêng du Đề án rgum an ntŭk gŭ rêh văn hóa chĭng gong Tây Nguyên mô dơn êng an n’gor Dak Lak. Tâm nê geh ntrŏng năl na nê̆ nău ntuh kơl an mât ndray n’hanh ntik n’hao rnoh khlay văn hóa chĭng gong Tây Nguyên bah drăp ndơ năp dŏng an tât kon nuĭh, tât nău mât kơn mbro, hun hao văn hóa chĭng gong, ntĭm nti kon nuĭh nđơn tay bah kơi”.

Mô dơn lah nău nteh njroh mprơ, chĭng gong Tây Nguyên lah trong tâm nđŭr văn hóa uĕh êng, rgop rdâk tay krêp dêh đah ăp rnoi nuĭh, n’hao dăng tâm gĭt wât nsum, tâm rnglăp mât njrăng jâng nsing văn hóa. Ta ăp ƀon lan nar aơ, nău nteh chĭng gong nkre lah nău nkoch ơm kăl e, nkre pơk trong hăn let năp tay. Rnôk bu mom nđơn tay drăp ndơ ơm yău ntlơi an tay, ƀon lan lor nchrăp trêng nti tay n’hanh ăp trong kơl dơi an ƀư du trong sŏng di, chĭng gong mô dơn dơi mât ndray ma hôm n’grêh rêh tâm nău rêh ngăn ăp nar đŏng. Bah nê nkre mât săk tơm, nkre njêng suan ntrôl hun hao wăng sa- rêh jêng kon nuĭh./.