Ntŭk kan rhŏ an hành chính công xă Đăk Pxi, n’gor Quảng Ngãi bêng âk nuĭh. Ntŭk ntô bah Ntŭk kan dŭt hvi yor dơi pă dăp ta ngih rƀŭn xă Đăk Long, nkuăl Đăk Hà ơm, yơn rnoh nuĭh âk an gŭ kâp ta mbôr nsưng bah di tach. Yuh Y Rê, ta thôn Kon Tiêu,  xă Đăk Pxi, an gĭt:

Kônh wa tât ƀư samƀŭt dŭt âk, mông nar ta ntŭk wơt dơn samƀŭt rhăch nău n’gŭr răm, mbôr nsưng kâp bêng mro. Ăp nuĭh mpŏng dơi mkra ngăch gay năn nău kan bah rnăk wâl, jêng rnôk geh âk nău jêr têh an cán bộ. Kơt gâp ndơ̆ samƀŭt nar aơ nar ôi taơ mư dơi jêh.

Hôm yuh Y Rum, ta thôn Pâ Cheng, tât chứng thực samƀŭt an kon hăn nti, nkoch:

Nar bah năp ri cán bộ ƀư dŭt ngăch, ôi hăn ndơ̆ kêng măng khân pơng mplơ̆ jêh dâl. Nar aơ ri mô gĭt geh ngăch đŏng lah mô, kônh wa tât ƀư samƀŭt rhăch nău dŭt âk. Cán bộ xă uănh tât đŏng, dŭt n’hâm kơl kônh wa mpôl hên tâm rnôk ƀư samƀŭt.

Wa A Ly-Groi bí thư chi bộ, kruanh thôn Pâ Cheng, xă Đăk Pxi, an gĭt, bah rnôk ngih dak dăp n’gâng kan hành chính, nuĭh ƀon lan dŭt răm rnôk ăp samƀŭt dơi mkra ngăch ta xă, mô an hăn âk km tât nkuăl kơt bah năp đaơ:

Aƀaơ uĕh blău rhŏ an nuĭh ƀon lan tă bah nău ndâk njêng n’hanh săk rnglăy nău kan bah ntŭk kan rhŏ an Hành chính công dŭt uĕh n’hanh săk rnglăy. Ta aơ, ăp samƀŭt hành chính dơi mkra du mpông, mbơh rah wah, kloh na nê̆, mkra nău kan dŭt ngăch, kơl nuĭh ƀon lan ntêm nkrem mông nar, n’hâm soan kônh wa dŭt răm rhơn. Ntŭk kan xă gŭ êp jay nta nơih an kônh wa dŭt âk. Rmôt cán bộ dăch bên, ntĭm dŭt n’hâm, nta saơ uĕh răm rnôk tât mkra nău. Nău ntrôl dăng kơt dŏng công nghệ thông tin kơl uănh joi, ndơ̆ samƀŭt rhăch nău n’hanh dơn jêh ƀư ngăch, dơh.

Xă Đăk Pxi, n’gor Quảng Ngãi, ndâk njêng tĭng nglăp nsum xă Đăk Pxi n’hanh Đăk Long (ta nkuăl Đăk Hà, n’gor Kon Tum ơm). Ndrel đah rgum nsum ntŭk kan hành chính, xă ƀư tĭng uĕh du đêt nău kan pă gưl bah gưl nkuăl ơm, jêng rnoh nău kan dŭt âk. Nô A Sanh, cán bộ Ntŭk kan rhŏ an hành chính công xă Đăk Pxi, răm rhơn an gĭt, âk jêr, ăp nô an nsrôih dŭt n’hâm:

Tâm lvang bôk năp mbơh ƀư trong kan rhŏ an nsum, jêr jŏt têh ngăn lah nău mha mhe bah cán bộ n’hanh nuĭh ƀon lan. Tă bah rnôk pah kan mpôl hên bên đah trong ƀư mhe, kơt dŏng công nghệ thông tin. Tâm rnôk wơt ƀon lan ƀư samƀŭt, mpôl hên rah rơ̆ch, dŭt n’hâm ntĭm tĭng gưl. Đêp rmên, rblang kơl nuĭh ƀon lan saơ đăp mpă, nsing nơm lơn.

Rgâl bah nău mĭn hành chính an nău mĭn rhŏ kan lah nău saơ na nê̆ ngăn rnôk ƀư tĭng ntrong kan n’gâng kan ƀon lan 2 gưl ta Đăk Pxi, ntŭk geh tât 87,5% nuĭh ƀon lan rnoi mpôl đêt. Wa Phạm Thị Thương, Bí thư Đảng ủy xă Đăk Pxi an gĭt, ƀư tĭng uĕh ăp bôk nău kan rƀŏng tĭng lam dak ntuh kơl an nkual rnoi mpôl đêt n’hanh nkual yôk, nău rêh bah kônh wa ăp rnoi mpôl đêt ta xă nkual jru ngai dôl nar lơ rgâl uĕh. Nău geh rĭng lĕ geh bơi 50 rkeh prăk/du hê/du năm; aƀaơ rnoh rnăk ach o bah xă hôm bơi 6%.

Bah năp nglăp nsum, 2 xă Đăk Pxi n’hanh Đăk Long (ơm) lĕ ntơm geh ăp rnoh an ndâk njêng thôn ƀon mhe. Aƀaơ xă dôl ƀư tĭng uĕh ăp nău rgŏ jă “ƀư rgâl nău mĭn trong ƀư tâm nkual rnoi mpôl đêt”, nkre mbơh ƀư săk rnglăy ăp bôk nău kan, nău kơl bah Ngih dak; ntĭm kônh wa gĭt tât khoa học kỹ thuật, rgâl trong ƀư mât chăm tơm tăm mpa rong gay hun hao wăng sa rêh jêng. Bah năp nău đă nău kan nar lơ âk, Đăk Pxi uănh mĭn tay ndâk njêng rmôt cán bộ, ngăn lah cán bộ rnoi mpôl đêt. Wa Phạm Thị Thương an gĭt:

Đah cán bộ nuĭh rnoi mpôl đêt ta aơ ri mbơh ƀư nău kan tĭng tâm pă nău kan ntơm tâm di đŏng. Yơn lah hôm du đêt cán bộ đêt gĭt mpeh công nghệ thông tin gay tâm di nău đă mkra nău kan ta trong phần mềm geh mbrơi lơn. Ri xă geh trong nchrăp tay na nê̆ gay cán bộ công chức n’hao dơi nău kan way kan, kơt dŏng công nghệ mkra nău kan ta trong mrô tâm năm tât.

Đah nău ntuh kơl lĕ rngôch bah Ngih dak, nău rgâl mhe mpeh nău mĭn hành chính rhŏ bah rmôt cán bộ ta bah dâng, ndrel nău tâm rnglăp bah Nuĭh ƀon lan, nsing nơm xă nkual jru Đăk Pxi mbra nar lơ hun hao hơm răm.