Rlău 4 khay rlong n’glăp dŏng n’gâng kan bar gưl, ăp n’gâng kan tâm dâng ta n’gor Quảng Ngãi hŏ đăp mpăn nău kan mbluh soih. Yơn lah, tâm rnôk rơh bôk năp n’glăp dŏng, n’gâng kan âk ntŭk nha hôm mâp mô đêt jêr jŏt mpeh nuĭh kan, nău way blău kan n’hanh ndơ dŏng công nghệ thông tin. N’gor Quảng Ngãi dôl an ƀư ăp trong droh rklaih jêr jŏt, ntop kơl tâm dâng nău kan geh nău tam.

Wa Phạm Quốc Lựu, 70 năm deh, ta thôn Đăk Tô 5, xã Đăk Tô hăn tât Ntŭk rgum ƀư siƀŭt xã ƀư siƀŭt dăn ntop kơl mât chăm nău rêh an mê̆. Aơ lah lor bôk năp wa Lựu hăn ƀư siƀŭt ta ntŭk kan du mpông.

“Hao ta aơ ri cán bộ ntop kơl lĕ rngôch ăp ntil ndơ, moh ndơ he ŭch ôp ri bu mbơh nti na nê̆. Cán bộ aƀaơ lơn âk lah druh mom, dơi sơch, pah kan uĕh blău. Gâp mpŏng mpôl kan dja jêh aơ tay jêng n’gâng tơm bah nuĭh kan cán bộ xã Đăk Tô”.

Tĭng ƀư trong ntĭt leo n’gâng kan bar gưl, xã Đăk Tô hŏ rmăn ăp tŏng nuĭh kan, tâm pă kloh nău dơn kan an cán bộ, công chức n’hanh an ƀư lĕ rngôch ăp nkô̆ pah kan ta ăp ntil trong kan. Cán bộ xã lor nchrăp tâm ôp trong kan đah ăp ntŭk tâm dâng, n’gâng kan bah n’gor gay dơi ntĭm nti, jêng nău kan uănh nsum rhong aih.

Mpeh rgâl mbrô, lôch n’glăp nsum, lam trong kan công nghệ thông tin ơm mô hôm dŏng, cán bộ ân ƀư bên đah phần mềm mhe jêng bôk năp wĭ wĕ. Bol mô hŏ geh công chức way mât uănh nău kan, rmôt cán bộ ta Ntŭk rgum ƀư siƀŭt bah xã hŏ kơt nti êng, đăp mpăn nău lăp dŏng kan n’hanh wơt siƀŭt bah ngai đăp mpăn. Aƀaơ, 100% siƀŭt bah xã dơi nkra di nar ton. Wa Mai Huy Hưng, Groi kruanh UBND xã Đăk Tô an gĭt, cán bộ way nsrôih rlău jêr jŏt, geh rnôk pah kan tât n’gul măng gay năn ngăch nău kan:

“Pah kan kơt lah mô geh nar prao, nar pơh. Oh nô geh rnôk 10 mông măng nha hôm pah kan đŏng, nkre gŭ mĭn, nkre ôp gưl bah lơ gay ntĭm nti, mbơh kơl. Ăp nău kan rhong aih, yơn nuĭh ntĭm nti nău way blău kan hôm pah pât. Du đêt trong kan kơt rgâl mbrô tă bah dơn nkre nău kan yơn cán bộ kơt nti êng, an ƀư ăp tŏng ăp nkô̆ tĭng nău  rđău đă”.

Lôch 4 khay lăp kan, xã Đăk Rve, n’gor Quảng Ngãi dơn nău  kan ntoh luh tay dŭt âk, tâm rnôk nê nău blău kan bah rmôt cán bộ, công chức mô hŏ tâm ban. Ntơm bah nău ngăn geh nê, xã hŏ geh siƀŭt dăn đă n’gor ntop kơl, tâm pă tay nuĭh kan ta ăp trong kan ân geh nău gĭt blău jru mpeh công nghệ thông tin, dak si, ntĭm nti... Aƀaơ, cán bộ xã Đăk Rve way tâm ôp đah ăp n’gâng kan tâm dâng, n’gâng kan bah n’gor gay dơi ntop kơl mpeh nău way blău kan. Nơm geh kơt nê, âk ntil nău kan ntơm nơh mô tŏng tơm nuĭh kan dơi rdâk tay, mô hôm geh nău “nkai nău kan” mô lah ntlơi liăn nău kan.

Wa Huỳnh Ngọc Phong, Kruanh UBND xã Đăk Rve, n’gor Quảng Ngãi an gĭt, ndơ năp dŏng, ntrŭp nkra công nghệ thông tin ta âk thôn mô hŏ dơi ntuh kơl ăp kôp, jêng nău kan nsum, tâm ôp hôm mbrơi. Gay nkra bah nău dja, xã rgop jă trong leo ƀư kơt nti êng, gŭ mĭn êng, n’hao nău gĭt blău way kan tâm rmôt cán bộ, công chức:

“Ntrôl dăng nău dŏng công nghệ thông tin tâm nău kan, rƀah gĭt nô nău ta thôn ngăch di, nkre đah nău dơn kan bah ăp kruanh thôn. Nău khlay lah rgŏ jă lĕ rngôch cán bộ, công chức geh nuih n’hâm dâk kan êng, tĭng jăp nău way, tĭng ƀư nău dơn kan ta nuih  n’hâm rhŏ dŏng. Gâp đăm lĕ oh nô tâm kruanh UBND xã, ăp kruanh jrô kan ân đăp mpăn nuih n’hâm "5 kloh’" gay dơh mât kân, tĭng groi nđôi n’hanh ntrŭt ntrôl nău kan”.

Tĭng nchih rgum ta ntŭk pơk uănh nău lư nkra ƀư siƀŭt bah n’gor Quảng Ngãi, tâm bah ri aơ, rnoh âk siƀŭt ta ăp xã, phường, đặc khu hŏ nkra lôch bah năp nar ton n’hanh di nar ton geh bơi 99%. Ban Thường vụ Tỉnh ủy đă ăp n’gâng kan đă tay cán bộ hăn ntop kơl nău way blău kan, lah ăp trong kan địa chính, tài nguyên - môi trường, tài chính ta ăp ntŭk geh trong nchrăp kan têh khlay kơt trong loih ot ngăch, trong cao tốc Quảng Ngãi - Bờ Y, trong meng dak lêng Dung Quất - Sa Huỳnh…; nkre, n’hao dăng tiăr nti, ntĭm nti bah ngai n’hanh na nê̆ an gưl xã. Wa Nguyễn Hoàng Giang, Kruanh UBND n’gor Quảng Ngãi lah rjăp, cán bộ n’gor hăn ndrel tay, ntop kơl ăp ntŭk tâm nău kan rgâl mbrô gay rhŏ dŏng an ƀon lan uĕh lơn:

“Mpôl hên tĭng groi nđôi grêt dăch n’gâng kan bar gưl, ngăch nkra bah jêr jŏt, droh rklaih kŏ kol. Ăp Thường vụ mât uănh du đêt Tỉnh ủy viên, ăp Tỉnh ủy viên mât uănh ngoăy mô lah bar xã, mbơh lĕ rngôch an gưl bah lơ. Đăp mpăn n’gâng kan bar gưl lăp kan mbro, lơn lah tâm nău an ƀư siƀŭt pơk sŏng dăng bah ngai, nkre đah nuĭh ƀon lan n’hanh doanh nghiệp"./.