Chơ̆ phiên ta nkual yôk Tu Mơ Rông, n’gor Quảng Ngãi (bah năp đaơ ta nkuăl Tu Mơ Rông, n’gor Kon Tum) mô knŭng lah ntŭk tăch rgâl jêt ma hôm jêng ntŭk tâm mâp bah nuĭh Xơ Đăng ta nkual yôk prêh, rgop rgâl nău way ơm nkra njêng rƀŏng tât ntrong ƀư lŏ mir kloh uĕh. Chơ̆ phiên dơi ƀư ăp rơh du khay du tơ̆, wăch rgum nar lơ âk nuĭh ƀon lan râng. Jêh 3 rơh ƀư, Chơ̆ phiên Tu Mơ Rông ngăn ngên jêng ntrong ƀư rlong bôk năp, jêng ntŭk tăch ndơ uĕh lăng, kơl ƀon lan nuĭh Xơ Đăng rgâl nău mĭn nkra njêng. Yuh Y Khương ta thôn Ngọc Leng, xă Tu Mơ Rông an gĭt:

Rơh tăch ndơ bôk năp kônh wa dŭt prêng, djôt ndơ klach mô geh nuĭh rwăt. Knŭng geh 6, 7 rnăk hăn dơm. Rơh 2, rơh 3 âk lơn, xă lŏ ntop kơl tay ndrơng tay gay an ndơ, kônh wa dŭt răm.

Chơ̆ ta nklang xă Tu Mơ Rông dơi sa nkra lơ 20/8/2025 ta rnoh neh bơi du ha, geh nkual jay 500m2 n’hanh ăp ntil ndơ ƀư ntop kơl, dĭng lĕ prăk ndâk ƀư rlău 4 rmen prăk yor UBND nkuăl Tu Mơ Rông, n’gor Kon Tum (ơm) ntuh kơl. Ndơ ƀư aơ, n’gâng kan ƀon lan xă Tu Mơ Rông lĕ mbơh ƀư ntrong kan “Rơh hŏ mô sŏk prăk n’hanh geh prăk’, nta nơih an nuĭh ƀon lan tăch, tâm rgâl ndoh ndơ.

Tĭng wa Dương Đăng Khoa, Groi Kruanh UBND xă Tu Mơ Rông, ntŭk khlay bah ntrong ƀư “Rơh tâm pleh chơ̆ mô sŏk prăk n’hanh geh prăk” lah nkre geh nkô̆ nău rêh jêng, nkre ntrŭt nuih n’hâm wăng sa. “mô sŏk prăk” lah ăp ndơ dŏng, kho ao yor xă rgŏ jă bah kon nuĭh rgop an dơm an nuĭh ƀon lan. Hôm “geh prăk” lah ndơ lŏ mir, dak si bah kônh wa dơi nuĭh ƀon lan, doanh nghiệp n’hanh hợp tác xã rwăt tay gay ntrŭt ngăch nkra njêng. Ăp rơh chơ̆ ƀư tĭng rơh tâm lơ 20 ăp khay, tĭng đah ăp nău geh nsum mpôl kơt Tết Trung thu, Nar bu ur Việt Nam 20/10 mô lah êp tât nar Nhà giáo Việt Nam 20/11. Wa Dương Đăng Khoa an gĭt, năm tât, xă Tu Mơ Rông nchrăp n’hao âk rơh tăch ndơ du khay 2 tơ̆.

Rgâl nău way ơm, way bên, nău wât bah kônh wa mô dơh, jêng mpôl hên ƀư tĭng gưl, jao cán bộ mât uănh thôn nkoch trêng, ntop kơl kônh wa djôt ndơ hăn chơ̆ tăch. Ndơ “mô sŏk prăk” mbra hŭch mbrơi mbrơi, hôm ndơ lŏ mir n’hanh dak si “geh prăk’ mbra hao.  

Lam n’gor Quảng Ngãi aƀaơ geh 181 chơ̆, 3 ntŭk tăch rgâl, 12 siêu thị. Ta nkual dôr yôk n’hanh n’har bri, rĭng du xă geh 2 chơ̆. Nău jêh ngih wâl gung trong chơ̆  nta nơih an tăch ndơ bah ƀon lan. Âk ndơ ntĭt mpơl, ngăn lah tơm dak si bah nuĭh rnoi mpôl đêt  dơi tăch ta ăp chơ̆ n’hanh ntŭk tăch rgâl, rgop ntrôl hun hao wăng sa thôn ƀon, đăp mpăn nău rêh nuĭh ƀon lan.