Nŭng ôi ta kơh dak lêng Nha Trang, ăp ndrĭch choih êr lĕ plơ̆ tay nău uĕh ang ơm bên. Tĭng rmôt mpôl năch pâl nđaih hăn jâng tâm nđik sial dak lêng, muh măt răm m’ak. Ăp păng dŭ âk nchrat êr ntăm ta ndrĭch dak lêng, tăng kon se ngơi ndroh n’gôr, nteh dak nkŏch kơt n’hâm rêh tay jêh rơh mih dak lip têh.

Wa Trần Văn Tân ta phường Nha Trang an gĭt, knŭng đêt nar bah năp, ntŭk aơ lêng lang ndŏk mbrâm yor dak lip bah dak me Cái sĭt. Tơm si pă, tơm đung kro, gri ka su, băm tâm nĕ bŏk jêng rkum jong âk km. Hang rhiăng phung pah kan ntŭk ntô gŭ âm ndrel ăp doanh nghiệp pâl nđaih n’hanh rmôt ta ntŭk, rgum koaih lĕ măng nar. Wa Tân saơ ŭch yor jêh âk n’hâm soan ƀư, dak lêng lĕ kloh uĕh plơ̆ tay tâm nău rhơn bah lĕ nuĭh ƀon lan n’hanh năch pâl nđaih.

Du hê rgop du ty, nuĭh dak bah dih hăn kơl đŏng. Knŭng 2-3 nar lĕ ƀư kloh dak lêng. Aƀaơ dak lêng kloh rsang plơ̆ tay. Nar aơ saơ kơt nĕ dŭt răm.

Mô knŭng koăih rwăch dak lêng, nău kan pâl nđaih Khánh Hòa tâm ăp nar mih dak lip rgum lĕ n’hâm soan yor nsum mpôl. Rlău 10 ca nô, mô tô dak, duk mpan bah ăp doanh nghiệp dơi rgŏ jă wơt kơl nuĭh ƀon lan nkual dak băm. Rnôk dak lip rhoăt, ăp ntŭk kan n’gôn tay âk rbăn nklâm piăng sa, pă an ndơ dŏng, an phe, kho ao, rgop mât uănh nău rêh an nuĭh ƀon lan.

Tât aƀaơ, lĕ rngôch ăp ntŭk pâl nđaih mper dak  Cái lĕ pơk mpông tay jêh ăp nar an rlu. Wa Nguyễn Văn Hòa, Giám đốc N’gâng kan Văn hóa-Thể thao n’hanh Pâl nđaih Khánh Hòa an gĭt:

Bu năch tât uănh nsong, rlu rlău lĕ n’gŭr răm. Mpeh đah nău kan văn hóa mbra rgŏ jă, ntop kơl ăp doanh nghiệp ntuh kơl pơk hvi ăp ndơ mhe wăch rgum năch. Nău kan mbra ƀư đŏng ăp nău khlay tâm ban lam ntŭr neh gay wăch rgum năch tât n’gor Khánh Hòa tâm rơh dŭt năm.

Wa Nghiêm Xuân Thành, Bí thư N’gor ủy Khánh Hòa, an gĭt: Bu năch geh dŭt âk tâm nău rhŏ bah n’gor Khánh Hòa, dơi uănh lah “bôk dô̆t” kơl rdâk hao wăng sa ngăch ngăn. Wa ntĭm rđău:

Duh lĕ uĕh, năch dôl tât. Yor rĭ, an ndăn mbơh ƀư ntrŭt nău ŭch pâl nđaih đăp mpăn. Nău kan pâl nđaih mbra khuch tât ăp doanh nghiệp, nkra njêng tăch rgâl, khuch tât sŏk an tơm prăk, nta an nău kan, jêng nău kan pâl nđaih an ƀư dâl.