Nău uĕh bôk năp rnôk tât lei Pông, xă Chư A Thai, n’gor Gia Lai lah jay nhih têh n’gul ƀon. Wăr kiău ma lah ăp jay nhih way ơm bah nuĭh Bahnar. Gung trong ƀon lan lĕ dơi tuh chay mô lah bê tông, boăt nthoi đah ndrĭch lŏ n’hah mir. Wa Đinh Por mhe ƀĭt ndeh kay bah mir sĭt, an gĭt rnăk wâl geh 8 mlâm ndrôk ndrel đah 2 ha mir, geh prăk đăp mpăn.

Kônh wa gâp sâm geh lơn hôm. Âk nuĭh ƀư ba an săk geh âk. Êng rnăk wâl gâp ri geh prăk dŭt đăp mpăn, mô kơt bah năp đaơ ji ngot ach o sa mbo, sa bum, ndơn piăng. Hôm kon sau tâm ƀon hăn nti tŏng ăp, ngih samƀŭt ri dăch ƀon gâp dâl. Lĕ geh mon nti blău hăn nti ta Gia Lai...

Jay nhih si bah rnăk wâl wa Đinh Mlanh ta n’glah 4, êp jâng gung jay nhih bah ƀon. Ta nâm jay nhih prăp âk ndơ lŏ mir, măy mŏk, nchrăp an yan mhe. Rnăk wâl geh 3ha neh tăm bum blang n’hanh tao, mât 16 mlâm ndrôk, 3 mlâm rpu n’hanh âk sŭr djăr. Knơm gơih pah kan jan sa n’hanh gĭt ntêm nkrem, jêng rnăk wâl jêng ngoăy tâm âk rnăk sâm geh ta ƀon plei Pông. Wa Đinh Mlanh ntô̆ n’hao:

Nkual mpôl hên aƀaơ, bah năp đaơ lah nkual căn cứ, geh rlăng lơh phah, kuăl jă yơn mpôl hên mô ŭch, pah kan cách mạng tay ta nkual căn cứ aơ. Jêh rklaih đăp mpăn ri ƀư sa, gŭ rêh taơ, mô tĭng Fulro, mô djăt nău nuĭh m’hĭk nsŭk nsôr, knŭng rgum nkra njêng, mât rong dơm. Bah năp đaơ, nău rêh bah kônh wa njê ngăn. Dơi Ngih dak ntop kơl manh prăk, pă an kon ndrôk, bê gay kônh wa hun hao mât rong nkra njêng; jêh nĕ ntop kơl ƀư trong bê tông tâm ƀon, nău hăn nsong, nchoăt rdêng dŭt dơh, kơl an kônh wa ƀư sa săk rnglăy lơn, nău rêh rgâl na nê̆.

Knơm nău uănh kơl bah Ngih dak, nuĭh ƀon lan dơi ntop kơl tơm ntil, dơi manh prăk kơl an gay hun hao nkra njêng, mât chăm, nău rêh bah kônh wa ntơm hao. Hội Liên hiệp bu ur xă Chư A Thai nsrôih nkoch trêng oh yuh râng ntrong ƀư ntêm nkrem, mât sŭr neh. Knŭng tâm du năm, geh rnăk ntêm nkrem geh bơi 25 rkeh prăk, rnăk wâl đêt ngăn 8 rkeh prăk. Yuh Byơnh-du hê nuĭh ƀon lan ta plei Pông an gĭt, knơm nău gơih pah kan jan sa n’hanh ntêm nkrem dŏng, jêng nău rêh bah kônh wa dơi hao na nê̆. Ntĭt nsa kơt rnăk yuh Siu H’Oan geh 1,5 ha bum blang, 8 sào ba lŏ, mât âk ndrôk, jêng rnăk sâm geh tâm ƀon.

Mpôl hên rgum rƀŭn tâm Rmôt bu ur, tâm kơl pah kan jan sa, ƀư tâm râp ty, tâm kơl tuch tăm mkra njêng... Gâp saơ rơh druh ndăm aƀaơ dŭt ngăch, gĭt trong ƀư sa, tăm bum, tăm tao n’hanh ăp ntil tơm tăm êng. Moh nău ƀư geh săk rnglăy lơn bah năp đaơ dŭt âk. Rhơn lơn tay lah rơh druh ndăm aƀaơ djăt, ƀư tĭng nău ntrŭnh, nău ntĭm bah cán bộ.

Wa Đinh Tuy-Kruanh thôn Plei Pông an gĭt, ƀon geh bơi 150 rnăk, đah nklăp 700 nuĭh, lĕ rngôch lah nuĭh Bahnar. Nău rêh bah nuĭh ƀon lan tâm ƀư ngăn ngên rgâl rnôk n’gor Gia Lai ndâk njêng ƀon lan mhe tâm nkual rnoi mpôl đêt bah năm 2017. Tâm nĕ plei Pông dơi xă Chư A Thai, nkuăl Phú Thiên (ơm), n’gor Gia Lai dơi săch ƀư lor đah nău ŭch jêng ƀon mhe leo lor. Ăp nkual ƀon lan tâm ƀon dơi dăp rgum uĕh rep, dăp tĭng rwang bàn cờ. Ntung trong kơt điện, trong hăn, trong dak dŏng.... dơi ntuh kơl ndâk ƀư jêh. Nuĭh ƀon lan nsrôih tâng tăm tơm si uĕh nđĭr mpêr n’gar jay nhih n’hanh nkual rgum rƀŭn nsum bah ƀon, jêng muh măt mhe an plei Pông nar aơ. Kruanh thôn Đinh Tuy nkoch:

Ƀon mpôl hên dơi Ngih dak ntuh kơl ndâk ƀư điện, trong hăn, ngih samƀŭt tŏng ăp, nău rêh bah kônh wa mô hôm ji ngot kơt bah năp đaơ. Hôm kon sau dơi hăn nti tŏng ăp. Dŭt lah uĕh Đảng, Ngih dak lĕ uănh kơl, ntuh kơl ndâk ƀư ntung trong an ƀon plei Pông mpôl hên, kơl an nău rêh nar lơ sâm geh. Tât aơ tay kônh wa mbra nsrôih pah kan jan sa, tâm rnglăp tĭng Đảng, Ngih dak, ndâk njêng nău rêh rnăk wâl văn hóa, ƀon lan tâm rnglăp, nău rêh uĕh lăng.

Plei Pông (xă Chư A Thai, n’gor Gia Lai) nar aơ nsoh an saơ nơm muh măt mhe; kloh uĕh, têh ndrŏng n’hanh đăp mpăn. Ăp trong hăn bê tông kloh uĕh, ăp chor jay nhih uĕh reh đah nău pŭt nđĭr ba lŏ lah aơ saơ na nê̆ an nău rgâl ntŭk căn cứ cách mạng năm kăl e. Bah nău uănh kơl bâh Đảng, Ngih dak ndrel nuih n’hâm tâm rnglăp, gơih pah kan jan sa bâh kônh wa Bahnar, plei Pông dôl tĭng nar hao, jêng ntŭk ang tâm ndâk njêng thôn ƀon mhe.