Rnôk geh nŭih tâm ƀon khĭt, bu ranh ƀon tât tâm ngih bu khĭt nê gay ma goh gâr mbơh nau rngot ndrel tâm nchră nau njêng kan. Gĭt nau nê, ăp nŭih mô kâp tâm jă, ŭch hăn êng gay ma kơl an: nŭih ndâk nthưp, nŭih gâm sa, nŭih nchrăp chĭng gong, nŭih ri hăn mbơh ma kônh wa gŭ ngai.  Wa Rưm, 50 năm, tâm ƀon K’tu, xã Kông Chêng, n’gor Gia Lai, nkoch:

            ‘Nau chang khĭt tâm xã, gâp saơ kônh wa bu tât chang âk ngăn. Kônh wa tur chĭng. Hyơt ntơm bah nar bôk năp ân tât nar ma bu leo tâp, ndrel tâm pă nau rngot ma rnăk vâl nŭih khĭt...oh nô băl bên ri rgop prăk rêk, ngăn lah geh rnăk rvăt nsum du mlâm sur gay ma kơl an rnăk vâl bu khĭt”.

            Kŏ kơt ăp rnoi êng êng, đah rnoi Bahnar, khĭt ôm lah nau khlay, nau kan bah lĕ ƀon, mô êng bah du rnăk vâl, ri ma bu mô kâp tâm kuăl tâm jă rnôk hăn kơl, lah tăng ri tât êng dơm. Wa Đinh Pơr, 58 năm, tâm ƀon Pông, xã Chư A Thai, n’gor Gia Lai, mbơh:

            ‘Tâm ƀon hên lah geh bu khĭt, lĕ ma ƀon tât chang, râng, leo chĭng gay ma tur lôch măng. Ăp nŭih ndrel râng kơl ân bu, mô geh nŭih ƀư kan êng êng nơm ôh. Tât rnôk lôch tâp, ndâk ngih môch ri mơ bu plŏ nau kan lŏ mir bah êng nơm”.

            Tâm ăp nar  geh nŭih khĭt, ngih nê âk ngăn nŭih tât. Khân păng tât chang, tât bonh. Măng ri ăp nŭih tur chĭng bah ƀon tâm pă mông gay ma tur chĭng lôch măng. Ăp nŭih tâm êp ngih leo n’ăp ma phông, bêl gay ma rlu rlau rnôk rgănh. Ăp nŭih bu têh ri vay njâr ŭnh gay ma tâm nkoch bri, nkah nau ueh, ndrel nau rngot klân ma nŭih l khĭt.

            Nau gŭch ndrôk rpu tâm rnôk nê mô kâp sa têh ôh, ma ntoh nau nkah ma nŭih khĭt ndrel nkah nau kơl bah ƀon lan dăch ngai tât chang, pă nau rngot ma rnăk nơm. Wa Đinh Brơi, 67 năm, bu ranh ƀon Plei Chưp, xã Lơ Pang, n’gor Gia Lai lah rjăp, nau ueh ngăn tâm rnôk chang khĭt bah rnoi Bahnar lah nuih n’hâm tâm kơl. Lah rnăk vala nŭih khĭt mâp nau jêr, ri ƀon lan rgop prăk rvăt sur, djar, ndrănh. Oh nur bu ur lah hăn chang ri leo phe gay ma kơl ân rnôk bu khĭt:

            ‘Rnôk geh nŭih khĭt ri nơm kŏ geh nau nkah, rngot klâng, ngăn lah đah nŭuh ma nơm ndrel pah kan, ndrel gŭ rêh tâm du rnăk vâl, ndrel ƀon lan. Ndri ma rnôk bu khĭt ri ƀon lan gŭch sur, ndrôk gay ma ntoh nau rngot klâng ma nŭih khĭt ndrel ma gâm trau, piăng ân kônh wa, ƀon lan ngai bu tât chang”.

            Aƀaơ hin, du đê̆ nau vay tâm rnôk chang khĭt bah rnoi Bahnar hŏ geh huch hoi, jăng lơi ăp nau vay rlu mâl ơm, nau vay roh hoach, knŭng mât ăp nau khlay ueh tâm di ma nau rêh, yơn nuih n’hâm tâm rnglăp, tâm kơl nsum bah ƀon lan hôm ueh ơm./.