- Dăn wa an gĭt ăp săk rnglăy ntoh lư jêh 5 năm ƀư tĭng Nghị quyết Đại hội đại biểu rnoi mpôl đêt n’gor Dak Nông rơh tal 3?

Wa K’Khét Atô: “Tâm năm kan bah năp, săk rnglăy dơi rhơn ngăn lah n’gor Dak Nông lĕ ndâk njêng tâm rnglăp lam ƀon lan. N’gor Dak Nông geh 40 rnoi nuĭh oh nô ndrel oh nô gŭ rêh, lĕ tâm rnglăp, ndrel soan, ndâk njêng Dak Nông ndrŏng uĕh. Dơi geh nău uănh bah Đảng, Ngih dak n’hanh Quốc hội lĕ ndơ̆ an trong mbơh ƀư 3 bôk nău kan rƀŏng tĭng lam dak tâm nkual rnoi mpôl đêt, nkual yôk. Ƀon lan ăp rnoi nuĭh n’gor Dak Nông lĕ n’gluh soan tâm rlong pah kan, jan sa, gay n’gor rklaih luh nău n’gor ach o. Rƀŏng tât năm 2025, n’gor Dak Nông jêng n’gor ndrŏng ta nkual Tây Nguyên.

Tâm lvang 2019-2024, n’gor Dak Nông geh mro n’hanh rlău trong nchrăp n’hŭch ach o. Tâm 22 nău rƀŏng têh trong kan rnoi nuĭh lvang 2021-2025, ta n’gor Dak Nông lĕ mbơh ƀư geh 11 rnoh ndơ ƀư. Lam n’gor Dak Nông dôl nsrôih gay jêh ơm ăp nău rƀŏng tâm năm 2024”.

- Ơ gay dơi geh ăp nău lôch uĕh kơt nĕ, ri nău blău ơm bah n’gor Dak Nông tâm nău mât uănh an nkual rnoi mpôl đêt, lơn lah ndâk njêng tâm rnglăp rnoi nuĭh lah moh ndơ hơi wwa?

Wa K’Khét Atô: “Bôk năp, n’gor nsrôih ƀư tĭng ăp nău mĭn bah Đảng mpeh trong kan rnoi nuĭh, nău wât di ntŭk, nău ƀư tơm n’hanh nău khlay bah trong kan rnoi nuĭh tâm nău kan ndâk njêng n’hanh mât njrăng neh dak. Uănh trong kan rnoi nuĭh n’hanh ƀư tĭng ăp nău kơl rnoi nuĭh lah nău kan chính trị khlay, aơ lah nău kan bah lam Đảng, lam ƀon lan, lam tahen, bah trong chính trị.

Tal 2, ntrôl dăng trong kan mbơh nău, nkoch trêng, ƀa ƀơ mbơh rblang ăp nău ntrŭnh, nău kơl, pháp luật ngih dak an ƀon lan nkual rnoi mpôl đêt n’hanh nkual yôk. Nta an nuĭh ƀon lan râng ƀư tĭng ăp bôk nău kan nău kơl rnoi nuĭh ta ntŭk.

Tal 3, n’hao săk rnglăy trong kan, uănh nđôi, groi uănh nău ƀư tĭng ăp bôk nău kan, nău kơl rnoi nuĭh; mkra ngăch ăp nău mhe ntoh tă bah dâng. Rgŏ jă ăp nuĭh ntoh lư, rmôt cán bộ n’gâng tơm, nuĭh uĕh, kan uĕh, ƀon lan nkra njêng blău, gay lăp ndrel n’hanh đăp mpăn.

Tal 4, Nâp nâl trong chính trị ta bah dâng; uănh khlay ntĭm nti cán bộ mom, mât uĕh nău ƀư tơm bah nuĭh nsing nơm, chức sắc chroh rƀŭn tâm nău mkra rsaih nkra nău tâm rkeh ta ntŭk, ngăn lah ăp nău mô nâp dăng mpeh mât njrăng bri dak-rnă njrăng.

Tal 5, hun hao lĕ rngôch ăp ntil nău văn hóa, rêh jêng tâm nkual rnoi mpôl đêt. Ndâk njêng nău kơl mât ndrăy n’hanh mât uĕh văn hóa; ntuh kơl, ndâk njêng rmôt kan ndrel hun hao ƀon nău kan ơm, rhŏ an pâl nđaih ta ntŭk, hun hao nkra njêng, hun hao wăng sa”.

- Ơi wa, mât uĕh ăp săk rnglăy lĕ dơi geh, tâm năm kan tât aơ tay, n’gor Dak Nông dơi geh ăp nău rƀŏng n’hanh hun hao khlay gay ndâk njêng tay, hun hao dăng lơn, ngăn lah tâm nkual rnoi mpôl đêt?

Wa K’Khét Atô: “Bah ăp săk rnglăy mhe rlău, tâm năm tât n’gor nsrôih n’hŭch rnăk ach o jŭr bah dâng 10%; ntơm mô hôm ăp xă, thôn, ƀon dŭt jêr jŏt; 70% rnoh xă nkual rnoi mpôl đêt n’hanh nkual yôk geh tâm di thôn ƀon mhe; nsrôih jŭt jăng ngih rông mpông sat, jay ja.

Mpeh trong mkra khlay tâm 5 năm tât, ngih pah kan ƀư trong kan rnoi mpôl đêt rgâl mhe ăp nău ntrŭnh, trong hăn bah Đảng, nău kơl pháp luật bah Ngih dak mpeh trong kan rnoi nuĭh, geh tât ƀon lan rnoi mpôl đêt. N’hao săk rnglăy, tam tâm nău mât uănh ngih dak mpeh trong kan rnoi nuĭh. Ndâk njêng trong ƀư, nău kơl tâm di gay mât uĕh nău dơh, nău geh ơm bah nkual rnoi mpôl đêt, rƀŏng tât hun hao wăng sa-rêh jêng, n’hŭch ach o ngăch, nâp nâl n’hanh đăp mpăn mât njrăng bri dak-rnă njrăng.

Rgum ntĭm nti, ntop tay, n’hao uĕh rmôt cán bộ, công chức, viên chức, rmôt vũ trang dôl pah kan ta nkual rnoi mpôl đêt. Uănh lơn tay ntĭm nti cán bộ, công chức, viên chức mom, bu ur lah nuĭh rnoi mpôl đêt. Ƀư tay tĭng ăp nău rgop an tâm nchră, bôk nău kan, nău kơl rnoi mpôl đêt bah Trung ương; n’hanh nău kơl geh êng bah ta ntŭk gay hun hao wăng sa-rêh jêng nkual rnoi mpôl đêt lvang 2026-2030”.

- Ơ, dăn lah uĕh wa!