Ăp nar dŭt pơh, bu ranh Điểu Xem, rnoi Bunong, tahen ơm, nŭih bu rnơm tâm ƀon Dak Blao, nkuăl têh Kiến Đức, nkuăl Dak Rlâp, n’gor Dak Nông hŏ ndrel ma rmôt mât ƀon tât ăp rnăk ach o tâm ƀon. Bu ranh mbơh, ăp ngih du nau geh jêng, geh tâm dăch dơh ri mơ ƀư ueh nau kơl an tă bah ngih dak tât ƀon lan. Ăp rnăk ach o geh ntĭm nau kan, nkre kơl an kơt kon ntil tăm, mpa rong, ntĭm nau kan tuch tăm mât rong, nkre bonh đă mpeh nuih nhâm. Tĭng bu ranh Điểu Xem, nuih n’hâm tâm rnglăp kơl an ƀon lan đăp mpăn ndrel hun hao:

            ‘Kônh wa ƀon lan mro tâm rnglăp, tâm dăch, bonh đă ƀon lan nsôih pah kan jan sa, hun hao văng sa. Ƀon lan đăp mpăn lŏ geh nau kơl an bah Đảng, Ngih dak ntuh kơl ƀư ngih vâl gung trong, kơl an prăk ân kônh wa geh dơi pah kan jan sa n’hao nau geh jêng ăp nar”.

            Tâm xã n’har bri Quảng Trực, nkuăl Tuy Đức, n’gor Dak Nông, nau kan bah ăp nŭih bu ranh ƀon, nŭih geh bu rnơm dôl geh ƀư ueh ngăn tâm nau mât đăp mpăn nkuăl n’har bri ndrel hun hao văng sa. Bu ranh Điểu Đi, ƀon Bu Prăng 2, xã Quảng Trực mbơh, du nuih n’hâm tĭng Đảng, tĭng cách mạng, nau rêh bah ƀon lan nar lơn hơm tăm, nkual n’har bri geh rgâl ăp nar:

            ‘Rnôk tâm lơh ri nơm hăn râng tâm lơh, mât neh dak ndrel mât nkual n’har bri aơ. Rnôk aơ đăp mpăn ri ăp nŭih đảng viên, tahen ơm ân geh leo trong hăn lor ndrel bonh đă ƀon lan ƀư ueh nuih n’hâm tâm rnglăp, nsôih hun hao văng sa, hun hao nau rêh ndrel mât nâp nkual n’har bri ta aơ”.

            Năl rmôt bu ranh ƀon, nŭih bu rnơm geh nau khlay, ntơm năm 2013, n’gor uỷ Dak Nông hŏ ƀư Bôk nau kan 05 mpeh nau ndâk rmôt cán bộ tâm nkuăl rnoi mpôl đê̆. Tât rnôk aơ, rmôt kan aơ geh bơi tât 500 nŭih, geh nchrăp nau blau mpeh nau ntrŭnh bah Đảng, pháp luật bah ngih dak, nau blau bonh đă ƀon lan tâm rnôk mhe. Bah nê, khâm păng nchrăp, nsôih ƀư nau bonh đă, joi uănh kloh nau mĭn, nau ŭch bah ƀon lan gay nkoch ăp nau bah nkuăl gay geh trong rklaih.

            Kŏ bah nau kan bonh đă bah nŭih bu rnơm kơl ƀon lan n’hao nau nkah, nsôih, rdâng săk tam nau ƀư nsŭk đă, ndăn rlăm tâm rnoi mpôl, mpôl chroh. Âk nau tâm rkeh, tâm in pit geh rklaih tă tâm dâng. Nkre lah, ăp nŭih aơ nsôih râng ndâk ăp nau kan tâm rlong rŏng dak, ăp nau bonh đă bah nkuăl kơt lam ƀon lan tâm rnglăp ndâk njêng nau rêh mhe, n’huch ach o nâp nâl.

            Wa Hồ Văn Mười, Groi Bí thư n’gor uỷ, Kruanh UBND n’gor Dak Nông lah rjăp, ƀư ueh nau kan bah ăp nŭih đảng viên, nŭih bu rnơm tâm nkuăl rnoi mpôl đê̆ lah nau khlay bah ăp gưl, ăp ntŭk kan gay hun hao n’gor:

            ‘Ăp gưl uỷ, n’gâng kan tâm nkuăl nsôih ƀư ăp nau kan gay ma ƀư ueh nau dơi bah nŭih bu rnơm, rmôt kan tơm, lŏ ndâk njêng, ƀư nâp, nchrăp ueh ăp nŭih geh bu rnơm tâm nkuăl rnoi mpôl đê̆, lŏ ndâk njêng ndrel rêng hvi ăp nau kan ntoh lư tâm ăp nau kan gay ma rgop nau hun hao văng sa, rêh jêng, rnă njrăng neh dak tâm ăp nkuăl, rgop nau ndâk njêng ƀon tơm Dak Nông lơn ma sâm geh”.

            Nchră tâm di nau dơi bah nŭih bu rnơm tâm ƀon lan rnoi mpôl đê̆, geh nau kơl an tâm di gay geh dơi hun hao ueh nau kan “ăp nŭih leo trong lor bah ƀon lan” hŏ rgop nau kơl an n’gor Dak Nông mât nâp nau đăp mpăn chính trị, geh dơi ăp nau ueh tâm hun hao văng sa, hŏ rklaih luh ach o bah n’gor ndrel nsôih jêng n’gor geh dơi bah nkuăl Tây Nguyên”./.