Ôi 19/9, ta Ntŭk têl ơm yău gưl neh dak Đình Lạc Giao, nkual ƀon têh Buôn Ma Thuột, n’gor Dak Lak ƀư ôp mbah bŏng khay djang Giáp Thìn, dăn an phŭt sial der kiău ma ngăch bah rlău, nuĭh ƀon lan dơi đăp mpăn. Ăp nău pâl rlưn ta rnôk lễ dơi n’hŭch đêt, rong an  tơm ndơ kơl nuĭh ƀon lan nkra bah khuch  khat dak bŭk lơh. 

Ôp mbah bŏng khay djang lah du nău way văn hoá way ơm dơi ƀư tâm rnôk Trung thu ăp năm ta đình Lạc Giao, ntŭk mbah dăn pah neh joi bri Đào Duy Từ n’hanh ăp rơh kơn bah năp hŏ geh n’hâm suan njêng ƀon Lạc Giao – ƀon lor bôk năp bah nuĭh Yuăn ta nkual neh Dak Lak. Ôp mbah dơi ƀư huêng khlay tă bah rmôt ôp mbah nam quan lah ăp bŭnh ranh, nuĭh geh nsing nơm, ơm gĭt tâm ƀon ƀư. Ôp mbah bŏng khay djang lah nău way ƀư gay nkah gĭt trôk nar bri neh, lah uĕh ăp brah yang tơm neh mât ƀon lan, ăp yău ye hŏ jăt kơl an mih lăng prăng uĕh, neh dak đăp mpăn ƀon lan manh uĕh, wăng sa dơh geh, ndơ tuch tăm jŭr geh. Tâm nău răch dăn năm aơ geh du nkô̆ răch dăn an phŭt sial der kiău ma ngăch bah rlău, nuĭh ƀon lan ơm plơ̆ tay nău rêh kơt ơm.