Ta nkual ƀon têh Đà Lạt, n’gor Lâm Đồng hŏ ntoh măt "Bản đồ pâl nđaih njroh mprơ Đà Lạt”. Aơ lah ngoăy tâm 3 nău blău ƀư mhe gưl n’gor gay ntrŭt ntrôl nău khlay bah văn hóa n’hanh blău mhe, ƀư jêng ngăn ngăn ăp nkô̆ hŏ ton rnôk lăp tâm săk ăp nkual ƀon têh blău njêng mhe bah UNESCO.

Bản đồ pâl nđaih njroh mprơ Đà Lạt pă an bơi 60 ntŭk tât ta nklang nkual ƀon têh Đà Lạt n’hanh du đêt nkual kiău ma dơi nchih rblang ma bar ntil nău ngơi tiếng Anh n’hanh tiếng Việt. Bản đồ dơi tâm pă ntil jêng 8 rmôt, kơt: ntŭk têl ơm yău kăl e n’hanh drăp ndơ ơm yău ntlơi an tay, bri dak uĕh măt uănh, ntŭk pla n’hơ n’hanh ntŭk ƀư njroh mprơ, ntŭk nkrêh goh nău mprơ… nta trong dơh an năch pâl nđaih dơh hăn tât n’hanh rlong uănh saơ ăp ntŭk pâl nđaih, văn hóa, njroh mprơ bah nkual ƀon têh dor yôk dja.

Wa Đặng Quang Tú, Kruanh UBND nkual ƀon têh Đà Lạt an gĭt, kêng dŭt năm 2023, Đà Lạt dơi rhơn n’hao, jêng ngăn ăp nkual ƀon têh blău mhe bah UNESCO tâm trong kan njroh mprơ. Nău rdâk njêng bản đồ pâl nđaih njroh mprơ Đà Lạt lah 1 tâm 3 nău blău njêng mhe gưl n’gor gay ƀư jêng ngăn ngăn ăp nkô̆ hŏ ton rnôk lăp mpôl, tâm ban kơt ntrŭt ntrôl nău khlay kan bah văn hóa n’hanh blău mhe tâm hun hao nâp dăng.

“Ndơ geh ƀư dja mô dơn lah du ndơ dŏng leo trong, ma hôm lah ntung njŏ đah ăp nghệ sĩ, ăp ntŭk njroh mprơ n’hanh nsum mpôl; kơl pơk luh ăp nău nkoch uĕh mpeh lịch sử, văn hóa n’hanh blău njêng mhe, nkre ntrŭt ntrôl nău hun hao jŏ jong bah n’gâng kan pâl nđaih, njroh mprơ nkre đah nkual ƀon têh njroh mprơ. Tâm let năp tay, mpôl hên mbra ƀư lôch jêh tay, hun hao n’hanh pơk hvi bản đồ dja gay pă an ăp tŏng n’hanh di  ngăn ăp nău lư mpeh ăp ntŭk tât njroh mprơ mhe, ăp nar kan văn hóa săk ntơr êng bah n’gor”.

Lah ta rơh lễ ntoh măt, wa Jonathan Wallace Baker, Kruanh ntơh măt Nhih pah kan ntĭm nti, Khoa học n’hanh Văn hóa bah Liên Hiệp Quốc (UNESCO) ta Việt Nam lah rjăp, ntơm bah rnôk râng nkual ƀon têh blău rklă mhe UNESCO tâm trong kan nkrêh goh, Đà Lạt nkre nsrôih râng ăp nar kan dak bah dih n’hanh nkual bah mpôl, nkre rdâk njêng trong nchrăp dâk kan gay tĭng ƀư ăp nău ton đah mpôl nkual ƀon têh dja. UNESCO dŭt rhơn rnôk dơi ndrel hăn n’hanh ntop kơl Đà Lạt rdâk njêng bản đồ pâl nđaih – du bản đồ mbra năl dơi n’hanh tâm pă ntil ăp ntŭk gŭ rklă njêng nsum bah nkual ƀon têh tâm ban kơt ăp ntŭk tât pâl nđaih ta aơ.

“Gâp mĭn lah nău blău rklă mhe dja mbra rgop mpơl saơ tay reh n’gu văn hóa n’hanh blău rklă mhe bah nkual ƀon têh Đà Lạt, n’hanh mbra lah du ndơ dŏng uĕh gay năch  hăn uănh pâl mbra hăn dơh lơn tâm nkual ƀon têh. Nkre, mbra ntop kơl ăp nhih pah kan Ngih dak mât uănh n’hanh hun hao drăp ndơ ơm yău ntlơi an tay, ăp ntŭk blău rklă mhe bah nkual ƀon têh dja dơi uĕh lơn”.

Tĭng wa Jonathan Wallace Baker, Đà Lạt săk geh âk tâm nău ndăn dŏng ăp tơm ndơ văn hóa bah he an  ăp trong hun hao  jŏ jong, yor aơ lah âk mbâl nău way ơm văn hóa tă bah 20 rnoi mpôl rnoi đê̆ njêng jêng. Yor kơt nê̆, nău tâm lăp tâm ban đah hun hao wăng sa- rêh jêng kon nuĭh đah mât ndray n’hanh ntik n’hao ăp rnoh khlay drăp ndơ ơm yău ntlơi an tay văn hóa, uănh khlay ăp rnoh khlay wăng sa tât bah nău blău rklă mhe văn hóa, njroh mprơ n’hanh uănh khlay tât nău âk ntil tâm nău rklă mhe bah ăp nuĭh, ăp mpôl mô lah ƀon lan mbra mô dơn ntrŭt ntrôl wăng sa bah nkual ƀon têh ma hôm gay mât ndray drăp ndơ ơm  yău ntlơi an tay đŏng./.