Nău tâm pât mprơ lah ngoăy tâm âk ntil ndơ nghệ thuật way ơm ntoh lư geh nău kan dŭt khlăy n’hanh mô dơi mô geh tâm nău rêh nău mĭn bâh nuĭh K’Ho. Bâh ntơm mhe deh, oh kon se lĕ geh djăt nău n’hir bĭch ueh rngêt bâh u bâh mê̆, tât têh 15-16 năm, druh ndơm K’Ho lĕ gĭt tâm pât tâm ơh, her ur, gĭt uh mbuăt rlet n’hanh geh dŏng ăp ntil mbuăt rlet, tŭr chĭng goh gong, gĭt njroh mprơ tâm ăp rơh tâm nđur kuăl brah rhơn ba mhe,. rhơn jay mhe, kuăl ăp huêng brah..tât bơi ranh, rnôk lah tơm rnăk vâl khân păng gĭt mprơ tâm ơh gay ma vơt năch, ăp tơ̆ geh năch tât khâl. Tât ranh gŭ ta nă ŭnh nkre ngêt ndrănh yăng nkre nkoch ndrong nkoch yău an kon său.

Ăp nău tâm pât mprơ bâh nuĭh K’Ho geh mprơ tâm ơh, nkoch nău, n’hir oh...nău mprơ dơh vât dơh kăr, ntĭt nkoch ăp ntil ndơ tâm nău rêh, dăch bên đah nău mĭn bâh nuĭh K’Ho. Ăp nău mprơ geh ndrăy bâh rơh aơ tât rơh êng, jêng rlău ma nău khlăy văn hóa way ơm, păng hôm nha geh nău khlăy ndâk nsơm ueh tâm rnăk vâl, băl mpôl, mât nău ueh pah kan tâm ntŭk rêh jêng.

Ndrel đah nău tâm pât, nuĭh K’Ho hôm nha geh âk ntil ndơ uh goh êng êng n’hanh geh dŏng âk tâm ăp nău way kuăl brah, tâm mâp tâm nđur. Nău dŏng way geh dŏng âk lah njêng an ăp nău way kuăl brah, ndrel đah njroh mprơ. ăp ntil ndơ uh goh ntoh lư way dŏng lah gong lŭ, chĭng, đồng la, gâr ntô rpu, mbuăt rlet lah ăp ntil ndơ uh goh way ơm đah nău nteh ueh êng tĭng nău way nău rêh mpôl rnoi. Wa Nguyên Văn Mèng, nuĭh geh mât rbăy ndơ ueh êng bâh nuĭh K’Ho an gĭt.

“Nău khlăy ngăn  đah nuĭh K’Ho lah Đồng La. Bôk năp lah gay ma dŏng goh tŭr ta rơh ngêt nđăp nsông. rlău ma nĕ ta rơh nđăp nsông mô dơi mô geh mbuăt n’hanh đồng la. Rnôk rhơn lăp jay mhe, bu tŭr chĭng đồng la, kuăl brah tuch tăm geh dŏng tŭr Đồng La đong”.

Gong lŭ n’hanh chĭng lah 2 ntil ndơ dŭt geh dŏng âk tâm nău rêh ƀon lan rnoi đê̆. Bor chĭng nuĭh K’Ho way geh 6 mblâm. Chĭng me, chĭng ndrơn, chĭng thơ, chĭng thơ gay ma ơh plơng lah chĭng me lor tŭr. Rnôk tŭr chĭng, nuĭh K’Ho dâk tĭng trong rvoach, tĭng ăp chĭng lĕ geh dăp bâh me, tât kon, ti ma nhup ta trôm, ti kiău tŭr. Mpôl dâk tŭr chĭng hăn dâng hăn lơ tĭng nău nteh chĭng. Êng gâr lah ntil ndơ geh dŏng âk ta ăp rmôt nuĭh. Chĭng mô geh mblom ntơ lah cĭng, chĭng nteh nom ntơ lah cồng. Tâm nuĭh K’Ho Lạch gŭ rêh ta nkual yôk Lang Biang n’gor Lâm Đồng, rĭ chĭng geh tât 36 nău tŭr êng êng. Êng chĭng geh dŏng âk ta ăp rơh răm rhơn.

Nău dŭt rhơn lah rlet rlău âk rơh jêr jŏt tâm nău rêh, yơn ƀon lan K’Ho hôm nha geh mât nău nteh uh goh way ơm. aƀaơ ndrel đah nău nsum ti kơl an bâh Ngih dak, hôm nha geh ăp nuĭh geh gĭt nău mĭn mât rbăy tay nău njroh mprơ way ơm an kon său ba kơi tay gay ma mât ăp nău khlăy văn hóa rnoi nơm.

Âk rnăk vâl nuĭh K’Ho aƀaơ geh nău gĭt vât mât rbăy tay ăp bor chĭng, mbuăt rlet, gâr..đah nuĭh K’Ho, aơ mô dơn lah drăp ndơ khlăy, ma ăp ntil ndơ uh goh, ăp nău tâm pât mprơ, nău nteh chĭng gong geh mpơl dŏng tâm ăp rơh tâm mâp tâm nđur, lah trong kan gay ma mât tay nău ueh êng rnoi nơm.