Đah bôk nău “Rmôt mhe, nuih n’hâm mhe, tâm rlong đăp mpăn rnă njrăng ta ntŭk tâm nu nău mhe”, ôi nđaơ (19/9), ta nkual ƀon têh Kon Tum, UBND n’gor Kon Tum ƀư rgŏ jă ntrong leo tâm rlong tâm rmôt râng mât rnă njrăng, đăp mpăn ta ntŭk. Ntoh ngơi ta ƀư rgŏ jă, wa Lê Ngọc Tuấn, Kruanh UBND n’gor Kon Tum đă kruanh ăp ngih pah kan, ntŭk kan, ƀon lan n’hao nuih n’hâm lĕ đah nău kan, rgum ntĭm rđău, ƀĭt joet n’hanh mbơh ƀư ntrong leo tâm rlong đăp mpăn săk rnglăy, ngăn ngên, mô ntuih, ƀư dơm.

Nkô̆ nău, bôk nău tâm rlong an dơi mbơh ƀư jru, uĕh nâp, tĭng nău rƀŏng, rnoh trong nchrăp nău kan chính trị bah ăp gưl ủy, ntŭk kan, ƀon lan. Rmôt râng mât rnă njrăng, đăp mpăn ta ntŭk an mât uănh ƀư tĭng rjăp nău rđău, na nê̆, lĕ rngôch bah gưl ủy Đảng, nău mât uănh ƀĭt joet bah n’gâng kan ƀon lan n’hanh ntĭm mpeh nău kan bah rmôt công an.