Rlău du năm aơ, Công an n’gor Dak Lak kan nsum đah n’gâng kan ăp nkuâl, nuĭh ƀon  lan, an ƀư njêng rhiăng “Tổ liên gia đăp mpăn njrăng n’gang puh n’hât ŭnh sa”, “Ntŭk puh n’hât ŭnh sa nsum mpôl” ta nkual ƀon lan gŭ. Ăp trong leo hŏ rgop n’hao nău gĭt êng, nău dơn kan bah ƀon lan n’hanh ntop kơl mpôl njrăng n’gang ŭnh sa rdâng lơh rnôk tât geh ŭnh sa.  

Nar bôk khay 9, ta ntŭk tăch ndơ bah wa Nguyễn Quốc Lập meng Tỉnh lộ 1, thôn 5, xã Ea Wer, nkuâl Buôn Đôn, n’gor Dak Lak công an xã hăn ôp uănh way ăp khay ndơ njrăng n’gang puh n’hât ŭnh sa. Wa Lập an gĭt, lôch rnôk dơi nkoch trêng, ntĭm nti, rlău du năm bah năp hŏ râng êng “Tổ liên gia đăp mpăn njrăng n’gang puh n’hât ŭnh sa”. Ntŭk tăch ndơ dơi rvăt năp ndơ njrăng n’gang puh n’hât ŭnh sa lah: dĭng puh n’hât, me nôp. Êng chuông mbơh hŏ tâm rgop kan nsum đah ăp rnăk. Wa Lập nkoch mpeh nău way kan tổ liên gia đăp mpăn njrăng n’gang ŭnh sa ta ntŭk tăch ndơ bah rnăk wâl:

“Tâm rmôt dja lah 10 rnăk, nău dơi rvăt năp ndơ mbơh njrăng ŭnh sa, n’hanh  tâm rgop kan nsum. Rnôk moh geh nkô̆ nău tât ŭnh sa n’hanh pet nchuông mbơh, lĕ 10 rnăk mbra tăng lĕ nău nteh mbơh ŭnh sa dja, lôch nê gĭt năl ntŭk ŭnh sa ta ah ntŭk ri ăp nuĭh mbra rgum tay gay an ƀư pah kan puh n’hât ŭnh sa” 

Tổ liên gia đăp mpăn njrăng n’gang puh n’hât ŭnh sa dơi rdâk njêng ta xã Ea Wer lah ăp rnăk tăch rgâl ndơ, phân poh, dak si mât njrăng si tăm, ntŭk tăch ndeh honda… tâm ntêng lêng nsum. Nô Trần Văn Nam, nuĭh tâm tổ liên gia geh jay tăch ndeh honda an gĭt, ăp rnăk râng êng da dê. Nău dja gay rgum  ăp nuĭh ndrel kan nsum n’hanh dơi uănh tâm ban kơt “ăp laih ti nthoi jong” bah mpôl njrăng n’gang puh n’hât ŭnh sa n’hanh kơl nuĭh. Tĭng nô Nam, trong leo kơl ăp nuĭh râng geh nău gĭt blău n’hanh dơh geh ndơ njrăng n’gang puh n’hât ŭnh sa ta ntŭk ntơm ŭnh ƀoh dĭl.

“Mpôl hên dơi năp ăp tŏng nău gĭt blău mpeh njrăng n’gang ŭnh sa n’hanh kơl nuĭh ta ntŭk. Rlău ma nê, hôm ntrŭp chuông nkah njrăng lor, dĭng puh n’hât ŭnh sa, tơm dak, choih ra ka đŏng…n’hanh ăp ndơ dơh rtoh ŭnh sa ri an êng, rnôk hăn luh dih mô lah mô pơk mpông tăch ri n’hât điện gay đăp mpăn njrăng n’gang puh n’hât ŭnh sa”.

Ntơm bah ăp trong leo ƀư dơi rdâk njêng ta nkuâl Buôn Đôn n’hanh ăp nkuâl, thị xã, nkual ƀon têh, tât aƀaơ n’gor Dak Lak hŏ rdâk njêng geh 303 “Tổ liên gia đăp mpăn njrăng n’gang puh n’hât ŭnh sa”, 71 “Ntŭk puh n’hât ŭnh sa nsum mpôl”, n’hanh 17 “Trong leo ƀư lam ƀon lan njrăng n’gang puh n’hât ŭnh sa ta nhih pah kan, đơn vị n’hanh nkual ƀon lan gŭ”.

Trung tá Phùng Việt Đức – Groi Kruanh jrô kan Cảnh sát njrăng n’gang puh n’hât ŭnh sa n’hanh kơl nuĭh, Công an n’gor Dak Lak an gĭt, ma ăp trong leo ƀư, mpôl kan dơi kan way ƀư tiăr nti, kơt dŏng ngăn ăp trong njrăng n’gang puh n’hât ŭnh sa nkhêp geh ta ngăn ngăn gay ăp nuĭh râng. Ntơm bah nê, ăp nuĭh râng mbra dơi kơt dŏng mbro, n’hao nău dơi rdâng lơh, rnôk geh nău tât rtoh, ŭnh sa. Trung tá Phùng Việt Đức an gĭt:

“Tâm let năp tay mpôl hên mpŏng lah ƀon lan ŭch n’grŏ tĭng tay, râng rdâk njêng tay âk trong ntĭt leo “Tổ liên gia đăp mpăn njrăng n’gang puh n’hât ŭnh sa”. Trong rƀŏng bah mpôl hên lah pah kan njrăng n’gang puh n’hât ŭnh sa lah bah ƀon lan, ndơ dŏng puh n’hât ơm geh tâm  ƀon lan da dê. Mhâm ƀư rnôk geh tât ŭnh sa, ăp nuĭh ƀon lan lah du hê nuĭh tahen njrăng n’gang puh n’hât ŭnh sa, gay mô ŭnh sa trĕ lam, ƀoh têh hŭch đêt khuch khat roh huach mpeh nuĭh n’hanh drăp ndơ”.

           Nău pơk hvi ăp trong leo “Tổ liên gia đăp mpăn njrăng n’gang puh n’hât ŭnh sa” n’hanh “Ntŭk puh n’hât ŭnh sa nsum mpôl” ta n’gor Dak Lak lah nău kan ngăn ngăn, rgop ntrŭt ntrôl trong leo ƀư lam ƀon lan râng njrăng n’gang puh n’hât ŭnh sa tĭng nău rđău đă bah Bộ Công an, lơn lah tâm rnôk nô nău ŭnh sa, geh tât krit nji, jêr gĭt năl lor. Ntơm bah nê hŭch đêt khuch khat mpeh nuĭh n’hanh drăp ndơ tă bah ŭnh sa lơh./.